Teunga Tāú

ʻĪmisi

hands on a white bow

Mei he ngaahi ʻaho ʻemau kei īkí, naʻe ʻi ai maʻu pē ʻemau faʻeé ke fakapapauʻi ne teuteuʻi lelei kimautolu ki he ngaahi meʻa kotoa pē ʻoku faí. Ko ha ngāue lahi ia ki ha ngaahi ʻofefine ʻe toko nima. Kapau ne mau tui talausese ʻi hano fie maʻu ke mau tui kofu, te ne fekau ke mau fetongi. Kapau ne tui ʻe hamau taha ha kiʻi vala fakaʻofoʻofa foʻou ne mau pehē ʻoku ʻikai fie maʻu ke toe tui ha kote neongo pe ko e hā e tuʻunga ʻo e momokó, te ne kei fekau pē ke mau tui kote kotoa. Naʻá ne teuteu lelei maʻu pē foki mo ia, pea naʻá ne fakapapauʻi ʻoku mau fakahoko foki ʻa e meʻa tatau.

Kuo fakaʻaongaʻi ʻe mami ʻene moʻuí ʻi hono akoʻi kimautolu takitaha ʻo ʻikai ngata pē he founga teuteú ka ʻi he anga ʻo e moʻuí foki. Naʻá ne vahevahe ʻene ngaahi fakakaukau fekauʻaki mo e fakafiefia ʻo e ongoongoleleí pea mo ʻene fakamoʻoni ki he mahuʻinga ʻo e temipalé. Naʻá ne fakamahinoʻi naʻá ne fakaʻamua ke mahino kiate kimautolu takitaha e mahuʻinga ʻo e ngaahi ouau ʻo e temipalé ki heʻemau fiefia taʻengatá.

Naʻe hokosia mai leva e ʻaho ne fie maʻu ke mau fakatahataha mai ai ke teuteuʻi ʻa Mami ki hono meʻafakaʻeikí. Kuó ne mavahe mei he moʻuí ni ki he moʻui hokó, hili haʻane akoʻi kimautolu kotoa he meʻa kuo ʻoange ʻa e taimi ke akoʻi ai kimautolú. Ko homau faingamālie ʻeni ke fakahaaʻi ʻemau moʻui līʻoa maʻaná, ʻemau houngaʻia he ngaahi tefitoʻi moʻoni naʻá ne fakatōloloto ki homau ngaahi lotó.

Ko homau fatongiá he taimí ni ke fakapapauʻi naʻe teuteuʻi lelei ia.

ʻI heʻemau hū atu ki he loki ne ʻi ai ʻa Mami ke teuteuʻi ki hono tanú, ne mahaia hono sino kuo pekiá. Ne mole e māfana ʻo hono laumālié, ʻo fetongi ʻe he momoko ʻo e maté. ʻI hono ʻākoloʻi ia ʻe hono ngaahi ʻofefiné mo ha niʻihi ʻo hono ngaahi makapuná, ne mau fakaʻapaʻapaʻi e moʻui ʻo e fefine lelei ko ʻení, ʻo fie fakahaaʻi kiate ia, fakaʻosi, ʻemau houngaʻia ʻi heʻene hoko ko ha tāpuaki ʻi heʻemau moʻuí.

Ne mau toko ono fefine ʻeni: Lia, Heta, Keilini, Loli, Melinitā mo homau tokoua ʻi he fonó, ʻEtilieni. Ne mau tuʻu takatakai ʻia Mami. Pea ne faʻu ʻe homau ngaahi ʻofefiné ha siakale hono ua ʻiate kimautolu. Naʻe fakamanatu mai ʻe he ongo siakale ko ʻení e holongā ʻo e ʻofa ne fakatupu ʻe heʻene moʻuí. Koeʻuhí ko hono ivi tākieiná mo e ngaahi fili māʻoniʻoni ʻo hono hakó, ʻe hokohoko atu ai e tāpuaki ʻo e ngaahi fuakava fakatemipalé ʻi hono ngaahi toʻu tangatá, ʻo tupulaki maʻu ai pē e ngaahi tāpuaki ʻo e ngaahi fuakava fakataulaʻeikí.

Ne teuteuʻi ia ʻe hono ngaahi ʻofefiné ki hono tanú. Ne mau ʻufiʻufi fakalelei hono sinó ʻaki e māfana ʻo e ngaahi pulupulu fakatemipalé. Ne haʻihaʻi fakalelei e līpine kotoa pē; tui hono suú; mo fakapapauʻi ne tonu hono tui ʻo e meʻa kotoa pē. Ko e meʻa fakaʻosi taha ke faí ko hono haʻi ʻo ha līpine fakaʻosi. ʻI heʻemau fai iá, ʻo fakapapauʻi ne haʻi ia ki he fakaʻofoʻofa taha ne mau lavá, ne mau manatuʻi kotoa ai ha meʻa—naʻá ne haʻi e līpine ko iá maʻamautolu takitaha ʻi he fuofua taimi ne mau hū ai ki he temipalé. ʻI heʻemau haʻi fakaʻosi hono līpiné, ne fakataipe ai ʻemau foaki fakafoki ange maʻana, ʻi he loto-houngaʻia, ʻa e meʻaʻofa ʻo e ngaahi tāpuaki fakatemipalé.

ʻI heʻemau vakai hifo kiate iá, ne mau maʻu kotoa ha ongo fakamāfana. Ne ʻikai toe ʻākilotoa ia ʻe he momoko ʻo e maté. Naʻá ne hā fakaʻofoʻofa. Naʻe faingofua ke fakakaukauloto atu ʻokú ne ʻi hēvani, ʻo ʻātakaiʻi ai ʻe kinautolu naʻá ne ʻofa aí, ʻi he loto-vēkeveke ke foki ki heʻene Tamai Hēvaní.

ʻI heʻeku mavahe mei he lokí, ne haʻu ki heʻeku fakakaukaú kuó u moʻui ʻi he taimi ʻo e moʻuí ne u lava ai ʻo tokangaʻi ʻeku faʻeé. Kuó ne kātaki ki he ngataʻangá. Kuó ne faivelenga ʻi he fakaʻau ke motuʻa angé mo tāpuekina hono hakó ʻo fakafou ʻi heʻene sīpingá. Ne u fakaʻamu mo lotua te u lava ʻo fakahoko ʻa e meʻa tatau peá u lava ʻi ha ʻaho ʻo tuku ʻa e tukufakaholo tatau maʻa hoku ngaahi ʻofefiné mo e makapuna fefiné.