Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko Hono Tāpuekina ʻEku Ngaahi Kuí.
ʻI heʻeku maʻu hoku tāpuaki fakapēteliaké, naʻe fonu hoku lotó ʻi he ʻofa ki heʻeku ngaahi kuí.
Laʻitā meia Richard M. Romney
Naʻe fāʻeleʻi au ʻi Kameloni, ko e fonua ʻo ʻeku ngaahi kuí. Ne u hiki leva ki Falanisē, ʻa ia ne u nofo, ako mo ngāue ai ko ha neesi ʻi ha ngaahi falemahaki kehekehe ʻi Pālesi. ʻOku ou nofo ʻeni ʻi Monitolio, ʻa ia ʻoku ou kei ngāue pē ai ko ha neesi.
Kuó u fekumi ki he Siasi moʻoni ʻo Sīsū Kalaisí ʻi ha ngaahi taʻu lahi. ʻI heʻeku fetaulaki mo e kau faifekaú ʻi Pālesí, naʻe fakamoʻoniʻi mai ʻe he Laumālie Māʻoniʻoní kuo faifai peá u maʻu ʻa e meʻa ne u fekumi ki aí—ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ne u mātuʻaki fiefia ʻaupito ʻo u pehē ai kuó u ʻi hēvani. Ne u fakapapauʻi ke moʻui ʻaki e ongoongoleleí ki hono kakato tahá.
Naʻe akoʻi au ke u fekumi ki heʻeku ngaahi kuí pea ke fakahoko ha ngaahi ouau maʻanautolu ʻi he temipalé. ʻI heʻeku maʻu hoku tāpuaki fakapēteliaké, naʻe talamai ai te u hoko ko ha faifakamoʻui ʻi he Moʻunga ko Saioné mo ʻomi ʻa e fakamoʻuí ki hoku fāmilí. ʻOku fonu hoku lotó ʻi he ʻofa kiate kinautolu; he ʻikai lava ke u tukunoaʻi kinautolu. Talu mei ai, kuó u ngāue māteaki ʻi he hisitōlia fakafāmilí mo e tohi hohokó.
Kuó u ʻiloʻi maʻu pē naʻe fāʻeleʻi au ki ha fāmili houʻeiki ʻi Kameloni, ko e fāmili Pamauní. Ne pehē ʻe he talatukufakaholó mo e talatupuʻá ne omi e kakai ko ʻení mei ʻAsīlia ʻo feohi mo ha kakai kehe lolotonga ʻenau hikifonuá. Kuo nau tauhi ʻenau tohi hohokó mo hiki honau hisitōlia talu mei he 1300 AD. ʻOku ʻi he laipeli ʻo e palasi fakatuʻí ʻa e ngaahi tohi ko iá. ʻI he kotoa ʻo e ngaahi hisitōlia kehé, ʻoku nau fakamatala ai ki he talanoa ʻo e kui tangata ʻeku faʻeé ko Foni Kouhoua, ʻa ia ne pule mei he 1818 ki he 1863.
Naʻe lava ke u foki ki hoku fonuá, pea ʻi heʻeku hoko ko ha mēmipa ʻo e fāmili Pamauní, ne u lava ai ʻo sio ki he ngaahi tohi ko ʻení. Ne u ʻaʻahi foki ki he tuí, fetaulaki mo ha kau ʻōfisa fakapuleʻanga kehe, mo talanoa ki ha kau maʻu mafai fekauʻaki mo e Siasí mo ʻenau tokanga ki he hisitōlia fakafāmilí. ʻOku ou houngaʻia ai, fakamālō ki he ongoongolelei kuo fakafoki maí, ʻoku ou lava ʻo fakahoko ʻeku ngāué ke tāpuekina hoku fonuá mo ʻeku ngaahi kuí.