Kakai Lalahi Kei Talavoú
Ngaahi Fakamanatu Faingofua ki Hono Kumi Ho Hala ʻi he Moʻuí
ʻE lava ke fakamafasia hono fakakaukauʻi e meʻa ʻokú ke fie fai ʻi he moʻuí. Kae meʻamālié, ʻoku ʻikai fie maʻu ke ke fakahoko tokotaha ia.
Tā fakatātā mei he Getty Images
Naʻe lauimiliona ha kakai ʻi he funga ʻo e māmaní naʻe mamata ʻi he televīsoné ʻi he fuofua lue ʻa e kau tangatá ʻi he māhiná. Naʻe kau ai ʻeku tangataʻeikí. Naʻe fakafokifā, ʻi heʻene ʻiloʻi pē ʻi hono taʻu fitú e meʻa naʻá ne loto ke fai ʻi heʻene moʻuí.
ʻI he taimi naʻá ne ʻilo ai naʻe tokolahi ha kau ako ʻalu vavā ne nau kamata ke hoko ko ha kau pailate fakakautaú, naʻá ne fakapapauʻi leva he taimi ko iá ʻa e meʻa naʻá ne fie maʻu ke fakatefito ai ʻene akó—ʻa ia ko ha ʻenisinia ki he ngaahi vaka ʻalu vavaá. Naʻe faifai peá ne hoko ko ha pailate fakakautau ʻi he Tautahi ʻa e ʻIunaiteti Siteití mo ʻene fakaʻānaua ke hoko ko ha tangata ʻalu vavā.
ʻI heʻeku kei tupu haké, ne u ongoʻi hangē ʻoku fie maʻu ke fokotuʻutuʻu lelei mo ʻeku moʻuí. Ka naʻe ʻikai fuʻu faingofua kiate au hono fili e meʻa naʻá ku fie faí. Naʻá ku ongoʻi hangē naʻe ʻikai ke u poto feʻunga, līʻoa feʻunga, pe loto-toʻa feʻunga ke fokotuʻu ha hala ki heʻeku moʻuí pea nofo maʻu ai. Ko hono moʻoní, ʻoku ou kei fefaʻuhi pē mo e meʻá ni he taimi ʻe niʻihi.
ʻI heʻeku matuʻotuʻa angé, kuó u ako ʻoku ongoʻi pehē pē mo ha kakai kei talavou tokolahi. ʻOku tokosiʻi pē ha kakai ʻoku nau ʻiloʻi kei siʻi e hala ke nau tulifua ki aí. Ko e tokolahi taha ʻo kitautolú ʻoku tau ʻiloʻi ia ʻi he faai atu ʻa e taimí. Pea ʻoku sai pē ia! Meʻamālié, ʻoku ʻikai fie maʻu ke tau fakahoko tokotaha ia. ʻOku ʻi ai ha tokoni maʻau.
Manatuʻi ʻa e Meʻa ʻOku Mahuʻinga Tahá
Naʻe fakatupu ʻe he ʻikai ke u fakapapauʻi e meʻa ne u fie fakahokó ʻeku faʻa ongoʻi taʻefiemālie. Naʻá ku ongoʻi ʻoku totonu ke u fakahoko ha meʻa kehe pe te u ʻi ha feituʻu kehe. Naʻá ku ongoʻi ʻo hangē ko ha meʻa pē ʻe taha naʻe finangalo ʻa e Tamai Hēvaní ke u faí, pea kapau he ʻikai ke u ʻiloʻi ia, ʻe mole hoku ngaahi faingamālie ki ʻitānití. Hangē ko ia ʻoku mou fakakaukau ki aí, naʻe fakatupu ʻe he meʻá ni ha loto-hohaʻa naʻe ʻikai totonu ke hoko ʻi heʻeku moʻuí!
Talu mei ai mo ʻeku ʻiloʻi kuo tāpuekina kitautolu takitaha ʻe he Tamai Hēvaní ʻaki ha ngaahi meʻafoaki fakalaumālie pea ʻoku lahi ha ngaahi meʻa lelei te tau lava ʻo fakahoko ke fakahōifua kiate Ia. ʻOku ʻikai fie maʻu ke tau hohaʻa ki hono kumi ʻa e hala pē ʻe taha ki heʻetau moʻuí. Kapau ʻoku tau moʻui ʻaki ʻa e ongoongoleleí mo fakahoko mo tauhi e ngaahi fuakava toputapú, te Ne tokoniʻi kitautolu ke tau fakahoko ʻa e lelei taha ʻo e tuʻunga ʻoku tau ʻi ai he taimi ní mo ʻiloʻi ʻa e founga ke tau fakalakalaka aí.
ʻOku Tātānaki ʻEtau Ngaahi Fili Īkí
ʻI heʻeku maʻu hoku tāpuaki fakapēteliaké, naʻe makehe ha konga ʻe taha kiate au—ko ha meʻa ʻoku kaunga kiate kitautolu kotoa. Naʻe fakamanatu mai kiate au ʻoku ʻikai ke maʻu e puleʻanga fakasilesitialé mei ha foʻi fai tuʻutuʻuni mahuʻinga pē ʻe taha pea ko ha foʻi ngāue maʻongoʻonga pē ʻe taha. ʻOku fakahoko ia ʻi he ngaahi fili—lalahi mo iiki—ʻoku tau fai he ʻaho takitaha, tautautefito ki heʻetau fili ke haʻu kia Sīsū Kalaisi mo moʻui ʻaki ʻEne ongoongoleleí.
ʻI heʻetau ngāue ʻi he tapa kotoa pē ʻo ʻetau moʻuí ʻi he tui ki he Tamai Hēvaní mo Sīsū Kalaisí, ʻoku tau fokotuʻu kitautolu ʻi ha tuʻunga ke tataki kitautolu. Te tau ʻiloʻi foki ko fē pē ha potu ʻokú Na tataki kitautolu ki aí, ko e feituʻu tonu pē ia ʻoku tau loto ke ʻi aí.
ʻE Iku Lelei e Meʻa Kotoa
ʻOku aʻu ki he ngaahi palani lelei tahá, ʻoku ʻikai pē ke faʻa hoko e ngaahi meʻa naʻa tau loto ke hokó. Naʻe ʻikai hoko e fakaʻamu ʻeku tangataʻeikí. Naʻe ʻikai ke ne hoko ko ha tangata ʻalu vavā, ka ko ia pē te ne fuofua talaatu naʻe tataki ia ʻe he ʻEikí ki he meʻa naʻe lelei taha kiate ia mo homau fāmilí.
ʻOku akoʻi kitautolu ʻe he folofolá ke tau “fekumi faivelenga, lotu maʻu ai pē, pea loto-tui, pea ʻe fengāueʻaki fakataha ʻa e ngaahi meʻa kotoa pē koeʻuhi ko [ʻetau] leleí” (Tokāteline mo e Ngaahi Fuakava 90:24). ʻOku ʻafioʻi ʻe he Tamai Hēvaní mo Sīsū Kalaisi ʻa e founga ʻoku fengāueʻaki fakataha ai ʻa e meʻa kotoa pē. ʻOkú Na ʻafioʻi foki ʻa e meʻa ʻoku lelei maʻatautolú he ʻokú Na ʻafioʻi mo ʻofa haohaoa ʻiate kitautolu.
ʻOku ʻikai ʻamanaki mai e Tamai Hēvaní mo Sīsū Kalaisi ke tau fakakaukauʻi toko taha pē ʻetau moʻuí. Kapau te tau falala kiate Kinaua pea tuku ke Na ʻaʻeva mo kitautolu ʻi he moʻui ko ʻení, ʻe poupouʻi kitautolu ke hokohoko atu mo tau fakahoko ha ngaahi fili ʻe tokoni ke tau fai ʻa e lelei tahá ʻi heʻetau moʻuí.