Sa Tausia e le Alii Lana Folafolaga

Ata

o mataua o le suauu o loo pau i totonu o se pesini

E lua masina talu ona valaauina au o se fesoasoani i le au peresitene o le matou siteki, ae leai sa‘u galuega. Sa ou popole i le auala o le a ou tausia ai lo‘u toalua ma le ma fanau e toalua.

A o ou saili mo se galuega fou, sa ou tuuto atu a‘u lava i lo’u valaauga, lea na tuuina mai ai ia te a‘u le tele o avanoa e auauna atu ai i o’u uso ma tuafafine. O le mea moni, sa ou pisi tele i lo‘u valaauga lea na mafaufau ai lo’u toalua pe i ai se isi tagata i le siteki e mafai ona faia nisi o o‘u tofiga.

I se tasi po timuga a o lei faia le afiafi faaleaiga, sa tatagi ai le telefoni. Sa manaomia e se uso gasegase tele i le siteki se faamanuiaga, ma sa talosagaina au ou te alu e vaai o ia. O le taimi lava lena, sa ou faia ai ni fuafuaga ia i ai sa‘u uo ma te o faatasi.

Ina ua ma taunuu, sa vave ona ou iloaina le uso sa gasegase ma sa [ou] faafetai mo le telefoni mai. I ni nai aso na muamua atu, sa faatalanoaina ai o ia mo se valaauga o le siteki. Ina ua uma ona ma faauuina ma faamanuia o ia, sa ma fai atu ia te ia o le a ma toe foi ifo mulimuli ane e siaki o ia.

Sa ou taunuu i le fale i le leva o le po ma le susu, ae sa i ai lava le taimi mo se lesona puupuu o le afiafi faaleaiga. Sa tonu ia i maua e matamata se vitio e uiga ia Elia ma le fafine Sarefata ua oti lana tane.

A o sauni le fafine ua oti lana tane e kuka se tausamiga itiiti mulimuli mo ia ma lana tama tama, sa fai atu Elia ia te ia, “Ia muamua ona fai mo a‘u se keke itiiti, ma aumai ia te a’u, ma a uma ona fai mo oe ma lou atalii.” Mo lona usiusitai, “o le paelo o le meaai [sa] lei maimauina, e lei iu foi i le fagu, seia oo i le aso na [auina mai ai] e le Alii le timu i luga o le fogaeleele” (1 Tupu 17:13–14).

O upu a Elia “Ia muamua … fai mo a‘u” sa tuia ai lo’u loto. Faatasi ai ma loimata i o‘u mata, sa ou fai atu i lo’u toalua, “O le mea lena! Muamua, e tatau ona tatou faia mea uma ua poloai mai ai le Alii, ma a uma, o le a oo mai faamanuiaga.”

E pei lava o le faataunuuina o le folafolaga a Elia i le fafine ua oti lana tane, o a tatou meaai ma suauu sa “le maimauina” a o le’i i ai sa’u galuega. Sa silafia e le Alii o matou tulaga faigata tautupe, ma sa Ia faamanuiaina i matou. O le taeao lava na sosoo ai ina ua uma le matou afiafi faaleaiga, sa ofoina mai ai ia te au se galuega.

Ou te molimau atu e tausia e le Alii Ana folafolaga. Ona o lenei aafiaga, ua tele ai lo‘u faatuatua, e faapena foi lo’u lotofaafetai ia te Ia.