Olgeta Oli No Save Win, Yumi No Save Foldaon

Dia profet blong yumi, Presiden Russel M. Nelson, i talem long las jeneral konfrens se: “Long ol denja taem ia we Aposol Pol i bin profesae from, Setan i nomo stap traem blong haedem ol atak blong hem agensem plan blong God. Plante ivel tingting oli fulap i stap. From hemia, wan wei ia nomo blong stap laef long saed blong spirit, i blong mekem desisen blong letem God i stap win insaed long laef blong yumi, blong lan blong harem voes blong Hem, mo blong yusum evri paoa blong yumi blong help blong mekem Isrel i kam tugeta.”¹

?Taem yumi stap tingting long invitesen blong profet blong lan blong harem voes blong God, ol hat blong yumi oli wantem blong mekem o oli kam strong? Letem yumi tingbaot kaonsel we i stap long Jekob 6:6: “Yes, tedei, sapos yufala i jusum blong harem voes blong hem, no mekem hat blong yufala i kam strong; from se, ?from wanem bae yufala i jusum ded? Letem yumi jusum blong letem God i win insaed long laef blong yumi.

?Olsem wanem nao yumi save letem God i win insaed long laef blong yumi be i no Setan? Long Ol Doktrin mo Kavenan 6:34 yumi ridim: “From hemia, smol grup, no fraet; mekem gud; letem wol mo hel i kam wan agensem yufala, from we sapos yufala i stanap antap long strong ston blong mi, bambae oli no save win.” Hemia i wan impoten promes. Nomata we wol mo hel oli joen agensem yumi, oli no save win sapos yumi jusum blong letem God i win taem yumi putum laef blong yumi antap long strong ston ia blong Hem.

Taem Hem i stap toktok long ol disaepol blong Hem, Jisas Kraes i bin tij abaot wan waes man mo wan man we i no waes, we oli rekodem i stap long Matiu japta 7 long Niu Testeman. Plante long yufala oli harem Praemeri singsing ia.”Waes Man mo Man we I Krangke.”² Sapos yu bin tekem taem blong komperem fofala ves insaed long singsing ia, yu bae faenem se ves 1 mo 2 oli semmak long ves 3 mo 4. Tugeta waes man mo man we i no waes oli stap bildim wan haos. Tufala i wantem givim wan sef mo gudfala hom long famli blong tufala. Tufala i gat strong tingting ia blong stap hapi tugeta blong oltaem olsem wan famli, semmak olsem yu mo mi. Situesen blong tugeta man ia i semmak—“Ren i foldaon, mo wota i fulap i kam antap.” Yumi singim ol toktok ia sikis taem, taem yumi singim singsing ia. Wan samting nomo we i mekem tufala i defren hem i we, waes man hem i bildim haos blong hem long strong ston mo haos ia i no foldaon, be man we i no waes i bildim haos blong hem long sanbij mo mo wota i wasemaot haos blong hem. From hemia, wea ples fandesen blong yumi i stap long hem, hem i impoten tumas, from risal blong joes ia blong yumi hem i faenol mo no i no save finis.

Mi hop mo prea se yumi evriwan bae i faenem mo stap long tru mo strong fandesen ia taem yumi stap bildimap laef blong yumi long fiuja. Oli rimaenem yumi long Hileman 5:12: “Mo nao, ol boe blong mi, tingbaot, tingbaot se hem i antap long strong ston blong Ridima blong yumi, we i Kraes, Pikinini blong God, we yutufala i mas bildim fandesen blong yutufala; blong mekem se taem we devel bae i sendemaot ol strongfala win blong hem, yes, ol spia blong hem long wael win, yes, taem we ol ston blong aes blong hem mo strong win blong hem bae i foldaon long yutufala, bae oli no gat paoa ova long yutufala blong pulum yutufala i go daon long bigfala hol blong harem nogud mo trabol we i no gat en; hemia i from strong ston we yutufala i bin bildimap yutufala antap long hem, we i wan sua fandesen, wan fandesen we sapos ol man oli bildimap olgeta antap long hem, oli no save foldaon.”

!Hemia promes we i kam long God! Sapos yumi bildimap fandesen blong yumi long Jisas Kraes, !yumi no save foldaon! Taem yumi stanap strong wetem fet kasem en, God bae i helpem yumi blong bildimap laef blong yumi long strong ston ia blong Hem, mo ol get blong hel bambae oli no save win agensem [yumi ]” (Ol Doktrin mo Ol Kavenan 10:69). Maet bae yumi no save jenisim evri samting we oli stap kam, be yumi save jusum olsem wanem yumi rere from wanem we i stap kam.

Sam long yumi bae oli ting se, “Gospel hem i gud, mekem se yumi nid blong mekem i kam pat blong laef blong yumi ating wantaem nomo long wan wik olsem.” Blong go long jos wan taem nomo long wan wik hem i no inaf blong bildimap yumi blong stap strong long ston ia. Ful laef blong yumi i mas fulap long gospel blong Jisas Kraes. Gospel hem i no pat blong laef blong yumi, be laef blong yumi nao i pat blong gospel blong Jisas Kraes. Tingting long hemia. ?Hemia i no tru? Laef blong yumi long wol ia i wan pat nomo blong ful plan blong sevem man mo fasin blong kam olsem wan god.

God hem i Papa blong yumi long Heven. Hem i lavem yumi evriwan. Hem i save hamas yumi save mekem bitim we yumi save yumiwan. Hem i no save nomo ol smolsmol samting long laef blong yumi. God i save evri smolsmol samting blong ol smosmol samting blong ol smosmol samting blong laef blong yumi.

Plis folem waes kaonsel blong profet blong yumi we i stap laef, Presiden Nelson. Olsem we oli bin raetemdaon long Ol Doktrin mo Kavenan 21:5–6:

“From toktok blong hem, bambae yumi kasem, semmak olsem se hem i kamaot long maot blong Lod Hemwan, wetem fasin blong save wet longtaem mo wetem fet.

“From we, taem bae yufala i mekem olgeta samting ia, ol get blong hel bae oli no save win agensem yufala; yes, mo Lod God bae i ronemaot ol paoa blong tudak long fored blong yufala, mo bae i mekem ol heven oli seksek blong gud blong yufala, mo blong glori blong nem blong hem.”

!From risen ia nao, olgeta oli no save win, mo yumi no save foldaon!

Mi testifae long yufala se Kraes bae i kambak bakegen seken taem olsem we Hem i bin mekem fas taem, be naoia, bae Hem i kam wetem moa glori mo majesti. Mi hop mo prea se bae mi rere blong luk Hem, long saed blong vel ia o long narasaed blong vel. Taem yumi selebretem naesfala Ista sisen ia, mi hop, tru long Atonmen blong Jisas Kraes mo paoa blong laef bakegen long ded blong Hem (luk long Moronae 7:41), bae mi save go antap mo mit wetem Man ia we i mekem mi mo talem: “Tangkyu.” Long nem blong Jisas Kraes, amen.