O Le Mea E Taunuu Ai Miti

Ata

O Shyam, lona faletua, o Radhika, ma le la atalii

Ata pue o Shyam, lona faletua, o Radhika, ma le la atalii na pueina e Richard M. Romney

Mo se mafuaaga, sa tonu ai i se teine lelei i lau vasega 10 i le aoga maualuga e tuuina mai ia te a’u se kopi o le Tusi a Mamona i le faaPeretania. Sa ou le iloa po o le a lea mea. Sa tuuina mai e lo‘u tama ia te au se tusi o tala faapuupuu o le Tusi Paia i le faaInitu a o ou laitiiti. O lea, ina ua ou taumafai e faitau ni itulau se lua i le Tusi a Mamona ma vaaia le suafa o Iesu Keriso, sa ou mafaufau, “E foliga mai lenei mea o le Tusi Paia.”

Sa ou teuina le tusi, ae sa ou faataatiatia ai lava. Ou te lei tautala faaPeretania, e ui sa ou suesueina i le aoga maualuga. Pe tusa o lena lava taimi, sa amata ai ona ou sauniuni mo ni suega ma la‘u uo lea na tuuina mai ia te a’u le Tusi a Mamona. Sa ou lelei i a‘u mataupu uma faaleaoaoga vagana ai le tasi.

“Ou te matua popole lava i a‘u suega faaPeretania,” sa ou fai atu ai i la’u uo. “Ou te fefe o le a ou le pasi.”

Sa ia tali mai, “E i ai ni au uo e mafai ona fesoasoani ia te oe e aoao le Igilisi.”

O na uo o ni faifeautalai mai Le Ekalesia a Iesu Keriso o le Au Paia o Aso e Gata Ai E lei umi ae amata ona la o mai i lo‘u fale ma tuuina mai ia te a’u ni lesona o le kalama faaPeretania. Ina ua mavae ni nai vaiaso, sa amata ona la aoaoina a’u i le talalelei.

A o ou sailiili i le Ekalesia, sa aoaoina a’u e faifeautalai e uiga i fua o le Agaga (tagai Kalatia 5:22–23) ma fesoasoani ia te a’u ia malamalama i le ala e talanoa mai ai le Agaga ia i tatou. Sa laua fai mai foi ia te a’u e ole atu i le Tama Faalelagi pe moni le la savali. A o ou tatalo, ou te lei faamoemoeina se tali e pei o lea na maua e Iosefa Samita, ae sa ou manao i se tali e oo mai i se auala na ou iloa ai sa ou faia le filifiliga sa‘o.

O lena tali na oo mai i le leva o le po i se auala e le mafai ona ou faafitia. O se tali na faatumulia i le malamalama ma le filemu. Na ou lagonaina le siitia ma le toefanaufouina. Sa ou lagonaina e pei sa ou manao e avea ma tagata sili ona lelei i le lalolagi. Sa silafia e le Atua le auala e tali mai ai ia te a’u, ma sa ou iloa le mea e fai pe a uma lena. O le mea moni, sa ou fefe po o le a le mea o le a tupu ia te a’u pe afai ou te le papatiso.

Ina ua ou ta‘u atu i o’u matua, sa tetee i ai lo‘u tama—e le faapea ona e le o ia o se tamalii lelei ae ona o uunaiga faaleaganuu. Sa ia le mautinoa pe o le a faapefea ona talia e lo matou nuu lo’u papatisoga.

“Afai e te papatiso, o le a tuliese oe mai lo tatou fale,” na ia fai mai ai ia te a’u.

I loimata, sa ou ta‘u atu i lo’u tina, “Ou te fia papatiso lava, ae o le mea lenei o loo fai mai ai Tama.”

Sa ia tali mai, “Alu e fai. Se’i tatou vaai i le mea e tupu.

Sa ou alu pea ma papatiso. Ina ua mavae lena, ou te lei toe liliu lava. Na pau lava le mea na ou vaai i ai o ni faamanuiaga maoae i lo‘u olaga.

E lei tuliesea a‘u e lo’u tama, ae mo se tausaga pe lua, sa faigata le olaga i le fale. Ina ua tupu se mea faigata i lo matou aiga, sa manatu nisi o o matou aiga ma tagata o le aiga ona sa ou faalataina ia atua e ala i le filifili e talia le talalelei. Ae a o vaaia e ou matua ni suiga lelei ia te a’u, na suia mea i le fale. E lua tausaga talu ona ou auai i le Ekalesia, ae ou papatisoina ou tuafafine laiti e toalua. Mulimuli ane, sa papatisoina ai le isi o’u tuafafine.