ʻOku Talitali Lelei Kimoutolu ki he Makasini ko ʻEní
Ngaahi Kamataʻangá mo e Fuakava Motuʻá
Christ and the Creation, [Ko Kalaisi mo e Fakatupú],tā ʻe Robert T. Barrett
Ko e kamataʻanga ʻo ha taʻu foʻoú, ʻoku hangē ko ha taimi feʻunga moʻoni ia ke fakakaukau ai ki he ngaahi kamataʻangá.
ʻI he taʻu ní, ʻe taki kitautolu ʻe he Fuakava Motuʻá mo e Mataʻitofe Mahuʻingá ke tau vakaiʻi ha niʻihi ʻo e ngaahi kamataʻanga mahuʻinga mo fakaofo taha kuo ʻiloʻi ʻe he faʻahinga ʻo e tangatá.
Te tau lava ʻo ʻilo lelei ange ai kia Sīsū Kalaisi, ʻa ia naʻe ʻi he Tamaí “ʻi he kamataʻangá” (ʻĒpalahame 4:1). Te tau lava ʻo lau fekauʻaki mo hono Fakatupu ʻo e māmaní pea mo e kamataʻanga ʻo e moʻui fakamatelié. Te tau lava ʻo ako fekauʻaki mo e kamataʻanga ʻo e fakatomalá, ngaahi fāmilí, ngaahi fekaú, mo e moihū ʻi he temipalé ʻi he māmaní. Te tau lava ʻo ako ʻa e kamataʻanga ʻo e ngaahi fuakava toputapu ʻoku hokohoko atu ʻene lehilehiʻi ʻetau moʻuí he ʻaho ní.
Pea kapau ʻoku teʻeki ke tau saiʻia ʻi he Fuakava Motuʻá, ʻe lava ke fakaʻilongaʻi ʻe he ʻahó ni ʻa e kamataʻanga ʻo ha faʻahitaʻu foʻou ʻo e akó mo e fakatotoló. ʻI he peesi 12, ʻoku ou vahevahe ai ha ngaahi moʻoni naʻá ne tokoniʻi au ke u vēkeveke lahi ange ki he tohi folofola ko ʻení mo vakai ki hono ngaahi akonakí ʻaki ha ivi mo ha taumuʻa kuo fakafoʻou. ʻI he peesi 42, ʻoku lave ai ʻa Palesiteni Maʻake L. Peisi, ko e Palesiteni Lahi ʻo e Lautohi Faka-Sāpaté, ki he ngaahi tāpuaki fungani te tau lava ʻo maʻu kapau ʻoku tau loto fiemālie ke laukonga ʻi he “faʻa fifili mo e faʻa lotu.”
Kae mahulu haké, tau manatuʻi muʻa ʻoku malava ke hoko ha kamataʻanga foʻou ʻi hono kotoa ʻo e moʻuí koeʻuhí ko Sīsū Kalaisi. ʻI he fakamatala ʻa Kuenitini L. Kuki ʻi he peesi 6, ʻokú ne fakamoʻoni ai “ʻoku ʻikai teitei mole ʻa e meʻa kotoa pē” koeʻuhí he ʻoku mafao mai e toʻukupu hotau Fakamoʻuí ke talitali kitautolu. ʻOku tau lava ʻo hokohoko atu ʻi Heʻene ʻaloʻofá ʻa e fononga fakalaumālie naʻe kamata ʻe heʻetau ngaahi kui ʻi he kuonga muʻá ʻi he ngaahi taʻu lahi kuo hilí.
ʻOku ou fakatauange ʻe fonu ʻa e taʻú ni ʻi ha ngaahi kamataʻanga fakaʻofoʻofa maʻatautolu takitaha!
Marissa Widdison
Tokoni ʻĒtita Pule, Polokalama Gospel Living
“Ko au ko e Kamataʻangá mo e Ngataʻangá, ko e ʻOtua Māfimafí, naʻá ku fakatupu ʻa e ngaahi meʻá ni ʻi hoku ʻAlo pē Taha naʻe Fakatupú; ʻio, naʻá ku fakatupu ʻi he kamataʻangá ʻa e langí, pea mo e māmani ʻa ia ʻokú ke tuʻu aí.”
Ko e Fakatupu ʻe Sihova ʻa e Māmaní, tā fakatātaaʻi ʻe Walter Rane