“O Se Alofa Mutimutivale Mai le Alii,” Liahona, Iulai 2022.
O Leo o le Au Paia o Aso e Gata Ai
O Se Alofa Mutimutivale mai le Alii
Mo le tele o tausaga, sa ou mafaufau pe na le aoga la‘u galuega faafaifeautalai i French Riviera.
Ata pue o M. Gary Hadfield ma lona faletua mai faaaloaloga a le tusitala
A o avea ma se alii talavou, sa ou auauna atu i se misiona e 30 masina i Farani, mai le 1955 i le 1958. I le valu masina faaiu o la‘u misiona, sa valaauina ai a’u e avea ma peresitene o le paranesi i Cannes. Sa laitiiti le Paranesi o Cannes, ma e itiiti ifo ma le 10 tagata toaaga o le ekalesia.
Sa faailoa mai e lo matou peresitene o le misiona ia i matou sa ia fuafua e tapuni le paranesi i se taimi puupuu lava pe afai e leai ni a matou papatisoga. O se vavega lava, na vave ona talosagaina e ni tamaitai matutua se toatolu le papatisoga. Ina ua uma le latou papatisoga, sa siitia atu se tasi o i latou i Dijon, lea sa leai ai se paranesi o le Ekalesia, ae o le isi toalua na tauivi e tumau le toaaga i le Lotu. Ae ui i lea, sa fesoasoani nei tagata fou o le Ekalesia ia i matou e tatala le paranesi.
Vaai i lo‘u te’i ina ua ou toe foi atu i Cannes i le vaitau o le 1990 ma lo‘u toalua, o Kathleen, ua i ai se falesa fou o le Au Paia o Aso e Gata Ai i Le Cannet, o se pitonuu filifilia i luga o magaala e iloa atu ai Cannes. Sa faaaogaina e se uarota malosi ma le toatele o loo faatalitali mo se vaeluaina. Ina ua faalogo le potopotoga i le tala faatauvaa o lo‘u taimi i Cannes, sa tulituliloaina i matou e ni tina matutua e toatolu na auai i le Ekalesia i le 1960s.
“Ana faapea e le tatalaina pea le Paranesi a Cannes,” na latou fai mai ai ia i matou, “semanu matou te le iloaina lava le Toefuataiga o le Ekalesia a Keriso! O le taimi nei ua tofu i matou uma ma fanau a fanau o loo auauna atu i le misiona.
A o matou olioli faatasi i le taunuuga fiafia o le tatalaina o le paranesi, sa auai mai ma se tamalii iloga sa lagonaina le matou talanoaga.
“O au o Uso Paya, ma sa ou auai foi i le Ekalesia i Cannes i le 1960,” o lana tala lea. “Sa avea au ma epikopo iinei, peresitene o le Siteki o Nice, ma se peresitene o le misiona i Sepania.”
Mulimuli ane, sa avea Uso Paya ma peresitene o le Malumalu o Madrid Sepania ma se Fitugafulu Eria. Sa matou fetagisi uma ma le olioli ina ua faalogo i a latou tala.
Oka se alofa mutimutivale agamalu o le Alii mo au e iloa ai o la tatou galuega faafaifeautalai i le French Riviera sa lei le aoga, e pei ona sa ou manatu i ai mo le tele o tausaga. E vaavaaia ma le faaeteete e le Alii a tatou galuega ma faamanuiaina i latou i le manuia, e ui e le mafai ona tatou muai vaai i le taunuuga i le lumanai e pei ona Ia faia.