Fakaʻilekitulōnika Pē: Ngaahi ʻAta ʻo e Tuí
Ko ha Meʻaʻofa ʻo e Fakamoʻoní mo e ʻOfá
Naʻá ku manavasiʻi naʻa kuo ngata e fakamoʻoni ʻa Brother Bravenec ki he meʻa fakamūsiká, ka ne u fakatokangaʻi atu ʻene lue māmālie ki he ʻōkaní.
Faitaaʻi ʻe Carter Hydrick
“Lolotonga ʻemau maʻu e ngaahi fakaʻilongá ni,”1 ne kamata ke mau hiva. Ne u fakaʻamu ke vavevave ange ʻemau hivá, ka naʻá ku tokanga taha pē ki he ouaú.
Naʻá ku maʻu ha nonga, ʻo fakafiemālieʻi hoku lotó. Naʻe tonu moʻoni e ongo mo e tā ʻa e ʻōkaní ki hono teuteuʻi kimautolu ki he sākalamēnití.
Naʻá ku sio ʻi he loto houngaʻia ki heʻemau tā ʻōkaní ʻi heʻene feinga ke tā ʻi he loto ʻapasia ʻa e hivá. Naʻá ku fakakaukau ki heʻemau fuofua fakataha he taʻu ʻe valu kimuʻá. ʻI ha ngaahi māhina siʻi kimuʻa peá ma fetaulakí, naʻe fakaʻauha ʻe ha afi e ʻapi ʻo ʻEd Bravenec, mo e konga lahi e koloa hono fāmilí. ʻI heʻeku vahevahe mo e ongo faifekaú ha lēsoni ʻi he ongoongoleleí ʻi hono ʻapi fehikitaki foʻoú, naʻe talamai ʻe Brother Bravenec ʻoku poto he tā ʻōkaní.
Naʻá ne pehē, “ʻOku ou tā ʻōkaní ke fakahaaʻi ʻeku fakamoʻoní mo e ʻofa ki he ʻOtuá.” Naʻa mau talanoa leva naʻa lava ke ne tā e ʻōkaní kapau ʻe kau mai ki he Siasí.
Naʻá ku sio ki hono ngaahi louhiʻinimá. Naʻe ʻosi tuʻusi ha ongo louhiʻinima. Naʻe ueʻi fakalaumālie au ʻe heʻene tuí, ka naʻá ku fakakaukau pe te ne lava ʻo tā e ʻōkaní.
Naʻá ku pehē ange, “ʻOku ou ʻilo ʻe houngaʻia e Siasí ke ke vahevahe hoʻo ngaahi meʻafoakí.”
Naʻe fiemālie ʻa Brother Bravenec ki heʻeku talí, peá ma fiefia ʻi ha lēsoni lelei mo e kamataʻanga ʻo ha feohi fakakaungāmeʻa mālohi. Naʻe ʻikai fuoloa kuo papitaiso ia, pea hangē ko ʻene fakaʻamú, naʻá ne hoko ko e tokotaha tā ʻōkani homau uōtí.
Ne u fakatokangaʻi ʻi ha ngaahi taʻu hili hono papitaisó, ʻene fefaʻuhi mo e ngaahi faingataʻa fakaemoʻui leleí ʻo tuʻusi ai e taha hono louhiʻi vaʻé. Ne ʻikai fuoloa mei ai, kuo maʻu ʻa Sisitā Bravenec ʻe he kanisaá stage 4, ʻa ia naʻe toe mālohi ʻi he Siasí ʻi he taimi naʻe mēmipa ai hono husepānití. Naʻe toe tuʻusi mo ha louhiʻi vaʻe ʻe taha ʻo Brother Bravenec.
Naʻá ma ʻofa kiate ia ʻi ha ngaahi uike siʻi ʻi heʻene nofo ʻo tokangaʻi hono uaifí mo fefaʻuhi mo hono faingataʻaʻiá. Ka naʻe ʻikai fuoloa mei ai naʻá ne foki ki he lotú, ʻo vahevahe ʻene fakamoʻoní ʻi he ongo fakaʻofoʻofa ʻo e ʻōkaní.
ʻI he 2019, naʻe ʻilo ai ʻe Brother Bravenec ʻe tuʻusi hano vaʻe ʻe taha. Naʻá ku fakaʻofaʻia ʻiate ia, ʻo fakakaukau ko ʻene ngata ia haʻane toe lava ʻo tā e ʻōkaní. Ka ʻi ha ngaahi uike siʻi hili ʻa e tafá, naʻe ketu mai ʻa Brother Bravenec ki he lotú ʻaki hono vaʻe loi foʻoú.
ʻI heʻene fakaʻaongaʻi e tokotokó ke potupotutatau ʻene lué, naʻá ne lue māmālie ki he ʻōkaní. Naʻá ne tangutu ki he sea ʻo e ʻōkaní, ʻo toʻo hono veʻe loí, pea kamata tā ʻa e ngaahi fasi talitalí. Hili ha ngaahi miniti siʻi mei ai, naʻá ne tā ʻa e fua himí. Ko e taimi leva ʻeni ki he sākalamēnití.
ʻI he huafa “ʻo Sīsuú’ pea koeʻuhí foki ko ia,” naʻa mau hivaʻi—e fasí mo e tō ʻo e hivá ʻo tonu ʻaupito.