ʻOku Talitali Lelei Kimoutolu ki he Makasini ko ʻEní
Hoko ʻo Lelei Ange kae ʻIkai Loto-mamahi
ʻI heʻetau hoko ko e fānau ʻa e ʻOtuá ʻi he feituʻu maomaonganoa ko ʻeni ʻi he māmaní, ʻoku tau faʻa fai ha ngaahi fehalaaki, fili taʻe fakapotopoto, mo ongoʻi lōmekina ʻi he veiveiuá mo e loto-foʻí. Naʻe ʻafioʻi ʻe heʻetau Tamai ʻofá ʻe hanga ʻe hotau ngaahi ʻaho faingataʻaʻiá ʻo fakaleleiʻi kitautolu mo fakatupu ke tau tafoki kiate Ia ke maʻu ha fakatonutonu, fakahinohino, mo ha fehokotaki fakalangi.
ʻOku kau ʻi he palani ʻo e fiefia ʻa e ʻOtuá ʻa e ngaahi fuakava ʻokú ne fakamālohia mo haʻi kitautolu kiate Iá. ʻI hono fakaʻaongaʻi ʻo e sīpinga ʻo ha tuongaʻane mo ha tuofefine faivelengá, ʻoku akoʻi kitautolu ʻe Niila L. ʻEnitaseni ki he ʻuhinga ʻo e hoko ko ha kakai ʻo e fuakavá (vakai, peesi 6).
ʻI heʻeku ako mo fai ha ngaahi fakamatala ki he fiefiá, loto-vilitakí, mo e tupulaki ʻa e ngaahi fāmilí, kuó u lava ai ʻo vakai lelei ange ki he founga ʻoku kau moʻoni ai ʻa e ʻOtuá ʻi he ngaahi fakaikiiki ʻo ʻetau moʻuí. ʻI he peesi 16, ʻoku ou vahevahe ai ha pōpoaki ʻoku kau ai ha kupuʻi lea ʻe fā ʻa ia kuo tokoni ke ʻomi ha ʻamanaki lelei mo ha fakakaukau ʻi he taimi ʻoku hangē ai kuo mole ʻa e meʻa kotoa pē.
Ko e ʻuhinga ʻoku maʻu ai ʻa e melinó ʻi he hala ʻo e fuakavá he ʻoku fakatau fakahangatonu ʻa e hala fāsiʻi mo lausiʻi ko ʻení ki he Pilinisi ʻo e Melinó, ʻa Sīsū Kalaisi. Ko Ia ʻa e halá. Pea ʻoku fakaiku ʻEne foungá ki he “melino ʻi māmani pea mo e moʻui taʻengata ʻi he maama ka hoko maí” (Tokāteline mo e Ngaahi Fuakava 59:23).
Tuʻa ʻofa atu,
David Schramm
Tokoni Palōfesa ki he Fakalakalaka ʻa e Tangatá mo e Ngaahi Ako Fakafāmilí, ʻUnivēsiti ʻo e Siteiti ʻIutaá
“Ka te u fokotuʻu maʻu mo koe ʻeku fuakavá; pea te ke haʻu ki he vaká, ʻa koe, mo ho ngaahi fohá, mo ho ʻunohó, mo e ngaahi ʻunoho ʻo ho ngaahi fohá mo koe.”
Sēnesi 6:18
Ko e Fanga Manú he ʻAʻake ʻa Noá, Tā ʻe Jacob Bassano