Kakai Lalahi Kei Talavoú
Fehuʻi ʻe Tolu ʻo e Hisitōlia ʻo e Siasí Naʻe Tali ʻe ʻEletā mo Sisitā Lasipení
Mei ha polokalama Face to Face mo ʻEletā Lōnolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá mo hono uaifí, Sisitā Melanī Lasipeni, ʻi he ʻaho 13 ʻo Sepitema, 2020. Ke mamata kakato ʻi he fakataha lotú, ʻalu ki he facetoface.ChurchofJesusChrist.org.
ʻOku tau maʻu kotoa pē ha ngaahi fehuʻi ʻi ha ngaahi taimi ʻe niʻihi. Kae meʻa mālié, ʻoku tau maʻu ha kau ʻAposetolo ʻofa te nau lava ʻo tokoniʻi kitautolu ke maʻu ha ngaahi tali.
Naʻá ke ʻiloʻi fēfē ko Siosefa Sāmitá naʻe uiuiʻi moʻoni ia ʻe he ʻOtuá ke hoko ko ha palōfita ʻo hono Fakafoki Mai ʻo e Ongoongolelei ʻo Sīsū Kalaisí?
ʻEletā Lasipeni: ʻOku mau ʻiloʻi mahalo ʻe kehe e founga te ke maʻu ai ha ʻilo ki hoʻo fakamoʻoní mei haʻamautolú. Naʻe fanauʻi au ʻi ha fāmili lotu mo maʻu ʻeku fakamoʻoní ko ha talavou ʻa ia kuó u kei maʻu pē ʻo aʻu mai ki he ʻahó ni.
ʻOku ou fie vahevahe atu ha veesi folofola [ʻi hono maʻu ha fakamooni ki hono fakafoki mai ʻo e ongoongoleleí], ʻa ia ʻoku maʻu ʻi he vahe 46 ʻo e Tokāteline mo e Ngaahi Fuakavá, ʻoku talanoa ai fekauʻaki mo e ngaahi meʻa-foaki ʻo e Laumālié ʻa ia ʻe lava ke tau maʻú.
ʻOku ou fie ʻalu ki he veesi 13 mo e 14, ko e ongo veesi ia ʻoku talanoa fekauʻaki mo e meʻaʻofa ʻo e fakamoʻoní. Veesi 13: “ʻOku foaki ki he niʻihi ʻi he Laumālie Māʻoniʻoní ke nau ʻiloʻi ko Sīsū Kalaisí ko e ʻAlo ia ʻo e ʻOtuá, pea naʻe kalusefai ia koeʻuhi ko e ngaahi angahala ʻa e māmaní.” ʻOku ou loto ke mou ʻiloʻi ko e meʻa ia ʻokú ma ʻi ai mo hoku ʻofaʻangá. ʻOkú ma maʻu ha ngaahi fakamoʻoni ki he ʻEiki ko Sīsū Kalaisí ʻokú ne fakamāfanaʻi homa lotó, pea ʻokú ma ʻilo ko Ia homa Fakamoʻuí.
ʻOku fokotuʻu mai ʻe he veesi 14 ha meʻaʻofa ʻe taha, pea ʻoku ou fakamahinoʻi atu ko ha meʻaʻofa foki ia: “ʻOku foaki ki he niʻihi kehe ke nau tui ki heʻenau ngaahi leá, koeʻuhí ke nau lava foki ʻo maʻu ʻa e moʻui taʻengatá ʻo kapau te nau fai atu ai pē ʻi he faivelengá.” Ko ia ai, siʻoma ngaahi kaungāmeʻa kei talavou, ʻoku tau ʻi ha hala kehekehe kotoa ʻi he fakamoʻoni ko ia [ki he ongoongolelei kuo fakafoki maí]. ʻOku maʻu ʻe hotau niʻihi e ngaahi fakamoʻoni fakamāfana ko iá. ʻOku tui hatau niʻihi ki he fakamoʻoni ʻa e niʻihi kehé, pea ʻoku LELEI ia. ʻE lava ke ke tui ki hoʻo fakamoʻoní, pe te ke tui ki he fakamoʻoni hoʻo ngaahi kaungāmeʻá, mātuʻá, kau takí, mo hoʻo kau faiakó. ʻOku LELEI pē ke tali e fakamoʻoni ʻa e niʻihi kehé. Ko hono moʻoní, ko ha meʻaʻofa ke tau lava ʻo fakahoko ia. Ko ia ai, ko kimoutolu ʻoku mou ngāueʻi hoʻomou ngaahi fakamoʻoní, manatuʻi ko ha hala fononga ʻeni mo ha founga ngāue.
ʻI he fanongonongo ʻo hono Fakafoki Mai ʻo e Ongoongoleleí,1 ʻoku pehē ai, “ʻI heʻemau hoko ko ʻEne kau ʻAposetoló, ʻoku mau fakaafeʻi ʻa e kakai kotoa pē ke nau ʻilo—ʻo hangē ko ia ʻoku mau ʻiló—ʻoku fakaava mai ʻa e ngaahi langí.” Ko e hā e ʻuhinga ʻo e fakaafe ko ʻení kiate koe? Kapau ʻoku finangalo ʻa e ʻOtuá ke folofola mai kiate kitautolu, ko e hā ʻoku faingataʻa ai ke tau fanongo kiate Iá?
Sisitā Lasipeni: Sai, ʻoku ou pehē ʻoku ʻikai faingofua e lahi taha ʻo e ngaahi meʻa ʻoku feʻunga mo hono maʻu ʻi he moʻui ko ʻení, pea ʻoku ou pehē ʻi heʻetau fekumi ʻi he loto-fakatōkilalo mo lotu ke ako e founga ʻoku tau fanongo ai ki he Laumālie Māʻoniʻoní, ko ha meʻa mahuʻinga ia ki hono ako e founga ke fanongo ai kiate Iá. Angamahení ʻoku tau faʻa ongoʻi ha meʻa lelei. Taimi ʻe niʻihi te tau lava ʻo mamata ki ha meʻa. Taimi ʻe niʻihi ʻoku tau fanongo ki he ngaahi leá, pea tau maʻuhala ko ʻetau ngaahi fakakaukaú mo e ngaahi ongó pē ia ʻoku tau ongoʻí. ʻOku ou pehē ko ha meʻa mahuʻinga ia ʻetau lava ʻo ako e founga ke fanongo ai ki he Laumālie Māʻoniʻoní maʻau peé.
ʻOku ou fakaafeʻi kimoutolu takitaha ke mou sio fakamamaʻu, maʻu pē, ki he langí mo ha loto-hangamālie pea mo ha telinga fie fanongo ke ongoʻi Ia (vakai, 3 Nīfai 11:5).
ʻEletā Lasipeni: Kuó u maʻu e folofola ʻa e ʻEikí ʻi hono lau e ngaahi folofolá. Kapau ʻoku ou maʻu ha ngaahi palopalema ʻoku ou taʻefiemālie ai, pe hohaʻa ai, ʻi homau fāmilí, ʻi heʻeku ngāué, ʻi hoku fatongiá pe uiuiʻí, te u feinga fekumi fakatefito mo kumi ha meʻa ʻe ala tokoni, pea ʻe haʻu ha fakakaukau kiate au, ʻo hangē pē ʻoku ʻomi ʻe he ʻEikí ha fakahinohino pau kiate au ʻo fakafou ʻi Heʻene ngaahi lea māʻoniʻoni ʻi he folofolá.
Ko ia ʻe lava ke hoko ia ʻi ha ngaahi founga lahi. Te mou maʻu kotoa ha ngaahi founga fakataautaha. ʻOku ʻAfioʻi Koe ʻe he Tamai Hēvaní ʻOkú Ne ʻofa ʻiate koe. Ko ʻEne fānau ʻa kimoutolu, pea ʻe fakahoko atu ʻEne talí ʻi ha ngaahi founga ʻoku angamaheni pe totonu kiate koe.
Ko e hā e konga ʻokú ke manako taha ai ʻi hono Fakafoki Mai ʻo e Ongoongoleleí pe ko e ʻUluaki Mata Meʻa-Hā-Maí? Ko e hā ha ngaahi moʻoni ʻokú ke houngaʻia taha ai ʻa ia ne hoko ko ha ola ʻo ha meʻa ne hoko?
Sisitā Lasipeni: Kiate aú, ʻoku faingofua pē ia. ʻI he taimi ne hā mai ai ʻa e ʻOtua ko e Tamaí kia Siosefá mo ui ia ʻaki hono hingoa ʻo pehē, “Siosefa, ko hoku ʻAlo ʻOfaʻangá ʻEni. Fanongo Kiate Ia!” ne tupulaki ai ʻeku fakamoʻoní ʻoku ʻafioʻi ʻe he ʻOtua ko e Tamaí pea mo e ʻAló e tokotaha takitaha ʻo kitautolu. ʻOkú Na ʻofa ʻiate kitautolu. Pea kapau te tau fanongo ki he ʻAló, te tau ako ha ngaahi founga [ʻo e Tamaí] mo ako e founga ke maʻu ai ʻa e moʻui taʻengatá.
ʻEletā Lasipeni: Ko e konga ʻo hono Fakafoki Mai ʻo e Ongoongoleleí ʻoku ou mataʻikoloa ʻakí ko e hoko ʻa Siosefa Sāmita ko ha talavou taʻu 14 ʻi he taimi naʻá ne ʻalu ai ki he vao ʻakaú tupu mei heʻene lau e folofolá, ke fehuʻi ki heʻene Tamai Hēvaní ʻi ha lotu fakatōkilao. Ko hono moʻoní ʻoku hoko ʻa Siosefa Sāmita ko ha sīpinga kiate kitautolu ʻi he meʻá ni: naʻá ne maʻu ha fehuʻi kuó ne fefaʻuhi mo ia ʻi ha taimi fuoloa, peá ne fakahoko ʻene fehuʻí ki he Tamai Hēvaní, mo ʻamanaki te ne maʻu ha tali, pea naʻá ne maʻu ia.