KOVID-19 mo Ol Tempol

Ol brata mo sista blong mi we mi lavem yufala. Yumi bin gat wan lafet long saed blong spirit. Mi talem tangkyu from ol prea, ol mesej, mo miusik blong ful konfrens ia. Tangkyu long wanwan long yufala blong joenem mifala, long weaples yu stap long hem.

Eli las yia, from KOVID 19 wol sik ia, mo from yumi bin wantem stap ol gud sitisen, yumi bin mekem had desisen ia blong klosem evri tempol, blong sot taem. Long ol manis afta, mifala i filim insperesen blong openem bakegen ol tempol ia sloslo, tru long wan fasin blong lukaotgud. Naoia ol tempol oli stap open folem fofala step, mo yumi folem stret ol rul blong gavman mo rul blong sefti.

Long ol tempol long ol step 1, ol kapol we oli kwalifae, we oli bin kasem endaomen blong olgeta finis, oli save sil olsem hasban mo waef.

Long ol tempol long step 2, oli mekem evri odinens blong olgeta we oli laef i stap, wetem ol endaomen blong wanwan, siling blong hasban mo waef, mo siling blong ol pikinini long papa mo mama. Mifala i jes jenisim ol rul blong step 2, mo hemia i letem ol yut blong yumi, ol niu memba, mo ol narawan wetem wan limit yus rekomen blong oli tekpat long ol proksi baptaes blong ol bubu blong olgeta.

Long ol tempol long step 3, olgeta we oli gat apoenmen, oli save tekpat long ol odinens blong olgeta we oli laef i stap, be tu, oli save mekem ol proksi odinens blong ol bubu we oli ded.

Long step 4, i open fulwan, olsem wan nomol tempol aktiviti.

Mifala i talem tangkyu blong save wet longtaem mo ful seves blong yufala long taem ia we i stap jenis mo i gat jalenj. Mi prea se bambae filing blong wantem wosip mo givim seves insaed long tempol bae i strong moa naoia bitim bifo.

Ating yufala i stap askem se wetaem bae yufala i save gobak long tempol. Ansa: tempol blong yu bae i open taem ol rul blong lokol gavman blong yu i letem. Taem we ol risal blong KOVID 19 long eria blong yu i sef i stap, bae tempol blong yu i open bakegen. Mekem evri samting blong mekem namba blong KOVID i kamdaon long eria blong yu blong mekem se yufala i save gat moa janis blong go long tempol.

Taem yumi wet from hemia, kipim ol tempol kavenan mo blesing blong yu i strong long maen mo hat blong yufala. Stap tru long ol kavenan we yu bin mekem.

!Yumi stap bildim naoia, blong fiuja! I gat fotiwan tempol naoia we oli stap bildim o mekem olgeta i kam niu. !Long las yia nomo, nomata long wol sik ia, yumi brekem graon blong 21 niu tempol!

Mifala i wantem tekem haos blong Lod i kam kolosap moa long ol memba blong yumi, blong oli gat tabu janis ia blong stap go long tempol olsem we situesen blong olgeta i letem.

Taem mi stap anaonsem ol plan blong yumi blong bildim 20 moa tempol, mi stap tingting hevi mo presen ol paeonia—blong bifo mo tedei—we laef blong konsekresen blong olgeta i mekem histri ia i posibol tedei. Bambae oli bildim wan niu tempol blong wanwan long ol ples ia: Oslo, Nowe; Brasel, Beljiom; Vienna, Ostria; Kumasi, Ghana; Beira, Mosambik; Keptaon, Saot Afrika; Singapua, Ripablik blong Singapua; Belo Horisonte, Brasil; Kali, Kolombia; Kwerétaro, Meksiko; Torreón, Meksiko; Helena, Montana; Kaspa, Waeoming; Granjanksen, Kolorado; Famington, Niu Meksiko; Beli, Aedaho; Yujin, Oregon; Elko, Nevada; Yorba Linda, Kalifonia; mo Smitfil, Yuta.

Ol tempol oli wan stamba pat blong Restoresen blong gospel blong Jisas Kraes, we i fulwan. Ol odinens blong tempol oli fulumap laef blong yumi wetem paoa mo paoa long bodi—we i no save kam long wan nara wei. Yumi talem tangkyu long God from ol blesing ia.

Taem yumi stap endem konfrens ia, bakegen mifala i talem lav we mifala i gat long yufala. Mifala i prea se God bambae i mekem yumi swim long ol blesing blong Hem mo bae i lukaotgud long wanwan long yufala. Tugeta, yumi wok long tabu seves blong Hem. Wetem strong paoa long tingting, bae yumi mas gohed blong mekem glori wok blong Lod From hemia, mi prea, long tabu nem blong Jisas Kraes, amen.