O Loo Selesele Pea Faamanuiaga

Ina ua ofo mai le polokalama o le Taumafa Maloloina ma le Ia Malosi i se siteki lata ane, sa atugalu ia Sister Sinafoailuga Rifat Taatiti Leiataua i lona soifua maloloina. Sa tonu ia te ia ma nisi o ana uo mai le Uarota a Apia Samoa Pesega e lesitala ai—e vaai ai pe mafai e le vasega ona fesoasoani ia i latou e faia ni suiga taua o le ituaiga olaga e ola ai.

“Sa ou mana’o e aoao atili e uiga i meaai maloloina ma tuuitiitia le mamafa,” o le tala lea a Sinafoailuga, “ma ou te fia mana’o foi e fai se faata’ita’iga lelei mo lo’u toalua ma le aiga.”

O le kosi o le Taumafa Maloloina ma le Ia Malosi (EHBA) sa fatufatuina e Le Ekalesia a Iesu Keriso o le Au Paia o Aso e Gata Ai e tali atu ai i se faafitauli ua faatupulaia ona o le ma’i suka ma isi faama’i na pepesi i le Pasefika. O lea kosi e faavae i saeanisi faafomai e faatatau i le soifua maloloina ma taumafa, faapea foi taiala a le Ekalesia mo le soifua manuia faaletino ma le faaleagaga lea ua lauiloa o le Upu o le Poto. E tuuina mai e ala i polokalama i luga o upega tafailagi o le Ola Tutoatasi ma sa fatuina faapitoa lava mo tagata i le Eria o le Pasefika.

Mo le 12 vaiaso, e ta’itasi i le vaiaso le vasega aloa’ia a Sinafoailuga i le EHBA, ae faatolu i le vaiaso ona fai a latou faamalositino. Sa latou fiafia i se su’ifeifiloi o le Zumba ma le Tabata—o se faamalositino o toleniga e ta’itovā le malolosi. O le fiafia tele i ai o Sinafoailuga na le’i misia ai se faamalositino ma e tele foi ina nofo mo nisi faamalostino faaopoopo.

Ae e le na o le pau lena. Na tuuina ane e le vaega lea o le EHBA ni lu’i o le tasi ma le i le aluga o le polokalama. Mo se faataitaiga, o le tasi lu’i o le le taumafaina lea o aano o manufasi mo le 6 vaiaso. O isi e aofia ai le inu o le vaitipolo ma le fiu i taeao uma, na o le tasi le asuga o le meaai i ‘aiga taitasi, ma le ‘ai o se taumafataga tele i le taeao ma sina taumafataga laitiiti i le afiafi. Sa faapitoa ona tuuto ia Sinafoailuga i le inuina o le vai ae tuuitiitia le ‘ai o manufasi.

“Sa ou a’oa’oina le ala e avea ai le ‘ai i meaai maloloina e avea o se vaega o lo’u ituaiga olaga,” o lana tala lea. “Ua mafai ona ou ‘ai i meaai maloloina ma inu tele i le vai—le toe i ai ni meainu suamalie mo le malosiaga—ae faapea foi pe a ou kukaina le meaai o le afiafi a le matou aiga, ua ou tuuina lava i ai fualaau mata faisua ona ua ou mana’o i lo’u aiga e aai i meaai [maloloina] o loo ou ‘ai ai.”

O se mea fou na a’oa’oina e Sinafoailuga mai lenei vasega o le auala e faafoea ai le loto popole. O taumafa maloloina faaopoopo i ai le tele o le faamalositino, e mautinoa lava le fesoasoani, ae sa ia aoaoina foi e faapea, a oo i tulaga e popole ai, e mafai ona ia “nofo i lalo ma toe mafaufau [e uiga i mea]. E le gata i lea, ia tatalo i le Atua mo se fesoasoani.” Ua faaiuina ma le manuia e Sinafoailuga lana vasega o le Taumafai Maloloina ma le Ia Malosi i le faaiuga o le 2020, ma o loo ia seleseleina pea lava faamanuiaga o mea uma sa ia aoaoina.

“Ua mafai nei ona ofi le tele o o’u ofu ma ua mafai foi ona ou faia a’u feau i le aso atoa,” o lana tala lea. “Ae i le taimi muamua, sa le mafai ona fai se feau e tasi pe lua i le aso, ona sa ou matua paie lava e savali e oo lava i le punou sa faigata.”

O loo galulue pea o ia ma lona aiga—o lona toalua, o lona tina ma nai ona tei e toalua—ma faamalosiauina i latou ia mulimuli i lana faataitaiga mo se ituaiga olaga e sili atu ona maloloina ma toaga. O loo faamoemoe o ia o le a lesitala tagata uma e maua le avanoa mo le polokalama o le Taumafa Maloloina ma le Ia Malosi.

“O se faamanuiaga tele lenei vasega mo au,” o lana tala lea. “Ua fesoasoani ia te a’u e faamuamua le soifua maloloina ma le soifua manuia mo a’u ma lo’u aiga, ma ua faaalia mai ai foi ia te a’u le alofa tele o lo tatou Tama Faalelagi mo i tatou.”