“Malumalu: O Se Penina Tau Tele,” Liahona, Iulai 2022.
E Faafeiloai atu i Lenei Lomiga
Malumalu: O Se Penina Tau Tele
Ata pue o le Malumalu o Brigham City i Iuta
O se faamanuiaga ina a matagofie le vaaia o malumalu o fausia i se saoasaoa faateleina i le lalolagi atoa (tagai i le itulau 12). Matou te olioli faatasi ma tagata o le Ekalesia a o faapaiaina malumalu fou i o latou eria.
Matou te faamoemoe o le a faatauaina e tagata uma le malumalu ma e le pauu atu i se mea sese na faamatalaina e Peresitene Boyd K. Packer (1924–2015), Peresitene o le Korama a Aposetolo e Toasefululua. I lana faataoto i le penina ma le atigipusa, sa ia faamatala ai sa faia e se tagata faiseevae se pusa matagofie e faaali atu ai se penina tau tele. Peitai, ina ua o mai tagata e vaai i le penina, sa latou faamemelo i le atigipusa. (Tagai “The Cloven Tongues of Fire,” Ensign, May 2000, 7; Liahona, July 2000, 7.)
Ioe, o le penina tau tele i totonu o le malumalu e aofia ai sauniga, feagaiga, ma faamanuiaga folafolaina e na o totonu lava o le malumalu e mafai ona tatou maua ai. E pei ona aoao mai Elder David A. Bednar o le Korama a Aposetolo e Toasefululua i le lomiga lenei: “O mea uma ua aoaoina ma mea uma e faia i malumalu o aso e gata ai ua faamamafa mai ai le fuafuaga sili o le fiafia a le Tama Faalelagi, le paia o Iesu Keriso, ma Lana matafaioi i le avea ai ma o tatou Faaola. O feagaiga e mauaina ma sauniga e faatinoina i totonu o malumalu e taua i le faapaiaina o o tatou loto ma mo le faaeaga mulimuli o atalii ma afafine o le Atua” (itulau 6).
A o e faitau i le tusiga a Elder Bednar ma molimau a tagata o le ekalesia o loo mulimuli mai ai (itulau 8), matou te valaaulia oe ia manatua feagaiga na e osia i le malumalu. Afai ua fai si umi talu ona e auai i le malumalu, matou te valaaulia oe e toe foi mai ma toe lagonaina le olioli ma le filemu o loo maua i le maota o le Alii. Afai e te lei alu lava i le malumalu, matou te valaaulia oe e saunia oe lava ina ia “faaeeina i le mana mai luga” (Mataupu Faavae ma Feagaiga 38:32).
Elder Kevin R. Duncan
O Le Fitugafulu
Pule Faatonusili o le Matagaluega o le Malumalu