2021
Ko e Palani ʻo e Fakamoʻuí mo e Falala ki he ʻEikí
Siulai 2021

Maʻá e Ngaahi Mātuʻá

Ko e Palani ʻo e Fakamoʻuí mo e Falala ki he ʻEikí

ʻĪmisi
mother sings and does actions with her children

Siʻi Ngaahi Mātuʻa,

ʻE lava ke mou fakaʻaongaʻi e ngaahi fakamatala ko ʻení mo hono ngaahi fakatātaá ke kamataʻi ha fealēleaʻaki mo homou fāmilí mo tokoni ke mahino kiate kinautolu e ngaahi tefito mahuʻinga hangē ko e palani ʻo e Fakamoʻuí, hisitōlia ʻo e Siasí pea mo e falala ki he ʻEikí.

Ngaahi Fealēleaʻaki ʻo e Ongoongoleleí

Palani ʻo e Fakamoʻuí

Fakaʻaongaʻi ʻa e “Ngaahi Tefitoʻi Meʻa Mahuʻinga ʻo e Ongoongoleleí” ʻi he peesi 6 ke akoʻi hoʻo fānaú fekauʻaki mo e palani ʻo e fakamoʻuí. Aleaʻi e founga ʻoku tāpuekina ai koe mo ho fāmilí ʻi hoʻomou ʻilo ki he palani ʻo e fakamoʻuí. ʻE lava ke tā ʻe he fānaú ha ngaahi fakatātā ʻo e palani ʻo e fakamoʻuí pea tuku ke nau takitaha fakamatalaʻi e konga kehekehe aí.

Ngaahi Tāpuaki ʻo Hono Ako e Hisitōlia ʻo e Siasí

ʻI hoʻomou lau e fakamatala ʻi he peesi 30, aleaʻi mo hoʻomo fānaú e founga ʻe lava ke nau maʻu ai ha fakamoʻoni ʻoku mālohi angé ʻo fakafou ʻi he ako lahi ange fekauʻaki mo e hisitōlia ʻo e Siasí. Ko e hā ha ngaahi talanoa pe aʻusia mei he hisitōlia ʻo e Siasí te ke lava ʻo vahevahe mo hoʻo fāmilí ke tokoni ke nau fehangahangai mo e ngaahi ʻahiʻahí ʻi he tui?

Falala ki he ʻEikí

Lau e aʻusia ʻa Brother Militoni Kamakoó ʻi he peesi 39. ʻI hoʻomo aleaʻi ia mo e fānaú, ʻe lava ke mo fehuʻi ange: Naʻe fakahaaʻi fēfē ʻe he faifekaú ʻene falala ki he ʻOtuá? ʻOkú ke fakahaaʻi fēfē hoʻo falala ki he ʻEikí? Ko e hā ha ngaahi founga kuo faitāpuekina ai koe ʻi hoʻo falala ki he ʻOtuá?

Ko Hono Tokangaekina ʻo e Ngaohikoviá

Fakaʻaongaʻi e ngaahi fakakaukau ʻi he fakamatala he peesi 20 ke ako fekauʻaki mo e founga ke ʻiloʻi ai ʻa e ngaohikoviá, fakaʻehiʻehi mei aí, mo akoʻi e fānaú he founga ke maluʻi ai kinautolú.

Fakafiefia ʻa e Ako Fakafāmilí

Te u Tataki Atu ʻa Kimoutolu

Tokāteline mo e Ngaahi Fuakava 78:17–18

ʻE tataki kitautolu ʻe he ʻEikí ʻi heʻetau fanongo kiate Ia ʻo fakafou ʻi Heʻene kau palōfitá. Ka ʻe malava pē ke fakafepaki mo fakatupu veiveiua e ngaahi pōpoaki ʻo e māmaní. Vaʻinga fakataha ko ha fāmili ʻi he foʻi keimi “Fakahoko ʻa ia ʻOku ou Fakahokó Kae ʻIkai ko ia ʻOku Ou Talaatú,” ʻo hangē ko hono fakamatalaʻi ʻi laló.

  1. Fili ha toko taha ke hoko ko e fai fakahinohinó.

  2. ʻE lea ʻaki ʻe he fai fakahinohinó ha meʻa ke fai ka ne fai ʻe ia ha meʻa kehe. Hangē ko ʻení, ʻe pehē ʻe he fai fakahinohinó, “Pasipasi,” ka ʻoku ala ia ki hono umá.

  3. ʻOku fie maʻu ke fakahoko ʻe he kau mēmipa ʻo e fāmilí ʻa e meʻa ʻoku fakahoko ʻe he fai fakahinohinó, kae ʻikai ko e meʻa ʻokú ne talaangé.

  4. Toe fakahoko pē ʻa e keimí, ʻo taufetongi ʻi he hoko ko e fai fakahinohinó.

Fealēleaʻaki: Naʻe faingataʻa kiate koe ke ke muimui he fai fakahinohinó? Taimi ʻe niʻihi ʻe malava ke fakatupu veiveiua e ngaahi fakahinohino ʻa e māmaní, ka ʻoku mahino e ngaahi fekau ʻa e ʻEikí. Ko e hā te tau lava ʻo fai ke fanongo ki he ʻEikí ʻi Heʻene tataki atu kitautolú?