Elda Michael A. Dunn

Papa mo mama blong Elda Michael A. Dunn, tufala i bin divos taem hem i wan smol pikinini, be taem mama blong hem i bin lukaotem hem i kam bigwan, mama ia i bin tijim hem blong gat strong bilif mo standet. Afta we hem i bin go long wan praevet jos skul long Sol Lek Siti, Yuta, YSA, hem i bin transfea i go long wan pablik hae skul, mo long ples ia, hem i bin mitim ol memba blong Jos Ia blong Jisas Kraes blong Ol Lata-dei Sent.

Taem we ol niu fren blong hem mo ol papa mo mama blong olgeta oli bin welkamem hem wetem open han, Michael i bin wantem blong lanem moa abaot Jos. Long en, hem i bin disaed blong mit wetem ol misinari. Ol tijing blong olgeta abaot Godhed mo Fas Visen blong Josef Smit “i foldaon long mi wetem ril paoa,” hem i talem.

Tru long prea, hem i bin save se gospel i tru, mo i bin baptaes long ol senia yia blong hem long hae skul. Stat long tetaem ia, Elda Dunn, “i bin kasem kaekae we i kam long sam gudfala lida.”

Mo tu, hem i luksave han blong Papa long Heven mo Sevya truaot long laef blong hem. Elda Dunn i talem: “Mi mi man we i biliv. Mi gat blesing ia blong mi stap wan witnes blong Jisas Kraes mo save tokbaot laef blong Hem, gud fasin blong Hem, mo gospel we Hem i putumbak tedei.”

Michael Austin Dunn i bon i kam long wol ia long namba 5 Maj 1958, long Tuson, Arisona, YSA. Mama mo papa blong hem, i Patricia mo James R. Dunn. Hem i groap long Sol Lek Siti. Afta we hem i bin stap long wan fultaem misin long Hawae Honolulu Misin, hem i bin maredem Linda Virginia Poulson long 1980 long Sol Lek Tempol. Tufala i gat tri pikinini.

Elda Dunn i kasem digri long mas komunikesen long 1981 mo wan masta digri long komunikesen long 2008, tufala ia, hem i kasem long Yunivesiti blong Yuta. Hem i bin jeneral maneja long KUED (PBS Yuta), presiden blong Dunn Communications Inc., mo laswan, hem i bin manejing daerekta blong BYU TV mo BYU Redio.

Elda Dunn, we i bin stap olsem wan Eria Seventi long taem we oli singaotem hem, i bin stap olsem wan bisop, wan kaonsela long wan bisoprik, stek presiden, wod Yang Man presiden, hae kaonsela, mo misin presiden blong Saot Afrika Joanesbeg Misin, stat long 2014 i go kasem 2017.