Ua Na’o Tusiga Faatekinolosi: Autalavou Matutua
3 Upumoni Mamana Sa Ou Aoaoina a o Auauna Atu o se Tagata Faigaluega o le Malumalu
A o ou auauna atu i le malumalu, sa ou maua se savali filemu mai le Alii na ta‘u mai ai ia te a’u sa Ia silafia a‘u ma alofa ia te a’u.
I se tasi aso a o auai i se faeasaite a le siteki, sa ou maua ai se uunaiga e tatau ona ou auauna atu i le malumalu. Sa ou te‘i ona e lei oo muamua mai le manatu i lo’u mafaufau, ae sa ou talanoa i lo‘u epikopo e uiga i ai, ma sa ia lagolagoina ma fiafia sa ou manao e auauna atu.
I ni nai masina mulimuli ane, sa avea a’u ma se tagata faigaluega i sauniga i le Malumalu o Manti Iuta. E ui sa ou fiafia mo le avanoa, ae sa fai si o’u popole o le a avea ma se avega i lo‘u taimi. O le amataga lea o lo‘u tausaga lua i le kolisi, ma sa ou taumafai lava i taimi uma e faapisi a’u i le aoga. Sa ou aveina pea lava pea togi e 18 i semesa uma ma sa ou tauaveina matafaioi faaletaitai ma le nusipepa a tamaiti aoga ma le api talaaga o tusiga a le kolisi.
E peitai ane, sa ou sese. O le auauna atu e le o se avega mamafa, ae o se faamanuiaga o le a ou faatauaina i lo’u olaga atoa.
Ou te fia faasoa atu ni mea se tolu na ou aoaoina i lo’u taimi o se tagata faigaluega i sauniga.
1. E silafia patino i tatou e le Tama Faalelagi ma e finagalo i le mea e sili mo i tatou.
Sa ou popole i le taimi muamua na amata ai ona ou auauna atu i le malumalu aua sa ou iloaina e tatau ona ou taulotoina upu i sauniga uma. Sa ou popole o le a ou le fiafia, o lea sa ou faaaluina ai le tele o itula e suesue ai upu ina ia mautinoa ai e mafai ona ou faasa‘oina. Ma a o ou faalogo i tala o tagata faigaluega o e na lagona le pei o le Agaga Paia na fesoasoani ia i latou e tauloto vave ia upu, e le o so‘u aafiaga lena.
O nisi taimi sa ou lagona le le fiafia ona sa ou tauivi e tauloto ia upu. O le aoaoina o upu i le sauniga muamua na toeitiiti atoa le masina talu ona ou faia. Ae o le toe tepa i tua, ua ou iloa ai o la‘u tauiviga o se faamanuiaga ofoofogia. Sa mafai ona ou nofo i le maota o le Alii ma suesue i upu o sauniga mo le tele o itula. Ma o le faalolotoina o lo‘u malamalama i na upu na aumaia ai le filemu ma le mana i lo’u olaga. Sa mafai ona ou iloaina ma le manino atili le siufofoga o le Alii i le tele o taimi a o ou i ai uma i totonu ma fafo o le malumalu.
O lenei aafiaga o se molimau ia te a’u e silafia patino i tatou e le Tama Faalelagi ma silafia po o a aafiaga o le a sili ona aoga ia i tatou. O le avanoa e mafaufau ai i sauniga na tuuina mai ai ia te a’u se malamalamaaga sili atu i mea e ta’u mai e sauniga ma faamalosia ai lo’u manao e tausia feagaiga na ou osia i le malumalu.
2. E Alofagia Atoatoa i Tatou
I lo‘u taimi muamua i le faigaluega ai i le veli i le malumalu, sa ou maua ai le avanoa e fesoasoani ai i se tagata ulu e tautatala faaSipaniolo. Sa lelei la’u tautala faaSipaniolo i lena taimi, o lea sa taua tele ia te a’u sa mafai ai ona ou fesoasoani i lena uso i lana sauniga o le malumalu i se gagana sa ou masani ai. O se faamanuiaga foi lenei mo a’u aua sa ou popole tele e uiga i le manatuaina o upu, ma faaliliu ma le mataalia sa mafai ona ou faitauina upu o le sauniga.
Ina ua talosagaina a’u e fesoasoani i le sauniga i le faaSipaniolo, sa ou lagonaina e pei na ou mauaina se savali filemu mai le Tama Faalelagi na faailoa mai ai ia te a’u sa Ia silafia lelei le mea sa ou i ai ma e alofa atoatoa o Ia ia te a’u. O le aafia ai i lenei sauniga i se isi gagana na fesoasoani foi ia te a’u e malamalama atili ai ona sa mafai ona ou taulai atu i le Agaga o loo molimau mai ia te a’u i lona moni. Ma sa ou maua se malamalama sili atu i le uiga o le avea ma se vaega o se Ekalesia i le lalolagi atoa lea e tumu i le tele o aganuu ma gagana eseese, ma le alofa o le Tama Faalelagi mo tagata taitoatasi uma o Ana fanau.
3. E tuuina mai e le malumalu ia i tatou le avanoa i le mana o le Atua.
I se isi taimi a o ou fesoasoani i se tagata ulu i le veli, sa ou te’i i le vaaia o la‘u uo o le a ma faaipoipo o le tagata faigaluega o loo fesoasoani mai ia te a’u. I ona fofoga sa ou vaai ai i le Malamalama o Keriso. Sa ou maua se lagona sa ou i ai i le mea sa tatau ona ou i ai i lena taimi. Sa ou lagonaina le alofa tele mo la‘u uo ma le faamoemoe mo le lumanai o le a ma faatasi ai.
Sa ou lagonaina foi le mana lea e sau mai le i ai o se sootaga patino ma Iesu Keriso ma le tausia o a‘u feagaiga. Sa faamanatu mai ia te a’u, afai lava ou te faia le finagalo o le Atua, o le a ou maua le saogalemu ma le filemu. E pei ona saunoa Peresitene Russell M. Nelson: “O mea uma e aoaoina i totonu o le malumalu … [o le a] faateleina lo tatou malamalama ia Iesu Keriso. O Ana sauniga taua e fusia ai i tatou ia te Ia e ala i feagaiga paia o le perisitua. Ma, a tatou tausia a tatou feagaiga, Na te faaee mai ia i tatou Lona mana faamalolo ma faamalosiau. Ma ioe, oka so tatou manaomiaina o Lona mana i aso o i luma atu.”1
O le avea ai ma se tagata faigaluega i sauniga i le malumalu na fesoasoani moni lava ia te a’u e malamalama atili ai i le mana o feagaiga tatou te osia ma le malosiaga latou te aumaia. E le o tagata uma o le a mafai ona auauna atu o se tagata fai sauniga, ae e mafai lava e i tatou uma ona taumafai e auauna atu i le malumalu i le tele tatou te mafaia ai. I le faia o lena mea, ou te iloa o le a tatou lagonaina le mana na te aumaia i o tatou olaga, ma o le a tatou latalata atili atu ai ia Iesu Keriso ma faamalosia ai lo tatou faavae faaleagaga.