“Tusitusiga Paia: O Le Afioga a le Atua,” Liahona, Iulai 2022.
Aoaoga Autu o le Talalelei
Tusitusiga Paia: O Le Afioga a le Atua
Perofeta o le Feagaiga Tuai, saunia e Judith A. Mehr
O tusitusiga paia o tusi paia ia na matele lava ina tusia e perofeta. E molimau mai tusitusiga paia e uiga ia Iesu Keriso ma aoao mai e uiga i Lana talalelei. O tusitusiga paia aloaia a le Ekalesia o le Tusi Paia (lea e aofia ai le Feagaiga Tuai ma le Feagaiga Fou), o le Tusi a Mamona, o le Mataupu Faavae ma Feagaiga, ma le Penina Tau Tele.
Feagaiga Tuai
O le Feagaiga Tuai o se faamaumauga o feutagaiga a le Atua ma Ona tagata o le feagaiga i aso anamua. O loo aofia ai aoaoga a perofeta e pei o Mose, Iosua, Isaia, Ieremia, ma Tanielu. E ui ina sa tusia i le faitau selau o tausaga a o lei soifua mai Iesu Keriso, ae e toatele perofeta o le Feagaiga Tuai na tusitusi e uiga ia te Ia.
Feagaiga Fou
O le Feagaiga Fou ua faamauina ai le fanau mai, galuega faaletino, ma le Togiola a Iesu Keriso. O loo aofia ai foi aoaoga a Aposetolo a Keriso ma isi soo. Ua fesoasoani le Feagaiga Fou ia i tatou ia malamalama i le ala e ola ai i le talalelei a Iesu Keriso i aso nei.
O le Tusi a Mamona: O Se Tasi Molimau ia Iesu Keriso
O le Tusi a Mamona o se faamaumauga o nisi o tagata sa nonofo i Amerika anamua. O loo aofia ai aoaoga mai perofeta, ma o lona faamoemoega autu o le faatalitonuina lea o tagata uma o Iesu o le Keriso. Sa faaliliuina e le Perofeta o Iosefa Samita mai papatusi auro e ala i le meaalofa ma le mana o le Atua.
Mataupu Faavae ma Feagaiga
O le Mataupu Faavae ma Feagaiga o loo i ai faaaliga na tuuina atu ia Iosefa Samita ma isi perofeta o aso e gata ai. O loo faamatala mai i faaaliga le ala e faatulagaina ai le Ekalesia a Keriso. O loo i ai foi aoaoga taua o le talalelei e uiga i le perisitua, o sauniga o le talalelei, ma mea e tutupu pe a mavae lenei olaga.
Penina Tau Tele
O le Penina Tau Tele o loo aofia ai tusi a Mose ma Aperaamo, o le molimau a Iosefa Samita, ma Mataupu Faavae o le Faatuatua a le Ekalesia. O loo aofia ai foi Iosefa Samita—Mataio, o le vaega o le faaliliuga a Iosefa Samita o le Feagaiga Fou.
O Le Suesueina o Tusitusiga Paia
Ua aoaoina i tatou e perofeta ina ia suesue i tusitusiga paia i aso taitasi. O le faia o lena mea e fesoasoani ia i tatou e faateleina ai lo tatou faatuatua ma latalata atili atu ai i le Tama Faalelagi ma Iesu Keriso. A o tatou suesue ma le agaga tatalo i tusitusiga paia, o le a fesoasoani mai le Agaga Paia ia i tatou ia maua tali i a tatou fesili.
Perofeta o Aso Nei
Pe a saunoa perofeta ma aposetolo i aso nei e ala i le mana o le Agaga Paia, o a latou upu e pei o tusitusiga paia. O se tasi o faataitaiga o lenei mea o le konafesi aoao. E mafai ona tatou suesue i aoaoga mai le konafesi i lomiga o Me ma Novema o le Liahona.