ʻOku Talitali Lelei Kimoutolu ki he Makasini ko ʻEní
ʻE Lava ke tau Fakafehokotaki ki he Kāingalotu ʻo e Siasí ʻi he Kuohilí
Siosefa mo ʻEma pea mo e Pēpē ko ʻAlaviní, tā fakatātaaʻi ʻe Liz Lemon Swindle, ʻikai ngofua ke hiki tatau
ʻI heʻeku hoko ko ha tokotaha faʻu hisitōlia mo maʻu e Ngāue ʻo e ʻŪ Pepa ʻa Siosefa Sāmitá, ʻoku ou manako ʻi hono fakahoko ha ngaahi lea fakataha lotu mo fengāueʻaki mo e kāingalotu ʻo e Siasí fekauʻaki mo e hisitōlia ʻo e Siasí. ʻI heʻeku fakahoko mai ʻení, kuó u fakatokangaʻi ʻoku faingataʻa ki ha kakai ʻe niʻihi ke fakafehokotaki ki he Kāingalotu ʻi he kuohilí. ʻOku faʻa nofo taha e ngaahi fakatātā ʻo e niʻihi fakafoʻituitui ko ʻení ʻi heʻenau ngaahi ngāue maʻongoʻongá, ʻo hangē ne ʻikai pē ke nau fefaʻuhi kinautolu mo e loto-veiveiuá, mahakí pe siva ʻa e ʻamanakí.
Ka ne ʻikai toe kehe e Kāingalotu ʻo e Siasí ne moʻui ʻi he 1800 tupú meiate kitaua he ʻaho ní. Ne nau aʻusia ʻa e fiefiá mo e nekeneká, mamahí mo e faingataʻaʻiá—pea mo ha ngaahi ʻaho angamaheni pē. Kuó u ako lahi mei heʻenau ngaahi aʻusia fekauʻaki mo e founga ʻenau fefaʻuhi mo e tuʻunga fakaetangatá.
ʻOku ou fakatauange ʻi hoʻo ako e Tokāteline mo e Ngaahi Fuakavá ʻi he taʻu ní, ʻe tokoni ia ke ke ako fekauʻaki mo e founga ne fehangahangai ai e Kāingalotu ʻi he kuohilí mo e ngaahi faingataʻa ʻo e moʻuí. ʻOku ou ʻamanaki ange foki ʻe fakatupulaki ʻe heʻeku fakamatala fekauʻaki mo e founga ne fehangahangai ai ʻa Siosefa Sāmita mo e ngaahi faingataʻá, ʻa hoʻo tuí mo tokoni ke ke ʻilo te tau lava ʻo fakafehokotaki ki he ngaahi faingataʻa naʻá ne fouá (vakai, peesi 30). Naʻe kau ʻi he ngaahi faingataʻá ʻa ʻene fai feinga ke maʻu ha fakahinohino mei he ʻEikí ke ʻilo e founga ke tokoniʻi ai e Kāingalotu ne fakatangaʻi ʻi Mīsulí. ʻI hono tali ange ʻe he ʻEikí, naʻá Ne ʻoange ki he Palōfitá ha ueʻi fakalaumālie fakanonga: “Ke mou fakalongolongo pea ʻiloʻi ko e ʻOtuá au” (Tokāteline mo e Ngaahi Fuakava 101:16).
ʻOku lahi ha ngaahi meʻa te tau lava ʻo ako meiate kinautolu kuo nau moʻui he kuohilí—ʻo ʻikai ngata pē ʻi heʻenau ngaahi aʻusia fakaofó ka mei heʻenau moʻui līʻoa fakalongolongó foki.
Matthew C. Godfrey
Potungāue Hisitōlia ʻo e Siasí