Avanoa e Tuputupu A’e ai

Ata

fugalaau i se apatotō laau

Ua tele tausaga talu ona maliu lo‘u toalua, o Jerold. Sa vave ma malosi le oo mai o le kanesa, ma i totonu o le tolu masina ae maliu o ia. O lea la ua ou mafaufau ia te ia a o ou galue i lo‘u fanua.

A o ou toe totoina se laau i se apatotō laau, sa ou mafaufau. Ae ou te lei faasalavei atu, sa lelei le laau. Sa i ai i le fale i le apatotō laau ua uma ona i ai, ae sa lei lauusiusi. Sa ou iloa afai ou te le toe totoina i se taimi, atonu o le a le toe i ai ni fugalaau ma atonu foi o le a taofia ai le tuputupu ae. E mautinoa lava o le a le mafai ona faia le mea sili.

O lea, sa ou filifili ai e tuu atu le avanoa i le laau e ola ai e ala i le suia i se apa totō laau e lapoa atu. E le o se apatotō laau e lapoa tele—sa na o le lua inisi le lautele e tele atu ai. Afai ou te tuuina atu i ai le tele o le avanoa, e mafai ona iu ina lofituina ma pe mai le pala o le aa.

Ata

fagu fui laau

Sa ou faamoemoe o le a tauivi le laau a o taumafai e fetuunai. Sa fai si lagolelei, sa mafanafana i totonu o le apatotō laau sa masani ai. Sa lei iloa o le suiga o le a fesoasoani e faaauau ai pea ona tuputupu ae. Sa manaomia ona ou faafaileleina i le ala, ma tuuina atu i ai le malamalama talafeagai, vai, ma isi meaai faaopoopo e manaomia i lenei taimi o fetuunaiga. Sa ou iloaina o le a iu lava, ina lauusiusi ma toe fua mai ni fugalaau.

A o ou mafaufau i lo‘u olaga o se tina ua oti lana tane, sa ou iloa ai sa pei lava a’u o lena laau. Sa ou lagolelei. Sa ou manuia. Ae ina ua maliu lo‘u toalua, sa ou faalogoina le musumusu mai o le Agaga ua ou ulufale atu i se vaega fou o le tuputupu ae. Sa i ai pea ni mea sa manaomia ona ou aoaoina ma faia i lenei olaga.

I le lua tausaga na sosoo ai, na maliliu ai foi isi alii e toafitu o le matou uarota. Sa amata ona ou fai atu i a‘u uo faatoa maliliu a latou tane e faatasitasi, talanoa, asiasi, e auauna atu i isi—ina ia mafai ona tuuitiitia teisi lo matou lagonaina o le tuuatoatasi. E leai se tasi o i matou e ono filifili ia “toe totōina.” Ae a o ou fetuunai i le olaga faaletino e aunoa ma lo‘u toalua, sa ou iloa ai e mafai ona ou tuuina atu le lagolago i isi o e na feagai ma se luitau faapena. Sa ou iloa ai foi e tele avanoa e faaalu ai le taimi ma tamaiti ma fanau a fanau ma faamautinoa atu ia i latou e ala i le Togiola a Iesu Keriso, i le isi olaga e mafai ai ona toe faatasia lo matou aiga.

Semanu ou te le mafaufauina lava le tuputupu ae o le a oo mai ia te au ona o le maliu o lou toalua. Ae na afio mai le Tama Faalelagi ma “toe totoina” au, ma tuuina mai ia te au se avanoa e tuputupu ae ai e ala i le tuuina o au i se apatotō laau lapoa teisi atu—o se luitau fou na maua ai se avanoa mo le tuputupu ae.

O loo ou misia pea Jerold i aso uma. I ni tausaga mulimuli ane, o loo ou tauivi pea a o ou taumafai e fetuunai i le suiga o le i ai e aunoa ma ia. Ae ou te iloa o le a faafaileleina au e le Alii i luga o le ala. I le aluga o taimi, ma faatasi ai ma le faalagolago ia te Ia, o le a ou toe olaola ma fua mai ni fugalaau.