Camille N. Johnson

Camille N. Johnson i bin spendem laef blong hem blong stadi long ol toktok, i yusum olgeta, mo i yusum olgeta blong help blong stretem ol problem long moa long 30 yia wok olsem wan loya. Mo oltaem, hem i faenem bigfala pis long ol toktok blong ol skripja. Hem i kaontem olgeta man mo woman insaed long skripja olsem ol gudfala fren blong hem.

Be yet, taem hem mo hasban blong hem oli bin muv i go long Saot Amerika blong lidim Peru Arikipa Misin stat long 2016 i go kasem 2019, hem i wantem tumas yusum ol toktok. From se hem i neva lanem Spanis, hem i bin prea from paoa ia blong toktok wetem ol misinari blong hem, mo ol pipol, blong oli save filim lav ia we hem i gat long olgeta mo blong oli save harem testemoni blong hem abaot Buk blong Momon.

“Mi bin trastem Lod mo mi bin dipen long Spirit blong pasem lav mo testemoni blong mi taem we mi no faenem ol toktok. I bin wan gudfala, swit mo strong lesen we mi bin lanem, blong ‘no ting se save ia we [mi gat] i inaf long mi’ [Ol Proveb 3:5] be mi givim evri samting ia i go long Sevya blong mi.”

Folem rod ia, hem i bin lanem bakegen wan simpol trutok abaot gospel: “Hem i abaot blong lavem Sevya, blong lavem man olsem Sevya, mo letem lav mo Atonmen ia blong Jisas Kraes i wok insaed long laef blong yumi.”

Sista Johnson i bin gat blesing blong kasem lav, lav ia blong 552 misinari, mo naoia, hem i filim se hat blong hem i gro i go kasem wan milian pikinini, we hem i kasem wok ia blong lukaotgud long olgeta.

“Mi glad tumas long janis ia blong lanem samting aot long ol pikinini ia we oli soemaot klin lav ia blong Jisas Kraes,” hem i talem.

Camille Neddo Johnson i bon i kam long wol ia long 12 Septemba 1963. Papa mo mama blong hem i, Hal mo Dorothy Neddo long Pokatelo, Aedaho, YSA. Hem i bin maredem Douglas R. Johnson long 1987 long Sol Lek Tempol. Tufala i gat tri pikinini. Hem i graduet long Yunivesiti blong Yuta long Inglis long 1985, mo long Yunivesiti blong Yuta Sent J. Kwini Kolej blong Loa long 1989.

Sista Johnson i bin stap olsem wan wod Yang Woman presiden, i bin givim seves long ol presidensi blong Rilif Sosaeti, mo Praemeri, mo olsem wan Gospel Doktrin tija.