Ol Onlaen Taem I Krietem Yuniti

Praemeri Jeneral Presidensi nao i bin sponsarem; taem ia i bin blong ol pikinini, ol papa mo mama, mo ol lida we wan boe mo wan gel, we oli bin toktok mama lanwis blong olgeta long Inglis, Spanis, mo Potugis. Ol nara pikinini oli bin givim ol saet ripot raon long wol. Presentesen ia, i tekem sam vidio stori abaot Jisas Kraes, wan mesej blong ol pikinini we i kam long Presiden Russell M. Nelson, wan intaviu abaot ol kavenan blong baptaes wetem Elda Ulisses Soares blong Kworom blong Olgeta Twelef Aposol, mo sam storian toktok wetem Praemeri Jeneral Presidensi. Mo tu, i tekem taem blong droem ol lesen, mekem sam artwok aktiviti, mo singsing. Taem ia, oli bin transletem, mo i stap blong oli wajem long sam moa lanwis. Mo tu, bae i stap tu long ol sot pat, blong oli save yusum insaed long hom blong stadi long gospel.

Jeneral Presidensi blong Ol Yang Woman i holem wan onlaen taem we i makem 150 aniveseri blong oganaesesen blong Ol Yang Woman. Oli brodkastem long 11 lanwis. Presiden Nelson i givim wan mesej we hem i bin rekodem, mo ol lida blong Ol Yang Woman oli bin ansarem ol kwestin long Inglis, Spanis, mo Potugis. Ol yang woman long Nowe mo Taelan oli bin givim ol prea. Long 2020, oli bin leftemap tingting blong ol yang woman raon long wol blong mekem 150 aksen blong seves.

Moa long wan milian famli histri pipol oli bin joenem onlaen RootsTech onlaen dei long Febwari 2021. Namba blong ol pipol we oli bin tekpat i wan we i moa bigwan, mo i kam selebresen blong famli histri long wol we i moa bigwan bitim ol narawan. RootsTech, i bin mekem se i gat divelopmen blong wan onlaen laebri blong lanem samting we bae i stap blong man i yusum ful yia. Elda Jeffrey R. Holland blong Kworom blong Olgeta Twelef Aposol mo waef blong hem, Patricia, oli bin ol ges spika long Famli Diskava Dei, we i wan yia kam tugeta, we i pat blong taem ia.

Yut Miusik Festivol long manis Maj, i bin tekem sam miusik talen mo testemoni. Ol yut blong Niu Silan, Brasil, Dominik Ripablik, Jemani, Saot Afrika, mo Filipin, oli bin holem program ia, we i stanap long 2021 yut stamba toktok blong Jos, “Wan Hae Wok” (luk long Doktrin mo Ol Kavenan 64:33–34). Antap long miusik mo ol mesej we oli tokbaot Kraes nomo we oli kam long ol fren, ol yut, mo tu, Presiden Nelson; Presiden Bonnie H. Cordon, Yang Woman Jeneral Presiden; mo Presiden Steven J. Lund, Yang Man Jeneral Presiden

Presiden Jean B. Bingham, Rilif Sosaeti Jeneral Presiden, i bin ki spika blong nambafaef yia Intanasonol Woman long Diplomasi Dei simposiom. Honorari Konsul jeneral blong Ripablik blong Senegal i sponsarem taem ia, mo i bin onlaen mo i hapen long Los Anjeles, Kalifonia, YSA. Presiden Bingham i bin talem ol intanasonol bisnis lida mo diplomat se edukesen i ki blong sakses blong ol woman mo ol gel raon long wol. Hem i serem sam eksampol blong ol woman we Gospel Litresi puswok i bin blesem olgeta.

Ol memba blong Jos mo fren blong ol nara fet raon long wol oli sendem ol Krismes vidio so we oli bin editim mo mekem i olsem konset mo oli brodkastem long ChurchofJesusChrist.org truaot long Krismes taem olsem pat blong Yia Taem blong Saenem Wol Krismes kampen.