“Sa Ou Tauaveina Oe,” Liahona, Iulai 2022.
O Leo o le Au Paia o Aso e Gata Ai
Sa Ou Tauaveina Oe
O le lagona mamana na oo mai ia te a‘u sa matuai malosi lava ma ou faapau ifo ai a’u i o‘u tulivae.
Sa na o le tolu o’u tausaga ma sa ou le manao e tuua le falemai, lea sa faataotolia ai o’u matua ina ua mavae le faalavelave tau taavale.
Ata na saunia e le tusitala; o ata o tulimanu mai le Getty Images
Sa ou tauivi mo le tele o tausaga ma mafatiaga ma popolega e fesootai ma se faalavelave tau taavale lea na matou aafia ai ma ou matua ina ua tolu ou tausaga. Sa le‘i ola lo’u tuagane e lei fanau mai.
I le faamanatuina o le 25 tausaga o le faalavelave, sa ou maua ai se manatuaga. I ni nai masina mulimuli ane, sa ou tauivi pea ae na fautua mai se uo ou te liliu atu i lou Tama Faalelagi. Sa ou ata ona ou fesili atu lea, “O le a le mea o le a Ia faia mo au?”
Sa faaauau lau tauiviga. Ina ua mavae se isi tausaga pe lua, sa ou lelava i le tiga ma sa liua lo‘u tiga i le ita. Sa ou talia le fautuaga a la‘u uo ma amata ona liliu atu i le Atua.
“Afai o e i ai moni lava iina, auina mai se tasi—soo se tasi,” sa ou tatalo ai. “Ou te manaomia se tasi!”
Na oo mai le aso ma alu a o ou tu i lo‘u faitotoa, ma faatalitali ma le leai o se manatu mamafa i ai.
“Vaai, le Atua, e leai se tasi e popole!” Na ou fai atu ai. “E leai se tasi na sau!”
A o tafe ifo loimata i o‘u foliga, sa ou ulu lemu atu i le fale ma tapuni le faitotoa. Sa ou savali i luga o le faasitepu ma le lagonaina o le toilalo. Ae ina ua ou oo atu i le pito i luga o le faasitepu, sa oo mai se lagona mamana ia te au. Sa matuai malosi lava ma na ou faapau ifo ai i o’u tulivae.
Ona oo mai lea o lenei manatu i lo‘u mafaufau: “ReNae, sa ou tauaveina oe.”
Na auina mai e le Tama Faalelagi lena manatu mamana ia te au i se auala agamalu ina ua sili ona ou manaomiaina. Sa ou iloaina e alofa o Ia ia te a‘u ma Na te silafia a‘u. E alofa tele o Ia ia te a‘u ma ua Ia tuuina mai ia te a’u le faitalia. O le a Ia le faamalosia au po o se isi lava e mulimuli ia te Ia, ae o Ia ma Lona Alo ua valaaulia i tatou e o mai ia i Laua (tagai Mataio 11:28–30).
Talu mai lena aso, ou te iloa e mafai ona ou faalagolago ia te Ia. Ua sili atu lo‘u olaga i le taimi nei ona o loo ou taumafai e mulimuli ia te Ia ma faalogo ia te Ia i aso uma. E ui ina faatagaina a‘u e le Tama Faalelagi ma Iesu Keriso ia lagona le tiga, La te aumaia foi ia te a’u le filemu, mafanafana, malosi, ma le lototele ina ia mafai ai ona ou aoao mai le faia o mea faigata. O le lagonaina o le tiga e fesoasoani ia te au e malamalama ma lagolago ai isi o loo tauivi.
Atonu tatou te le iloa atoatoa mea o loo feagai ma isi, ae e mafai ona tatou faaali atu le alofa ia i latou o siomia i tatou. Ou te faafetai ua ou iloa e alofa lo‘u Tama Faalelagi ia te a’u ma faafofoga mai ia te a‘u pe a ou valaau atu ia te Ia.