Ke Ke ʻI Ai maʻa Hoʻo Tamasiʻí

ʻĪmisi

ko e tamasiʻi ʻoku fakanofo

Toʻu Tangata ʻe Fā, tā ʻe Kwani Povi Winder

Naʻá ku mālohi ʻi he Siasí ʻi he taimi naʻe ʻave ai au mo hoku ongo tuofāfiné ʻe heʻeku faʻētangata ko Pilá ki he Palaimelí. Ko ʻeku faiako Palaimelí, ʻa Sini Lisiatesoni, ko ha sīpinga ʻo ha faʻē angaʻofa. Naʻá ku saiʻia ai mo hoku ngaahi kaungāmeʻa foʻou ʻi he siasí, ʻa ia naʻa nau angaʻofa lahi ange kiate au ʻi he longaʻi fānau ʻi homau kaungāʻapí. Ko ia ai, ne u fakakaukau ke u nofo ai.

ʻI he ofi ke hoko hoku taʻu 12, naʻe fakaafeʻi au ʻe Pīsope Tali Kaimoni ke u maʻu ʻa e Lakanga Taulaʻeiki Faka-ʻĒloné pea ke fakanofo au ko ha tīkoni. Naʻe ʻikai ke u fakapapauʻi hono ʻuhingá, ka naʻá ku talaange ʻio. Peá ne pehē mai leva, “Ko e hā ʻoku ʻikai ke ke kole ai ki hoʻo tangataʻeikí ke ne ʻomi koe he Sāpate kahaʻú, pea te mau fakanofo koe.”

Naʻe ʻikai toe maʻulotu ʻa Teti mo hono fāmilí ʻi hono taʻu 13 nai. ʻI heʻene fuʻu lahí, naʻá ne fakaʻaongaʻi e konga lahi ʻo e fakaʻosinga ʻo e uiké ʻi he ngaahi pā fakalotofonuá pe taumātaʻú. Naʻá ne ngāue ʻi he Tautahi ʻa e US lolotonga e Tau Lahi ʻa Māmani Hono II pea mo e Tau ʻi Kōleá. Naʻá ne ifi sikā, konā, mo kapekape, ka naʻe ʻiloa ia ʻi homau kiʻi kolo ko Monitaná ʻi heʻene faitotonu mo angatonú.

Ko e taimi naʻe ʻave ai au ʻe he Tangataʻeikí ki he lotú he Sāpate hono hokó, ko ha meʻa lahi ia. ʻI he hokosia e taimí, ne ui mai ʻa Pīsope Kaimoni pea kole mai ke u tangutu ʻi ha sea. Naʻe hilifaki ʻe ha kau tangata honau nimá ki hoku ʻulú—kae ʻikai kau ai ʻeku tangataʻeikí—pea fakahoko ʻa e ouaú.

Naʻá ku ongoʻi ʻa e mafatukituki ʻo ha ngaahi nima lalahi ʻiate au. Naʻe tangutu e tangataʻeikí ʻi ha sea ʻo kiʻi mamaʻo siʻi atu pē, ʻo ne ongoʻi ha faʻahinga mālohi kehe—ʻi hono fatafatá. Naʻe ongo mai ha leʻo ki hono lotó ʻo pehē, “ʻOku fiemaʻu ke ke ʻi ai maʻa hoʻo kiʻi tamasiʻí ʻi he taimi ʻe toe hoko ai ʻa e meʻá ni.”

ʻI he ngaahi uike ne hokó, naʻe liliu e moʻui ʻa e Tangataʻeikí pea kamata ke ne maʻulotu he Sāpate kotoa pē. Ne ʻikai fuoloa mei ai kuo hoko ʻa e Siasí ko e uho ʻo ʻemau moʻui fakafāmilí.

Naʻe hoko ʻeku tangataʻeikí ko ʻeku ʻetivaisa ʻi he tīkoní, akonakí, mo e kōlomu ʻo e taulaʻeikí; ko ʻeku faiako Lautohi Faka-Sāpaté; pea mo ʻeku faiako pasiketipoló, sofipolo mo e volipoló. Lolotonga ʻema hoko ko ha ongo hoa faiako fakaʻapí, naʻe tokoniʻi ʻe he Tangataʻeikí ha kau tangata mo ha ngaahi fāmili kehe ke nau foki mai ʻo mālohi ʻi he Siasí.

ʻI hono tokoniʻi au ʻe heʻeku tangataʻeikí, naʻá ku aʻusia ai ʻeku ului fakatāutaha mo liliú. Talu mei ai, mo ʻeku feinga ke ongoʻingofua ʻa e kau tangata te nau lava ʻo tali ha fakaafe ke nau hoko ko e tamai lelei taha te nau ala lavá, ʻo hangē ko ʻeku tamaí.

Te u houngaʻia maʻu pē ʻi he meʻa naʻe fai ʻe heʻeku faʻētangata ko Pilá, ko ha faiako Palaimeli angaʻofa, pīsope poto, pea mo ʻeku tangataʻeikí maʻaku ʻi he taʻu ʻe 60 kuo hilí.