Ko e Fuakava Faka-ʻĒpalahamé

Naʻe talaʻofa ʻa e ʻOtuá kia ʻĒpalahame “ko kinautolu kotoa pē ʻe tali ʻa e Ongoongolelei ko ʻení ʻe ui ʻa kinautolu … ko ho hako” (ʻĒpalahame 2:10). ʻOku fakaʻatā ʻe heʻetau ngaahi fuakava ʻi he papitaisó mo e temipalé ke tau lava ʻo maʻu ʻa e ngaahi tāpuaki ʻo e fuakava faka-ʻĒpalahamé mo ʻai ke tau hoko ko ha konga ʻo e kakai fuakava ʻa e ʻOtuá, ʻo kapau te tau faivelenga (vakai, ʻIsikeli 11:20).

Ko hai ʻa ʻĒpalahame mo Selá?

ʻĪmisi

Abraham and Sarah

Tā fakatātaaʻi ʻo ʻĒpalahame mo Sela, tā ʻe Dilleen Marsh

Ko ʻĒpalahame mo Sela ko ha ongo muimui faivelenga ʻo e ʻOtuá ʻa ia naʻá na moʻui ʻi he 2000 BC nai. Naʻe lahi hona ngaahi faingataʻaʻiá, ka koeʻuhí naʻe fekumi ʻa ʻĒpalahame ki he lakanga fakataulaʻeikí mo e “ngaahi tāpuaki ʻa e ngaahi tamaí” (ʻĒpalahame 1:2), naʻe fai ʻe he ʻOtuá ha fuakava mo ia pea talaʻofa ange ʻe hokohoko atu ʻa e fuakavá ʻo fakafou ʻi he ngaahi hako ʻo ʻĒpalahame mo Selá. Naʻe tāpuekina ʻa ʻĒpalahame mo Sela ʻi heʻena faivelengá.

Ko e hā e meʻa ʻoku kau ʻi he fuakava faka-ʻĒpalahamé?

Ngaahi Tāpuaki Kuo Talaʻofa Maí

Ko ha fonua ʻo e talaʻofá ke nofo ai (vakai, Sēnesi 13:14–15).
Hako tokolahi “ke tatau mo e ngaahi fetuʻu ʻo e langí” (Sēnesi 22:17).
Ko e ongoongolelei ʻo Sīsū Kalaisí mo e lakanga fakataulaʻeikí (vakai, Sēnesi 17:7; ʻĒpalahame 2:9–11).

Ngaahi Fatongiá

ʻOmi ʻa e kakato ʻo e ongoongolelei ʻo Sīsū Kalaisí ki he kotoa ʻo e fānau ʻa e ʻOtuá koeʻuhí ke “tāpuekina ʻa e ngaahi faʻahinga kotoa pē ʻo e māmaní” (ʻĒpalahame 2:11; vakai foki, Sēnesi 22:18).
Talangofua ki he ngaahi fekau ʻa e ʻOtuá (vakai, Sēnesi 18:19).