O se Meafaigaluega i Aao o le Alii

Pe tusa ma le tasi le tausaga talu ai, na maua ai e lo‘u toalua o Alessandra, se feau tusitusia i lana telefoni mai se tuafafine i le matou uarota i Pasila. Ua silia ma le lua tausaga talu mai le taimi mulimuli sa la feiloai ai. Sa tusia e lenei tuafafine: “I se tasi o aso sili ona leaga o lou olaga, ou te le iloa pe na faapefea ona ou oo i le lotu. Ina ua ou faia, na e vaai ia te au. Sa e uuina lo‘u lima ma fai mai ou te nofo i ou tafatafa. Sa ou talanoa atu ia te oe. Sa e faalogo ma fautuaina au.

Sa foliga mai o se talanoaga faigofie lenei i lena taimi. Ae na iu ina avea o se avanoa mo lo‘u toalua e avea ai o se meafaigaluega i aao o le Alii. Sa ia auauna atu i lena tuafafine pele sa feagai ma se taimi faigata. Sa lei mafaufau moni i ai Alessandra. Sa na ona ia lagonaina lava o le uunaiga e faalogo ma ofo atu le faamafanafanaga, ma sa ia faatinoina le uunaiga. I le taimi nei, ua silia ma le lua tausaga mulimuli ane, sa ia mauaina lenei feau tusitusia mai lena tuafafine, ma faailoa atu lona agaga faafetai.

E ala i nei mea na tutupu ua ou aoaoina ai tatou te le manaomia se valaauga e avea ma se meafaigaluega i aao o le Alii. Pau lava le mea tatou te manaomia o le i ai o le manao. “O le mea lea, afai o ia te outou le manao e auauna atu i le Atua ua valaauina outou i le galuega” (Mataupu Faavae ma Feagaiga 4:3).

I le Feagaiga Tuai tatou te faitau ai e uiga i se isi tagata na auauna atu o se meafaigaluega i aao o le Atua. O Eseta o se tamaitai talavou na maliliu ona matua a o laitiiti lava. Sa tausia o ia e lona tausoga o Moretekai.

Ina ua uma ona tatala le faaipoipoga a le Tupu o Asueru ma le Masiofo o Vasati, sa ia filifilia Eseta e avea ma ana masiofo fou. “Ua sili foi le manao o le tupu ia Eseta i fafine uma, ua sili foi ona alofaina ma faapelepeleina o ia” (Eseta 2:17). O Eseta o se tagata Iutaia, ae sa lei iloa e le tupu.

O Hamanu, o se tasi o faufautua a le tupu, sa siitia e nofo i luga a‘e o aloalii uma sa faatasi ma ia (tagai Eseta 3:1). Ma sa ia taupulepule “e faaumatia, e fasioti, ma faia ia fano, o tagata Iutaia uma, o e laiti ma matutua” (Eseta 3:13).

Ina ua iloa e Eseta e uiga i le taupulepulega a Hamanu, sa uunaia e Moretekai ia Eseta e talanoa atu i le tupu. O le faia o lea mea na matua lamatia ai o ia, ae sa ia maua le lototele mai upu a Moretekai. Sa ia faailoa atu, “E iloa foi e ai po ua fai oe ma masiofo ona o se aso faapenei?” (Eseta 4:14).

“Afai ou te fano, o le a ou fano,” sa ia fai atu ai (Eseta 4:16) ma alu atu i le tupu e aunoa ma le samania. O se solitulafono lenei e faasalaina i le oti. Ona o lona toa, sa mafai ai e Eseta ona faatosinaina le tupu. O le taunuuga, sa ia tuuina atu se poloaiga e faasaoina tagata Iutaia. I lea faaaliga, sa ia “tuuina atu ai i tagata Iutaia sa i ai i aai uma e faapotopoto faatasi i latou lava, ma tutu atu mo lo latou ola” (Eseta 8:11).

Sa naunau Eseta e avea ma se meafaigaluega i aao o le Alii. O lona olaga o le usiusitai ma le tuuto na saunia ai o ia. Pe a ou mafaufau e uiga i lona alu atu i le maota i totonu o le tupu e aunoa ma se valaaulia, ou te maofa i lona lototele. E faamanatu mai ai ia te au le valaaulia a Peresitene Russell M. Nelson ia i tatou uma ina ia faamuamua le Atua i o tatou olaga.¹ Sa naunau Eseta e faamuamua le Atua.

O le tausoga o Eseta o Moretekai o se meafaigaluega foi i aao o le Alii. Sa ia tausia lelei Eseta. Sa ia tuuina atu ia te ia le lagolago, lototele, ma musumusuga. E tofu i tatou uma ma se matafaioi e faatino, ma o matafaioi taitasi e tutusa lava le taua ma le aoga.

Sa tuu e le Alii Eseta i totonu o le maota o le tupu mo se faamoemoega—e laveai ai tagata Iutaia. E pei lava ona sa Ia faia ia Eseta, ua tuuina i tatou e le Alii i le mea e mafai ona tatou fesoasoani ai e faataunuu Ona faamoemoega. Mo lenei mafuaaga, e tatau ai ona tatou saunia ma agavaa pe a tatou feagai ma avanoa ua Ia tuuina mai.

O avanoa e avea ai ma meafaigaluega i aao o le Alii o loo siomia ai i tatou uma. O lo tatou tiutetauave o le saunia lea e faatino. E tele taimi tatou te le iloa ai po o afea po o le a foi le auala o le a tuuina atu ai na avanoa. E manaomia ona tatou ola agavaa mo le mafutaga a le Agaga Paia ma ia i ai se loto naunautai. Ona taiala lea o i tatou e le Alii e fai le mea e finagalo o Ia tatou te faia.

I le Mataupu Faavae ma Feagaiga 35:3, ua ta‘u mai e le Alii ia Sini Rikitone, “Ua ou vaai atu ia te oe ma au galuega. Ua Ou faalogo i au tatalo, ma saunia oe mo se galuega tele.”

E silafia i tatou e le Alii ma i ai se galuega mo i tatou taitoatasi e fai. O nisi taimi o se galuega e na o i tatou lava e mafai ona faia. O lenei galuega e mafai ona i ai i le aiga a o fesoasoani matua i se atalii po o se afafine o loo tauivi. Pe e mafai foi ona i ai i totonu o o tatou tiutetauave faale-Ekalesia. O le mea moni, e mafai ona i ai i soo se taimi, i soo se mea, ma faatasi ai ma soo se tasi.

Na saunoa mai Dieter F. Uchtdorf, a o avea ma Fesoasoani Lua i le Au Peresitene Sili: “Na tuuina atu e le Alii ia te oe ou tiutetauave mo se mafuaaga. Atonu e i ai ni tagata ma ni loto ua na o oe lava e mafai ona aapa atu ma pai atu, Atonu e leai se isi e mafai ona faia i le ala lava e tasi.”²

“A o tatou mulimulitai i faataitaiga atoatoa [a le Faaola], o le a mafai ai la ona avea o tatou lima ma Ona aao; o tatou mata, ma Ona fofoga; o tatou loto, ma Lona finagalo”³

E pei o Eseta, Moretekai, Elder Fetzer, lo‘u toalua, ma le toatele o isi, e mafai ona avea uma i tatou ma meafaigaluega i aao o le Alii.