O le Vaai atu i Faamanuiaga o le Malumalu ua Loa ona Faatalitali

Ata

Johan ma Linda Buysse

Sa matuai faateia lava i le taimi na matou faalogo ai ia Peresitene Nelson o faasilasila mai o le a i ai se malumalu i Brussels, Peleseuma. Sa ma pulefaamalumalu ma lo‘u toalua i le Misiona a Peleseuma/Netherlands, ma e masani ona ma galulue i le Malumalu o Hague Netherlands, lea e lua itula mai lo matou fale i Peleseuma. O le taimi nei o le a na o le tasi le itula o le a tatou tietie ai pe itiiti foi e faimalaga atu ai i le malumalu i Brussels.

Ina ua faalogo i le faasilasilaga, sa tafe ifo loimata mai o matou mata ona o le loloto o le lotofaafetai sa matou lagonaina. Ua atiina ae e o matou aiga ma tagata o la matou siteki se lagona faatupulaia o le faapaiaga ma le alofa agai i le malumalu mai na’o le faasilasilaga. Ua molimau mai lenei faasilasilaga o le malumalu ia i tatou e silafia e le Alii lo tatou atunuu laitiiti ma o loo silafia le galuega ma osigataulaga a paionia anamua ma o loo i ai nei i lenei eria.

Johan Buysse ma Linda Buysse-Vergauwen, Uarota a St Niklaas, Siteki a Antwerp Peleseuma

Ata

Claudio González

E ese le manaia o le vaaia o le auala o loo faatelevaveina ai e le Faaola Lana galuega i loto ma mafaufau o Au Paia o Aso e Gata Ai. Tatou te mananao ia saunia i vaega uma ina ia mafai ona tatou faia mea e finagalo ai le Alii mai ia i tatou pe a faapaiaina ma faagaoioia le Malumalu o Antofagasta Chile.

E musuia i matou e a matou fanau ma tagata talavou i lo latou naunautai ma le olioli e auauna atu i le malumalu. Ua uma ona latou vaai faalemafaufau ia i latou lava o agai i luma. O loo latou aoaoina le uiga o le faapotopotoina o Isaraelu, o i latou o se vaega taua o lenei faapotopotoga, ma le taua tele o le i ai o se maota o le Alii e latalata tele atu i o latou lava fale.

Ata

Ata o le Malumalu o Antofagasta Chile

E toatele le Au Paia i Chile i matu ua faatulagaina lelei o latou olaga, ma le malamalama o le a faatalitali le Togiola mo i latou ma aao mafola i Lona maota paia. Latou te mananao e avea ma se vaega o le faamanuiaga sili o le i ai o se malumalu i Antofagasta. Faatasi ai ma lo‘u toalua, o Patyta, o loo ma sauniuni foi ina ia mafai e le Alii ona faalagolago mai ia i ma’ua e auauna atu i lenei galuega o le faapotopotoina lea ma te alolofa tele i ai.

Claudio González, Uarota a Angamos, Siteki a Antofagasta Chile

Ata

Richard Kok Leong Ho ma Chan Min Lian

O Tesema 2018 o le taimi mulimuli lea na mafai ai ona matou asiasi atu i le Malumalu o Taipei Taiuani o se aiga a o lei tuuina e le faama‘i pipisi o le KOVITI-19 se tapuiā’iga i femalagaaiga ma taitai atu ai i le tapunia o malumalu. Matou te tulimatai atu ma le naunautaiga tele ina ia mafai ona toe foi vave atu e tapuai i le maota o le Alii.

Ina ua fofogaina mai se malumalu i Sigapoa, sa matou fiafia uma lava. Ua silafia e le Tama Faalelagi le Au Paia i Meleisia. Mo le tele o tausaga, sa taumafai ai le Au Paia i le Itu o Kuala Lumpa e galulue agai atu i le avea ma se siteki. O le tele o taimi, sa foliga mai ua fai si mamao ese o lenei sini, ae sa lei taofia lava lo matou talanoa e uiga i le avea ma se siteki. O le faasilasilaga o se malumalu i Sigapoa ua faaali mai ai ia i tatou e silafia e le Alii taumafaiga a le Au Paia i Meleisia.

Richard Kok Leong Ho ma Chan Min Lian, Paranesi a Petaling Jaya, Itu o Kuala Lumpa Meleisia

Ata

Mandy Swinburne ma lona tama teine

Ua i ai le matou malumalu fou matagofie i Durban, Aferika i Saute, ua tuuina mai ai ia i tatou le avanoa e “tutu ai i nofoaga paia, ma … aua le masii ese” (Mataupu Faavae ma Feagaiga 45:32). O iina, e mafai ai ona tatou aveesea se taimi mai tauiviga ma le malomaloā o le lalolagi e faalogo ma lagona leo filemu ma le itiiti o le Agaga Paia.

Ata

Malumalu o Durban Aferika i Saute

O le malumalu o se nofoaga lea e mafai ona tatou faaopoopo soo ai mataua o le suauu i a tatou lamepa ina ia susulu atili atu, ma mafai ai ona tatou saunia atili mo le aso o le Alii.

Mandy Swinburne (ata ma lana tama teine), Uarota a Hillcrest, Siteki a Hillcrest Aferika i Saute

Ata

Yvon ma Madeline Basil

I le avea ai ma se peresitene o le siteki, sa matuai lofituina lava au ina ua faasilasila mai e Peresitene Russell M. Nelson le malumalu. Sa ou lagonaina le filemu, olioli, ma le faamoemoe mo lo‘u aiga, uo, ma uso a tagata o le siteki, faapea foi ma le toatele o isi e mafai foi ona maua faamanuiaga mai le i ai o se maota o le Alii i lo matou itulagi.

Faatasi ai ma le talafou o le malumalu i a tatou matafaga, ua tatou oo ai i suiga o le loto. O loo taumafai tagata o le ekalesia e tausi ia poloaiga ma fono e le aunoa ma taitai o le Ekalesia ina ia saunia ai i latou lava mo sauniga ma faamanuiaga o le malumalu. O le toatele o tagata o le ekalesia o loo tuuto atu i latou lava i galuega o talafaasolopito o aiga.

O se faamanuiaga moni lava e le gata mo tagata o le Ekalesia ae mo le atunuu atoa.

Yvon Basil, Uarota 2 a Port Vila, Siteki a Port Vila Vanuatu

Ata

Anaclea Whiting

O le toe savali atu i totonu o le Malumalu o Mesa Arisona ina ua mavae se faafouga faaumiumi o se taimi o le a le vave ona galo ia te au. Sa faamanatu mai e le fale tatala ia te au o le i ai i totonu o le malumalu o se aso fiafia. E oo mai le olaga i se taulaiga sili atu ona manino; o le atuatuvale ma le mamafatu ia te a‘u ua faigofie mo sina taimi. E mafai ai ona ou aveina se malologa filemu e lagona ai le filemu ma le vaaiga ua ofoina mai e lo tatou Tama oi le Lagi.

Faatasi ai ma ni afafine se toalima, ou te lagonaina se lagona o le naunautai e aoao i latou e uiga i isi mea uma e mafai ona maua e ala i auaunaga faamaoni i le malumalu. O le aveina o i latou i totonu o lenei nofoaga paia i le taimi o le fale tatala na latou maua ai se avanoa e maua ai sina vaaiga o mea o loo umia e le malumalu mo i latou. Na faaosofia ai le tele o talanoaga anoa e uiga i le saunia e ulu atu i le malumalu, pepa faataga o le malumalu, tulaga faatonuina, faatuatua, galuega o talafaasolopito o aiga, feagaiga, sauniga, agalelei, faaaliga, ma isi mea faapena.

Ua faamanuiaina o tatou olaga ma ua faamalolosia a tatou molimau mai le avanoa e ulu atu ai i le maota o le Alii. O le taimi lava na maua ai, sa ou alu ai ma le naunautai e faatulaga lo‘u taimi faatulagaina muamua ina ua uma le faapaiaga. Faatasi ai ma igoa o o‘u tuaa, ua ou sauni!

Anaclea Whiting, Uarota a Lindsay, Siteki a Mesa Arisona Hermosa Vista

Ata

Isabel Bueno de Almeida ma lana tane

Ua matou fiafia lava i le toe tatalaina o le malumalu o Campinas, lea na tapunia ona o le faama‘i pipisi o le KOVITI-19. Sa toe tatalaina le malumalu i le taimi tonu lava mo i maua e faamanatu ai lo ma 20 tausaga. Sa matou fiafia i lenei meaalofa faapitoa mai le Alii.

Ata

Malumalu o Campinas Pasila

Ou te molimau atu o le malumalu o le maota o le Alii—o se nofoaga e tumu i le alofa, vavega, filemu, ma le faamalologa. O le Atua o lo tatou Tama Faalelagi moni lava ma o loo faatalitali mai ia i tatou ma le olioli i Lona maota paia ina ia mafai ona tatou lagonaina Lona afioaga ma maua ai le malosi e manumalo ai i le lalolagi.

Isabel Bueno de Almeida, Uarota a Sumaré, Siteki a Sumaré Pasila