“Faamoemoega Fou mo le Faamalologa Loloto atu mai le Atuatuvale ma le Popolevale,” Liahona, Iulai 2022.
Faamoemoega Fou mo le Faamalologa Loloto atu mai le Atuatuvale ma le Popolevale
O tala o le faamalologa mo se taimi umi mai le atuatuvale ma le popolevale ua faapupula mai ai o suiga faifai malie o le olaga lea e uunaia e le talalelei e mafai ona saofaga i auala taua i le faamalologa mo se taimi umi.
Atapue mai le Getty Images
O Iesu Keriso sa le gata o se faiaoga lelei ae o se fomai foi na taitaia tagata i le toomaga tumau mai mea na latou mafatia ai. Ona sa tauaveina e le Faaola i Ona luga “tiga ma ma‘i o ona tagata … , ina ia mafai ona ia silafia e tusa ai ma la le tino le ala e fesoasoani ai i lona nuu” (Alema 7:11–12).
Ina ia aoao atili e uiga i le faamalologa tumau mai le atuatuvale ma le popolevale, ua ou toe iloiloina ai le silia ma le 100 tala o tagata o e ua oo i se faamalologa loloto, umi atu mai nei luitau masani ua faateleina. O le faia o lena mea, ua ou faailoaina ai ni autu aoga e faaalia ai le tele o tala o le faamalologa, e aofia ai suiga faaletino, faalelagona, faaleaiga, ma faaleagaga.1
E oo lava a o lei faateleina le atuatuvale, faaesea, ma le faavauvau o le KOVITI-19, sa faatupulaia le talisapaia o le auala e tosina ai e mamanu o le olaga ia mafatiaga faalelagona. E pei ona fai mai Dr. Stephen Ilardi, “E lei mamanuina lava tagata soifua ina ia le lelei le fafagaina, nofonofo, faaalu le taimi i totonu, leai se moe, tuuatoatasi faaagafesootai, saoasaoa valea o le olaga o le seneturi luasefulu ma le tasi.”2
O a ni laasaga e mafai ona tatou faia i o tatou lava fale e tetee atu ai i nei mamanu o le olaga lea e lamatia ai i tatou i mafatiaga faalelagona? E faavae i autu ua ou faailoaina, o nisi nei o fetuunaiga patino e mafai e i latou e faatiga faalelagona ona faia ina ia faalolotoina ai lo latou lava faamalologa faalelagona.
1. Faatumau le faamoemoe i le avanoa e maua ai le faamalologa loloto atu
“Afai ua ia te outou le faatuatua, ua outou faamoemoe mo mea e le vaaia, a e moni” (Alema 32:21).
O se tasi o autu taatele i tala fa’amalologa o le i ai lea o le fa’amoemoe e mafai ona fa’atuputupula’ia suiga i le soifua fa’alelagona manuia lelei. E pei ona fai mai se tasi tagata, “O le faamalologa e … faatatau i le faatumauina o le faamoemoe.”3 O le toatele e i ai gasegase faalemafaufau ua ta‘u atu i ai o latou tulaga sa tumau. Sa faavae lenei mea i le talitonuga e le suia le faiai o tagata matutua. Ua sili atu nei lo tatou iloa. O le mauaina o suiga o le faiai ua faateleina ai le faamoemoe e mafai ona faia suiga faavae, e aofia ai i latou o loo feagai ma gasegase faalemafaufau.
O le ono i ai o suiga loloto e le tatau ona faateia ai i latou o e talitonu ia Keriso. I le saunoa atu ai ia i latou na aafia i gasegase faalemafaufau, na aoao mai ai Elder Erich W. Kopischke o le Fitugafulu, “Fai soo se mea o loo taoto i lou mana ona ‘tu ai pea … e vaai ai i le faaolataga a le Atua, ma mo lona aao e faaali mai’ [Mataupu Faavae ma Feagaiga 123:17].”4 O le i ai o isi o siomia i tatou o e le fiugofie ia i tatou e mafai ona fesoasoani moni lava, e pei ona maua e Dr. Daniel Fisher i faatalanoaga ma tagata taitoatasi ua toe malolosi: “Sa matou faalogo pea lava pea, ‘Sa ou manaomia se tasi e talitonu ia te au.’”5
2. Fai ni fetuunaiga laiti ma tetele o le olaga
“O mea laiti ma faatauvaa e faataunuu ai mea tetele” (Alema 37:6).
E toetoe lava o tala uma o le faamalologa e aofia ai tagata na aoaoina ni mea fou ma tuputupu ae i ni auala eseese. O nisi taimi latou te faia ai ni suiga tetele. Mo se faataitaiga, sa fai mai se tasi o tamaitai, “Sa oo ina ou iloaina sa i ai ni o‘u tiga faaopoopo, mausa, ma ni mea faatautau e taulimaina i lo’u loto. I totonu ia te au sa i ai le manatu faapito, pulea, ita … ma sa ou tauaso tele lava.”6
O isi taimi na maua ai e tagata ni fetuunaiga laiti e faia ai se eseesega, e pei o le tausia o se api talaaga o le lotofaafetai, tausia o se fagafao, po o le faateleina o le aafia i le susulu o le la. Sa faamatalaina e se tasi tagata le taua o sina filemu teisi atu i lona aso: “Ou te alapo lava ina ia le faatatope ai i le taeao. Ou te fiafia e faalā e ala i le tu i le faamalama mo ni nai minute.” Ona ia nofo lea i lalo e fai se “malutaeao faifailemu, mafanafana, ma filemu”—e aunoa ma se faalavelave mai lana telefoni.7
3. Faamuamua gaoioiga faaletino, taumafa paleni, ma le moe
“Tuu le moe umi atu nai lo le mea e tatau ai; vave momoe ina ia outou le vaivai;alapo a’e, ina iaolaolao outou tino ma o outou mafaufau” (Mataupu Faavae ma Feagaiga 88:124; tagai foi 89:18–21).
O le faateleina o le maualuga o le gaoioiga faaletino ua leva ona iloa e faʻaleleia ai lagona. O fetuunaiga o meaai paleni e mafai foi ona faia ai se eseesega i le faaitiitia o le atuatuvale.8 E pei ona tusia e Dr. Felice Jacka: “O le taumafaina o se salati o le a le fofoina ai le atuatuvale. Ae e tele mea e mafai ona e faia e siitia ai ou lagona ma faaleleia ai lou soifua maloloina faalemafaufau, ma e mafai ona faigofie e pei o le faateleina o lau taumafa i laau ma meaai maloloina.9 E faapena foi, ua iloa e tagata sailiili o le moe i le tasi le itula e vave ai “e ogatusa ma le 23% e maualalo ifo le tulaga lamatia o le faaletonu ogaoga o le faanoanoa [major depressive disorder]”10—faatasi ai ma ona aoga i le atuatuvale ma le popolevale i le taimi nei.
4. Fetuunai au meaai o le mafaufau ma gaoioiga o le mafaufau
“Ia e tausi ia te ia i le filemu atoatoa, o lona mafaufau e tumau ia te oe” (Isaia 26:3).
O i latou e mauaina le faamalologa loloto e masani ona lipoti mai le auala e vaai ai i le faanoanoa ma le pogisa o le “lotoi o le mafaufau” e le o se ataata po o ai i latou ae o se mea o loo latou oo i ai. E pei ona faamatalaina e se tasi o uso, “O le mea sa oo muamua i ai o lenei ituaiga o sauaga, o le faapologaina i le faagasologa o mafaufauga, sa mafai ona ou toe faasee i tua mai lena mea ma na ona ou matauina o se mea e sili atu ona leaga, e pei o le taoto i lalo i le auvai o se vaitafe, na o le matamata lava i le tafe mai o le vaitafe.”11
E ui o se mea masani mo i tatou le vaai atu i o tatou mafaufauga o le “mea moni,” e mafai e ala i faiga masani e pei o le tatalo, mafaufau loloto, po o togafitiga e aoao ai pe faapefea ona vaai atu i o tatou mafaufauga ma lagona ma le manatu faananau ma itiiti ifo le patino. O lenei mea, i se isi itu, e fesoasoani tatou te talisapaia ai lo tatou gafatia e filifili ai pe faapefea ona tali atu i mea o loo tutupu i totonu—ma ia toe taulai atu le gauai i mea e moni ma lelei.
O le gauai atili atu i mea tatou te aumaia i o tatou mafaufau e mafai foi ona lagolagoina atili ai le faamalologa. E pei ona apoapoai mai Peresitene Russell M. Nelson, “Afai o le tele o faamatalaga e te mauaina e sau mai faasalalauga faaleagafesootai po o isi ala faasalalau, o le a faaitiitia lou tomai e lagona ai musumusuga a le Agaga.”12
5. Tulimatai le faamagaloga ma le faamalologa mai mafatiaga ua tuanai
“O le a ‘soloiesea foi e le Atua loimata uma i o [tatou] mata; e leai foi se toe oti, po o se faanoanoa, po o se aue, e leai foi se toe puapuaga; aua ua mavae atu mea muamua” (Faaaliga 21:4).
O se mea masani mo mea tiga i le taimi ua tuanai (mai le amataga o le sauaina i se taimi mulimuli ane o mafatiaga) e uunaia ai le oo atu i le taimi nei i le faanoanoa faalelagona. O se mamanu masani i tala faamalolo o le aua nei le amanaiaina nei fesootaiga ae ia manatu mamafa i ai. Nai lo le taulai atu i mea sese i tagata, o se tasi o tamaitai na mauaina le faamalologa na fautuaina mai tatou te sailiili atili i mea ua tutupu ia i latou.13 O le mea e lelei ai, o loo i ai le tele o le mataalia ma le lagolago faapolofesa e faalagolago i mafatiaga e fesoasoani ai i tagata ia maua le faamalologa mai mea tiga na tutupu i le tuanai.
6. Faaloloto ou sootaga ma le Atua ma isi
“Ua latou o mai iinei e faalogo i le afioga fiafia a le Atua, ioe, o le afioga lea e faamalolo ai le agaga ua manu‘alia” (Iakopo 2:8).
Sa taia au i le tele o tala o le nofoaga autu loloto o le faamalologa faalelagona i le toe mauaina o se sootaga fou ma le Atua. Sa talanoa se tasi alii e uiga i le “tautau pea i folafolaga a le Atua” i tusitusiga paia ae e leai se tasi na siomia o ia na foliga mai na mafai ona fesoasoani ia te ia.14 Na fautuaina e Elder Jeffrey R. Holland i latou o feagai ma le atuatuvale, “Ia tulitulimatagau ma le faamaoni faiga masani o faigalotu e suesueina i le taimi lea e aumaia ai le Agaga o le Alii i lou olaga.”15
E toatele isi na faamautinoa mai o le o mai e vaai i o latou olaga e i ai se taua moni, uiga, ma le faamoemoega sa o se vaega taua o lo latou faamalologa, e pei ona sa fesootai ai ma isi sa siomia ai i latou. Sa maua e se tasi o tagata o le Ekalesia se sootaga matagofie i tagata o aiga ua maliliu e ala i le faatofuina o ia lava i talafaasolopito o aiga. Fai mai a ia, sa amata ona ia matauina le ala na amata ai ona ia “lagona le māmā” a o faalolotoina nei fesootaiga—e oo lava i le tulaga na iu ai ina ia “le iloaina lava le faanoanoa.”16
7. Faaitiitia le faalagolago
“Galue mo i latou lava ae le faamalosia” (2 Nifae 2:26).
O se mea masani mo soo se tasi o feagai ma le faanoanoa po o le popolevale e faalagolago i ni lagolago eseese mai fafo: mai togafitiga faapolofesa ma aiga po o uo i fualaau ma meaai. O le mea e faanoanoa ai, o nisi e liliu atu i vailaau faasaina ma le ava malosi a o taumafai e faatautaia lagona tiga. E ui o le tele o punavai o fesoasoani e mafai ona maua ai faamanuiaga mo taimi pupuu, ae o tagata e maua le faamalologa mo se taimi umi, e talanoa pea lava pea e uiga i le faaitiitia o le faalagolago i punaoa i fafo atu. O le vasega o le maufetuuna‘i faalelagona a le Ekalesia o se tasi lea o punaoa e fesoasoani i tagata e atiina ae lena ituaiga o saolotoga ua faatupulaia.17
O Suiga Laiti e Fai ai se Eseesega Tele
Ioe, e leai se suiga o loo faamatalaina i luga, e tatau ona tupu i le taimi e tasi. Na tusia e Saienitisi o neura o Alex Korb e faapea “e tasi se suiga itiiti i le taimi” e mafai ona suia ai le ala o le faanoanoa e ala i le fatuina o se “lio agai i luga.” Sa ou asiasi i se tasi taimi i se aiga sa lagona e lona talavou faanoanoa le le mafai ona tuuto atu i soo se mea sei vagana ai le susulu teisi atu o le la. I le mavae ai o le lua vaiaso o le toe foi atu i fafo e taaalo ma lona tama i taaloga, sa lagona e lenei alii talavou le lava o le malosi e faataitai ai i fetuunaiga i ana meaai paleni, lea na faaosofia ai isi faaleleiga ma se galuega fou o le faamalologa faifai malie. O lenei mea e atagia mai ai “le faateleina o le manuia o le taimi” lea na faamamafaina talu ai nei e Elder Michael A. Dunn o le Fitugafulu.18
Sa faamatalaina e se isi uso le ala na aafia ai lona mafaufau i le fetuunaiga o mea sa ia mafaufau i ai mo isi vaega o le olaga: “Sa amata ona ou filifili e uiga i mea sa ou matamata i ai [ala o faasalalauga] ma po o ai na ou faatautau i ai ona sa ou maua se lagona manino i le auala na aafia ai au. Ma o lena mea na uunaia ai lo‘u taamilosaga o le moe. Ma sa amata ona ou malolo atili; ma sa ou iloaina sa ou lagonaina le fiafia tele ina ua ou faamalositino. Ma sa ou matauina meaai na ou maua ai se lagona lelei ma meaai na ou lagona ai le ma‘i.” Sa ia faamatalaina nei suiga o se “aafiaga faa-tomino … lea na mafua ai i isi liliuga laki.”19
Ua faamalamalama mai e Dr. Korb: “I faiga faigata e pei o le faiai, e oo lava i se me‘i laitiiti e mafai ona suia ai le faalogona o le polokalama atoa. Mo se faataitaiga, o le faamalositino e suia ai le gaoioiga eletise i lou faiai i le taimi o le moe, lea e faaitiitia ai le popolevale, faaleleia ai lagona, ma tuuina atu ai ia te oe le malosi sili atu e faaaoga ai [ma fegalegaleai ai ma isi]. E faapena foi, o le faaalia o le lotofaafetai e faagaoioia ai le gaosiga o le serotoni, lea e faaleleia ai ou lagona ma mafai ai ona e faatoilaloina mausa leaga, ma tuuina atu atili ai ia te oe le lotofaafetai. Soo se suiga itiiti lava e mafai ona avea na o se tulei e manaomia e lou faiai e amata ai ona ati i luga.”20
E pei ona outou vaai i ai, o le faamalologa loloto atu e le o le taumafai e suia mea uma i ni faiga maoae. O lena mea o le a taufaafefe e oo lava i tulaga masani, ae ia tuuatoatasi pe a lagonaina le mamafatu faalelagona. E oo lava i fetuunaiga e tasi e mafai ona faia ai se eseesega moni, ma faateleina. O lea ia aua nei fiu!
O le vaaia o le ala e faifai malie ai le suiga e totonugalemu i le faamalologa tumau ua faateleina ai lou talisapaia o le avea ma se vaega o se nuu o le talalelei ua tuuto atu i le tuputupu ae faifai pea ma le alualu i luma e faavavau.
O le tala fiafia e faapea o nei avanoa mo le tuputupu ae o mea ia e mafai ona tatou faamuamua i o tatou lava olaga ma aiga. Ua faafia ona faasino mai e perofeta lo tatou gauai atu i gafatia e le o faaaogaina i totonu o o tatou lava aiga—faatasi ai ma Peresitene Nelson o loo uunaia i tatou i tausaga talu ai nei ina ia “liua [lo tatou] aiga i se malutaga o le faatuatua.”21 Faatasi ai ma musumusuga a le Agaga, ou te talitonu e mafai foi ona tatou faia o tatou fale ma malu o le faamalologa.
E silafia e lo tatou Alii le tiga o le lofituina o tiga faalelagona ma mea e mafai ona fesoasoani ia i tatou e maua ai se toomaga loloto atu. Po o le a lava le fenumiai o gasegase faalemafaufau mo i tatou uma, ou te molimau atu e le o fenumiai le Alii. Na te silafia lelei le mea e mafai ona fesoasoani ia i tatou e maua ai le faamalologa tumau faalelagona.