Ua Na’o Tusiga Faatekinolosi: Autalavou Matutua
Aoao e uiga i le Uiga o le Ositaulaga o se Tagata Liliu Mai
Sa ou lagona e tatau ona ou lafoaia le tele o mea ina ia auai ai i le Ekalesia. Ae sa ou iloaina afai e i ai se tasi e malamalama i le ositaulaga, o Iesu Keriso lea.
A o ou laitiiti, sa ou alapo i le aluga o le vaiaso, ma o le Aso Sa sa na o le pau lea o le aso o le a tuu mai ai e lo‘u tina ou te moe umi ai—o lona uiga, seia oo ina fafagu a’u e le aulotu Kerisiano i le tuaoi i a latou pesepesega leotetele, talaiga, ma fetagisiga foi i nisi o taimi. E faavalevalea, ae ona o lo‘u le fiafia i le faaala i luga i vaiaso taitasi, sa ou manatu ai o Kerisiano e le manaia.
Sa ou iloaina mulimuli ane e toatele tagata o aulotu Kerisiano na foai atu o latou taimi ma e oo lava i tupe i la latou ekalesia. Sa le mafai ona ou malamalama pe aisea.
Ona o nei matauga e lua e uiga i ekalesia Kerisiano i lo‘u taulaga i Initia—faatasi ai ma le mea moni e faapea o lo’u aiga ma a’u e le o ni Kerisiano—sa itiiti so‘u fiafia e aoao atili e uiga i le faaKerisiano.
Mauaina o Iesu Keriso
I le taimi o lo‘u tausaga faaiu i le iunivesite, sa valaaulia ai a’u e la‘u uo ou te auai i lana lotu faatasi ma ia. Sa ou musu ae na iu lava ina ou ioe i ai.
A o ou saofai ai i le sauniga, usu viiga ma faalogologo i savali e uiga ia Iesu Keriso, sa ou lagonaina se mea e ese—sa ou lagonaina le filemu. Sa ou auai mo ni nai vaiaso ma lagonaina le auala lava lea e tasi i taimi taitasi. Ae ioe, sa na ona ou asiasi atu; Ou te lei fia auai moni lava.
I se taimi ina ua ou le toe auai atu i le lotu ma la‘u uo, sa amata ona ou lagonaina e pei ua leai se mea i lo’u olaga. Sa ou misia le filemu sa ou lagonaina i le lotu faatasi ma la‘u uo. Sa ou maua se lagona malosi e tatau ona ou aoao atili e uiga ia Iesu Keriso, o lea sa ou filifili ai e feiloai ma faifeautalai mai le lotu a la’u uo. Ou te lei mafaufau lava po o le a se manatu o lo‘u aiga.
Feagai ma Faafitauli
Ina ua ou feiloai i faifeautalai, sa amata ona suia lo‘u olaga. Sa ou aoao e uiga i le Toefuataiga ma le Tusi a Mamona, ma sa fesoasoani faifeautalai e tali a’u fesili e tele.
I se tasi aso sa ou tau ai i se mau na faapea mai, “Soo se mea tou te ole mai ai i le faatuatua, … o le a outou mauaina” (Enosa 1:15), ma sa ou iloa sa le na o a’u. Sa ou lagonaina e pei na malamalama le Atua i lo‘u tulaga ma manao e faamafanafana ia te a’u. Ina ua ou iloa le alofa o le Atua mo a’u, sa ou manao ia avea ma se tagata e sili atu ona lelei. Sa ou manao e avea faapei o le Faaola ma se tasi O Le Ekalesia a Iesu Keriso o le Au Paia o Aso e Gata Ai.
Ae a o tuputupu ae la‘u molimau, sa ou fetaiai foi ma mea faalavefau. Ina ua iloa e lo‘u tina ua ou mafaufau e papatiso, sa ia fai mai ia te a’u e tatau ona ou alu ese mai le fale ma motusia uma fesootaiga ma ia. Ma ina ua ou faasoa atu upumoni e uiga i le Faaola i luga o ala o faasalalauga faaagafesootai, e toatele uo ma tagata o lo‘u aiga lautele na polokaina a’u savali ma lē toe talanoa mai ia te a‘u.
Sa ou lagonaina e pei ua fai mai ou te filifili i le va o lo‘u aiga ma le talalelei—o se faaiuga sa [ou] lagonaina le faigata. Sa ou ositaulagaina le tele o mea sa ou fiafia i ai ina ia auai ai i le Ekalesia. Ae sa ou iloaina afai e malamalama se tasi i le ositaulaga, o Iesu Keriso lea (tagai Alema 34:8–16).
Ma o lea sa ou taumafai ai pea e faalatalata atili atu i le Faaola. Ou te tuua foi le fale i le tuneva o le po e tatalo ma faitau le Tusi a Mamona ina ia mafai ona ou aloese mai le le fiafia o lo’u aiga. E ala i le tatalo ma le faatuatua, na iu lava ina ou filifili e tusa lava po o le a le mea na tupu, o le a ou filifilia le talalelei. O le olioli ma le faamoemoega na ou maua i le talalelei sa silisili lava lona taua ia te a’u.
Gauai Atu, Ae Le o le Fiu
O le auai i le Ekalesia o se osigataulaga tele lea mo a’u. O le auauna atu i o‘u valaauga, totogiina o sefuluai, ma le taumafai e faatumauina sootaga sa faigata i nisi o taimi. Ae e pei o na aulotu Kerisiano i lo‘u taulaga o e na foai fua atu i o latou faatuatuaga, ou te iloa o a’u osigataulaga e sili atu nai lo mea ou te lafoaia.
Sa faamalamalama mai e Epikopo L. Todd Budge, Fesoasoani Lua o le Au Epikopo Pulefaamalumalu: “A oo ina vaavaai atu i a tatou osigataulaga mo isi mai le vaaiga o le “lafoai ese,” e mafai ona tatou vaai atu i ai o se avega mamafa ma oo ai ina lotovaivai pe a lē amana’iaina a tatou osigataulaga pe tauia. Peitai, pe a tilotilo atu i ai mai le vaaiga o le “gauai atu i” le Alii, o a tatou osigataulaga mo isi e avea o ni meaalofa, ma o le olioli o le foai atu ma le agalelei e avea ma ona lava taui.”1
E silafia ma faamanuiaina i tatou e le Tama Faalelagi mo osigataulaga tatou te faia mo Ia. Ua ou vaaia lenei mea i lo’u olaga a o ou mauaina le alofa ma le lagolago a tagata o la’u uarota, lagonaina le filemu ma le mafanafana mai le Agaga, ma maua aafiaga o vavega i lo’u olaga. O se tasi o vavega o le ala ua faamaluluina ai loto o o‘u matua ia te a’u ma ua mafai ai ona matou faatumauina se sootaga lelei.
Ua ou iloa nei o ai le Tama Faalelagi ma Iesu Keriso ma lo La alolofa tele ia i tatou taitoatasi. E mafai ona ou lagonaina lo‘u avea atili e faapei o le Faaola, o lo tatou faataitaiga tupito lea, a o ou faia ni osigataulaga e tausia a’u feagaiga. A o tatou taumafai e auauna atu ia i Laua i soo se tulaga tatou te mafaia, ou te iloa o le a taialaina i tatou ma maua le tele o faamanuiaga matagofie ua La teuina mo i tatou.