Ko hono Tuku e Maama ʻo e ʻAló ke Ulo Atu ʻiate Kitautolú

ʻĪmisi

ulo ʻa e māmá mei he ngaahi kilisitala ʻoku tautau

ʻI ha hengihengi Mōnite ʻe taha, naʻe fakataha mai ai ha kau ngāue tokoni ke tokoni ʻi hono fakamaʻa ʻo e Temipale Mount Timpanogos Utah. Naʻe vahe ha ngaahi ngāue, pea ʻi heʻeku muimui mo ha kau ngāue tokoni ʻi heʻemau supavaisá, ne mau fakatokangaʻi naʻá ne taki kimautolu ki he loki silesitialé.

ʻI heʻemau hū atu ki he lokí, naʻa mau fakatokangaʻi leva kuo tukutukuhifo e foʻi maama teuteu ne faʻa tautau māʻolungá ʻo ofi ki he falikí. Ko homau fatongiá ke fakamaʻa ia. Naʻe ʻikai ko ha ngāue siʻisiʻi ʻeni, koeʻuhí naʻe lahi faufaua e ngaahi foʻi kilisitala ʻi he māmá! Naʻe ʻoange ki he tokotaha takitaha ha kofunima hinehina, pea naʻe fakahinohinoʻi mai ʻa e founga hono toʻo e efú ʻaki hono holoʻi fakalelei tahataha e ngaahi foʻi kilisitalá ʻi homau kofunimá. Naʻe fuʻu faingataʻa e ngāué, ka naʻa mau ngāue loto-vēkeveke.

Hili ha ngaahi houa mei ai, naʻe maʻa mo fetapaki ʻa e foʻi maama teuteú! Hili ʻemau tanganeʻia ʻi hono fakaʻofoʻofá, naʻe kamata leva ke mau fakamaʻa ʻa e fanga kiʻi maama teuteu ʻi he loki silesitialé.

Fakafokifā pē kuo hoko ha meʻa fakaofo! Naʻe hopo hake ʻa e laʻaá ʻi he fakahahake ʻo e tumuʻaki moʻungá, pea naʻe ulo hangatonu mai hono ngaahi huelo ngingilá ʻi he luva sioʻata fuopotopoto lahi ʻi he loki silesitialé ʻo feʻunga tonu ke maamangia ai ʻa e maama teuteu kilisitala fakaʻofoʻofá. Naʻe aʻu e huelo ʻo e laʻaá ki he kilisitala ngingila takitaha, pea taʻefaʻalaua e maama ne tapua ʻi he feituʻu kotoa pē! Naʻe hā ha ngaahi ʻumata ngingila ʻi he falikí, ʻató, naunau falé, holisí, mo e kakaí, pea aʻu ʻo malama ʻe niʻihi ʻi he ʻataá! Ne mau puke ha ngaahi ʻumata ʻi homau nimá! Naʻe fakaofo ʻaupito!

Kuó u faʻa fakalaulauloto ki he momeniti fakangalongataʻa ko iá pea mahino lelei ange kiate au ʻoku fakahoko ʻe he māmá ha meʻa matuʻaki makehe! ʻI heʻetau maʻu e maama ʻo e ʻAló pea fakahoʻata ia ki tuʻa ʻo hangē ko e kilisitalá, ʻoku fakalahi ʻEne māmá, pea ʻoku fakaofo ʻa e ngaahi ola fakafiefiá!

Naʻe fakahā ʻe he Fakamoʻuí lolotonga ʻEne ngāue fakafaifekau ʻi he matelié pea mo e hili ʻEne Toetuʻú, ko Ia ʻa e Maama ʻo Māmaní (vakai, Sione 8:12; 3 Nīfai 15:9; 3 Nīfai 18:24). Naʻá Ne fakaafeʻi ʻEne kau ākongá ke “tuku ke ulo pehē hoʻomou māmá ʻi he ʻao ʻo e kakaí, koeʻuhí ke nau mamata ki hoʻomou ngaahi ngāue leleí, pea fakamālōʻia ʻa hoʻomou Tamai ʻa ia ʻoku ʻi he langí” (Mātiu 5:16; vakai foki, 3 Nīfai 12:16).

ʻI heʻetau hoko ko e kau ākonga ʻa Sīsū Kalaisí, mahalo te tau takitaha fehuʻi loto pē, “Te u tuku fēfē ʻa e maama ʻo e ʻAló ke ulo ʻiate aú?”

Mahalo te tau fakakaukau ke kamata hono tali e fehuʻi ko ʻení ʻaki ʻetau ʻiloʻi loto-houngaʻia ange e ngaahi founga lahi kuo vahevahe mai ai ʻe Sīsū Kalaisi ʻEne māmá mo kitautolú. Vakavakai holo! ʻOku ʻi he feituʻu kotoa pē ʻa ʻEne māmá! ʻOku tau vakai ki ai ʻi he fakaʻofoʻofa ʻo e tō ʻa e ʻuhá mo e mana ʻo e hopo ʻa e laʻaá. ʻOku tau ongoʻi ia ʻi he taimi ʻo e faingataʻá ʻi heʻetau ʻiloʻi Hono toʻukupu ʻaloʻofá ʻokú ne fakaʻatā ke tau lava ʻo fuesia ʻetau ngaahi kavengá pea ikunaʻi e fakapoʻuli ʻo e mamahí pe ilifiá. ʻOku tau tali ia ʻi heʻetau ʻiloʻi ko ʻetau mānava kotoa pē mo e ʻaho kotoa pē ʻi he māmaní ko ha faingamālie ia ke tau hoko ai ʻo hangē ko Iá:

“Ko e maama mo e moʻui ʻo e māmaní; ko e maama ʻoku ulo ʻi he poʻulí pea ʻoku ʻikai maʻu ia ʻe he poʻulí;

“ʻA ia naʻá ne ʻofa pehē ki māmani naʻá ne foaki ai ʻene moʻui ʻaʻaná, koeʻuhi ko kinautolu kotoa pē ʻe tuí te nau lava ʻo hoko ko e ngaahi foha ʻo e ʻOtuá” (Tokāteline mo e Ngaahi Fuakava 34:2–3).

ʻI heʻetau “nofo ʻi he fakafetaʻi fakaʻaho” (ʻAlamā 34:38) ʻi he maama kuo tau maʻú, ʻe tupulaki ʻetau loto-holi ke vahevahe ʻEne māmá mo e niʻihi kehé.

ʻI he tupulaki ko ia ʻetau holi ke maʻu mo vahevahe ʻa e māmá, te tau lava ʻo kole ki he Tamai Hēvaní ke tokoniʻi kitautolu ke ngāue ʻi ha ngaahi founga iiki mo mahuʻinga ke tuku ke ulo atu ʻa e maama ʻo Hono ʻAló ʻiate kitautolu. Mahalo ʻe ueʻi kitautolu ʻe he Laumālié ke tau malimali moʻoni ke fakafiefiaʻi ha ʻaho ʻo ha taha, lotua ha sola ʻoku faingataʻaʻia, fakakaukau angaʻofa ki hotau kaungāʻapí, pe fakafanongo fakalelei ki ha fānau. ʻI heʻetau talangofua ki he ngaahi ueʻi fakalaumālie ʻoku ʻomi tautautefito kiate kitautolú, ʻe lahi ange ʻa e fakahā fakataautaha ʻe hoko maí. Mahalo ʻe ueʻi kitautolu ke tau fili ke fiefia; ʻave ha pōpoaki ke langaki hake ha kaungāmeʻa; talaange ki ha mēmipa ʻo e fāmilí, “ʻOku ou ʻofa ʻiate koe”; fakamolemoleʻi moʻoni; pe kole fakamolemole koeʻuhí ko ha ngāue taʻefakakaukau. Ko e hā pē ʻa e ngaahi founga makehe ʻoku tākiekina ai kitautolu ke fakaulo atu e maama ʻo e ʻAló, ʻe ʻomi ʻe heʻetau angaʻofá mo e ʻofá ha fiefia lahi kiate kitautolu mo e niʻihi kehé—pea ʻi he tokoni ʻa e ʻEikí, ʻe fakaofo ʻa e ngaahi ola fakakātoá!

Kuo mahino lelei ange kiate au ʻoku fakahoko ʻe he māmá ha meʻa matuʻaki makehe. Kuó u ʻiloʻi kakato ange ʻa e moʻoni mahuʻinga ko ʻení: “Ko e meʻa ko ia ʻoku mei he ʻOtuá, ko e māmá ia; pea ko ia ia ʻokú ne maʻu ʻa e māmá, pea fai atu ai pē ʻi he ʻOtuá, te ne maʻu ʻa e maama lahi ange; pea ʻe tupulaki ʻa e maama ko iá ʻo ngingila ange kae ʻoua ke aʻu ki he ʻaho haohaoá” (Tokāteline mo e Ngaahi Fuakava 50:23–24).

ʻOku ou fakafetaʻi loto-fakatōkilalo ki he Tamaí ko Hono ʻAlo ʻOfaʻangá pea mo hono fakaʻatā kitautolu ke tokoni kiate Ia ʻi hono fakamaama ʻa e māmaní!