Pe Ua Ou Tuai Tele e Auauna Atu i se Misiona?

Ata

Faifeautalai o loo savavali atu agai i lalo o se auala

I le faauu ai mai le aoga maualuga, sa ou filifili ai e siitia atu i Iuta, ISA, lea na faamautu ai ou uso matutua e toalua ina ua foi mai a la misiona. Sa amata a laua lava kamupani faufale ma tuuina mai ia te a’u le avanoa e galue ai mo i laua a o ou taumafai e fuafua le mea sa ou manao e fai i lo’u olaga.

Sa la taumafai uma e tauanau a‘u e auauna atu i se misiona. Sa ou lagonaina i taimi uma le uunaiga e auauna atu i se misiona ae sa le mafai ona ou saunia. Nai lo le faia o sauniuniga talafeagai e auauna atu ai i se misiona, sa ou filifili e auauna atu i se isi tulaga. I le 20 o o‘u tausaga, sa ou auai atu ai o se foma’i i le Vaegaau a le IS.

E ui lava i lo‘u auai atu i le vaegaau, o le uunaiga e auauna atu i se misiona e lei aluese lava. A o ou ulufale atu i le tausaga mulimuli o lo‘u auai, sa ou mafaufau loloto po o le a le isi mea na sosoo ai.

“Pe ou te toe auai? Pe ou te faamaeaina ea la’u tikeri? Pe ou te alu ma faia ni suiga talafeagai i lo’u olaga, salamo, ma saunia e auauna atu i se misiona? E tusa lava pe ou te manao e auauna atu, pe ua ou matua tele ea?” O nisi nei o fesili na oo mai i lo‘u mafaufau.

A o ou mafaufau pe auauna atu i se misiona, sa ou malosi lo’u lagona o loo i ai tagata o loo faatalitali mai mo a’u e valaaulia i latou e o mai ia Keriso. O lenei uunaiga o se faatosinaga lea mo la‘u filifiliga e saunia e auauna atu i se misiona. Sa ou filifili e tusa lava pe na o sina avanoa itiiti e mafai ai ona ou auauna atu i se misiona i lo‘u matua, e tatau lava ona ou taumafai.

Ou te manatu mo le toatele o faifeautalai faaolioli, o le tele o lagona ma le mana o le Agaga Paia e taia ai i latou i le tatalaina ma le faitauina o o latou valaauga faamisiona. Ae peitai, mo a’u, na tupu lena mea i le aso na faailoa mai ai ia te a’u o loo o’u agavaa pea e talosaga e auauna atu i se misiona.

A o ou salamo ma saunia a‘u lava e auauna atu, sa ou lagonaina se agaga faafetai tele i lo’u Faaola, o Iesu Keriso, ma lo‘u Tama Faalelagi. Sa ou lagona le pei na La fusi mai o Laua lima ia te a’u ma fai mai: “Maua te faamagalo atu ia te oe. Ma te taliaina lou salamo ma suiga ua e faia ma le tagata ua avea ai oe. Ua e agavaa e auauna atu.” Sa ou lagona le manumalo.

Na i’u lava ina ou maua lo‘u valaauga e auauna atu i le Misiona a Filipaina Aai o Quezon.

O le ulufale atu i le nofoaga autu mo le aoaoina o faifeautalai i le 25 o ona tausaga o se aafiaga tulaga ese. O le toatele o isi faifeautalai sa laiti tele. E toatele na faauu talu ai nei mai le aoga maualuga pe na faamaeaina lo latou tausaga muamua i le kolisi. E toatele na faatoa i ai i se aafiaga muamua o le o atu ese ai mai o latou fale ma aiga. A o a’u, faatoa uma ona ou faaaluina le fa tausaga i le Vaegaau a le IS ma ua uma ona ou oo i le tele o osigataulaga ma fetuunaiga lea ua na o le a fetaiai ma isi faifeautalai. O lo‘u aafiaga na tuuina mai ai ia te a’u le avanoa e faaitiitia ai lo‘u taulai atu ia te a’u lava ma faalautele i le tuuina atu o le tigaalofa ma le faamalosiauga i isi. O lo‘u matua ma lo’u poto masani na aumaia ai foi ia te a‘u se malamalamaaga i le taua o le taimi ma tuuina mai ai le uunaiga e auauna atu ma le taulaiga, faamoemoega, ma le filiga.

O la‘u misiona o le a avea pea ma se tasi o aafiaga aupito sili ona taua o—ma mo—lo’u olaga. Sa faamautuina ma faamauina ai lo‘u faavae na fausia i luga o le papa o lo’u Togiola (tagai Helamana 5:12). Ou te matuai faafetai lava ona sa ou maua le avanoa e auauna atu ai.

Ou te molimau atu e te lei matua tele lava e aumaia agaga ia Keriso—pe o se faifeautalai faamisiona po o se uo ma se tuaoi. E talia e le Alii a tatou taumafaiga uma e auauna atu ia te Ia—i soo se vaitausaga.