Ia Maua le Lototele e Aapa Atu ai

O le a faaaoga i tatou e le Atua e faia ai se eseesega pe afai o le a tatou faatoilaloina le fefe.

Ata

alii e toalua o loo talanoa ma ataata

I le avea ai ma tagata talitonu, tatou te manaomia tele le lototele i nei taimi, e oo lava i o tatou aafiaga i le auaunaga. O Ioane (ua suia igoa) sa tofia e auauna atu ia Peteru, o se tagata e lei auai lava i sauniga a le uarota. Sa popole Ioane e uiga i le latalata atu ia Peteru, talu ai na te lei feiloai ia te ia ma na te lei iloaina lana tala. Ae o le manatuaina o le fautuaga ia “alofa, faasoa atu, ma valaaulia,” sa tatalo ai Ioane mo le taitaiga ona alu atu ai lea e muamua avea ma se uo faamaoni ma Peteru. Sa ia faaaluina le taimi e faamasani ai ia Peteru, faatasi ai ma asiasiga faisoo, valaau i telefoni, ma se tafaoga mai lea taimi i lea taimi mo le malutaeao. Sa faasolo ina iloa lelei e Ioane ia Peteru, ma sa maua e Peteru le faatuatuaina o le la faigauo. Ina ua ia manaomia le fesoasoani, o se mea masani mo ia le aapa atu ia Ioane, o le sa tali fiafia atu.

I se tasi aso, sa lagona e Ioane le faagaeetia atonu ua saunia Peteru mo se valaaulia e toe foi mai i le lotu. I se tasi o a la asiasiga, sa ia aumaia ai le manatu i se auala masani. Sa tu Peteru. “Ou te lei alu i le lotu i le 17 tausaga,” o lana tala lea. “Ae e te iloa, ou te manatu o le a ou faia.” Ina ua taunuu atu Peteru i le uarota, sa i ai Ioane iina e faafeiloai o ia ma nonofo faatasi ma ia. Sa lagona e Ioane le lotofaafetai sa mafai ona ia faatoilaloina lona fefe muamua. E ala i nei taumafaiga, na maua ai e nei alii uma se faigauo moni lea na faamanuiaina ai o laua olaga.

Ia Maua le Lototele Fou

Ata

O Eseta i luma o le tupu

O Eseta i luma o le Tupu, saunia e Minerva Teichert

O le tala o le Feagaiga Tuai ia Eseta (tagai Eseta 1–10) o loo aoao mai ai le tele o mataupu faavae ae atonu e sili ona lauiloa o se tala o le lototele. O Eseta o se tamaitai talavou lava i Iutaia ina ua filifilia o ia o se masiofo ma faaalia le lototele tele ina ua ia lamatiaina lona ola e laveai lona nuu.

E ala i le taufaasese, sa faaseseina ai le tupu i le tuuina atu o se poloaiga ia fasiotia tagata Iutaia uma o le malo. Sa mafaufau Eseta i se fuafuaga na manaomia ai le faatuatua tele ma atonu ua na o le pau lea o le avanoa e suia ai le mafaufau o le tupu.

I le tu masani o lana aganuu, o le faalatalata atu i le tupu e aunoa ma le valaauliaina e mafai ona tua i le oti. Ae sa ia agai atu ma le lototoa i lana fuafuaga ma fai atu i lona nuu e anapopogi faatasi ma ia (tagai Eseta 4:16).. E ala i ana faatinoga lototele ma amioga a isi, sa mafai ai ona ia faatalitonuina le tupu e suia lana poloaiga. Sa taliina tatalo a Eseta ma lona nuu.

E mafai ona tatou vaai atu ia Eseta o se faataitaiga o le lototele, e oo lava i le auaunaga, a o tatou tuuese lo tatou fefefe ia iloa se tasi ma fesoasoani ia i latou i o latou luitau.

Mataupu Faavae e Mafaufau i Ai

O le a se mea e mafai ona tatou faia pe a tatou i ai i fafo atu o la tatou sone mafanafana pe a auauna atu?

Sa tatalo Ioane mo le taitaiga a le Atua. Faatasi ai ma le fesoasoani a le Atua, e mafai ai ona tatou faatoilaloina le fefe (tagai Salamo 34:4).
E mafai foi ona tatou tatalo ia lagonaina le alofa o le Alii mo isi. “O le alofa atoatoa e faateaeseina ai le fefe” (1 Ioane 4:18).
E pei o Eseta, e mafai ona tatou faaaogaina le anapogi ma le tatalo e faamalosia ai lo tatou faatuatua e galulue ai (tagai Eseta 4:3).
E mafai ona tatou faatuatua o loo i ai le mana i le tausiga o a tatou feagaiga (tagai Mataupu Faavae ma Feagaiga 110:9). O le ola ai i a tatou feagaiga e mafai ai ona tatou maua Lana fesoasoani.
E mafai ona tatou faamalosia lo tatou faatuatua e ala i le anapogi ma le loto i folafolaga a le Alii ia i tatou. Mafaufau i folafolaga o i nei fuaiupu: Teuteronome 31:6; Isaia 41:10; 2 Timoteo 1:7; Mataupu Faavae ma Feagaiga 6:33.

O Le a se Mea e Mafai ona Tatou Faia?

Ia maua le lototele e aapa atu ai. Pe o le iloaina o se tasi pe valaaulia i latou e faia se mea e mafai ona faamanuiaina ai o latou olaga, o le a fesoasoani le Atua ia te oe.