Ngaahi Tefitoʻi Meʻa Mahuʻinga ʻo e Ongoongoleleí
ʻOku Fakafehokotaki Kitautolu ʻe he Ngaahi Fuakavá mo e ʻOtuá
ʻOku ʻomi ʻe hono fakahoko mo tauhi ʻo e ngaahi fuakavá ʻa e ngaahi tāpuakí.
Glory in Degrees [Nāunaú ʻi honau Ngaahi Tuʻungá], tā ʻe Annie Henrie Nader
Ko e fuakavá ko ha palōmesi ʻi he vahaʻa ʻo e Tamai Hēvaní mo ʻEne fānaú. ʻOkú Ne fokotuʻu ʻa e ngaahi makatuʻunga ki he ngaahi fuakava ʻoku tau fai mo Iá. ʻI he taimi ʻoku tau fai ai ʻa e meʻa ʻokú Ne kole maí, ʻoku tau maʻu ha ngaahi tāpuaki lahi. Pea ʻoku ʻikai ke tau maʻu pē ʻa e ngaahi tāpuaki ʻi he māmaní—ʻi heʻetau fakahoko mo tauhi e ngaahi fuakavá, te tau toe foki ai ʻi ha ʻaho ʻo nofo fakataha mo e ʻOtuá mo hotau ngaahi fāmilí ʻi hēvani.
Ngaahi Fuakavá mo e Ngaahi Ouaú
ʻOku tau fai ha ngaahi fuakava lolotonga ha ngaahi ouau pau. ʻOku fie maʻu ke tau maʻu ʻa e ngaahi ouau ko iá pea talangofua ki he ngaahi fuakava ko iá kae lava ke tau foki ʻo nofo mo e ʻOtuá. ʻOku fakahoko ʻa e ngaahi ouaú ʻi he mafai ʻo e lakanga fakataulaʻeikí. ʻOku kau ʻi he ngaahi ouau ko iá ʻa e papitaiso mo e hilifakinimá, maʻu ʻo e Lakanga Taulaʻeiki Faka-Melekisētekí (maʻá e houʻeiki tangatá), pea mo e ngaahi ouau ʻoku tau maʻu ʻi he temipalé. Lolotonga ʻo e sākalamēnití, ʻoku fakafoʻou ʻe he kāingalotu ʻo e Siasí ʻa e ngaahi palōmesi ne nau fakahoko ki he ʻOtuá (vakai, Tokāteline mo e Ngaahi Fuakava 20:77, 79).
ʻOku Tokoniʻi Kitautolu ʻe he Ngaahi Fuakavá ke Tau Moʻui Angatonu
Lolotonga ʻo e papitaisó, ʻoku tau palōmesi ai ke muimui ʻia Sīsū Kalaisi, manatu maʻu ai pē kiate Ia, mo tauhi e ngaahi fekaú (vakai, Tokāteline mo e Ngaahi Fuakava 20:37). ʻOku talaʻofa mai ʻa e ʻOtuá ʻe ʻiate kitautolu maʻu ai pē ʻa e Laumālie Māʻoniʻoní.
ʻI he taimi ʻoku maʻu ai ʻe he houʻeiki tangatá ʻa e lakanga fakataulaʻeikí, ʻoku nau palōmesi ai te nau moʻui taau mo e mālohi ʻo e lakanga fakataulaʻeiki ʻo e ʻOtuá. ʻOku talaʻofa ʻa e ʻOtuá ke tāpuakiʻi kinautolu. (Vakai, Tokāteline mo e Ngaahi Fuakava 84:33–40.)
Ngaahi Fuakava ʻOku Tau Fakahoko ʻi he Temipalé
Tā fakatātaaʻi ʻo e Temipale Recife Brazil ʻe James Porter
ʻI he taimi ʻoku maʻu ai ʻe he kāingalotu ʻo e Siasí honau ʻenitaumení ʻi he temipalé, ʻoku nau palōmesi ai te nau moʻui angatonu mo feilaulau maʻá e ongoongoleleí. ʻOku talaʻofa mai kiate kinautolu ha mālohi mei he ʻOtuá (vakai, Tokāteline mo e Ngaahi Fuakava 38:32; 109:22).
Lolotonga ʻo e sila ʻi he temipalé, ʻoku mali ai ha husepāniti mo ha uaifi ki ʻitāniti pea palōmesi te na fetauhiʻaki faivelenga ʻiate kinaua pea ki he ʻOtuá. ʻOku talaʻofa mai ʻa e ʻOtuá te na lava ʻo toe foki kiate Ia pea moʻui ko ha ngaahi fāmili ʻo taʻe ngata. (Vakai, Tokāteline mo e Ngaahi Fuakava 132:19–20.)
Ko ha Kakai Kitautolu ʻo e Fuakavá
Ko kinautolu ʻoku kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku nau hoko ko e kakai fuakava ʻa e ʻOtuá. ʻOku nau maʻu foki e ngaahi tāpuaki mo e ngaahi fatongia ʻo e fuakava faka-ʻĒpalahamé (vakai, Kalētia 3:27–29). ʻOku ʻuhinga ʻetau kau ki he kakai fuakava ʻa e ʻOtuá, ke tau fetokoniʻaki ʻi heʻetau ʻunu ʻo ofi ange kia Kalaisí. ʻOku toe ʻuhinga foki ia ke tau ngāue ke fakamālohia ʻa e Siasi ʻo e ʻOtuá ʻi he māmaní. ʻI he taimi ʻoku tau tauhi ai ʻetau ngaahi fuakavá, te tau lava ʻo maʻu ʻa e mālohi mo e ivi mei he ʻOtuá.