Talitali Lelei Kimoutolu ki he Makasini ko ʻEní
Ngaahi Meʻa Mahuʻinga mei he Konifelenisi Lahi Fakataʻu Hono 193
Naʻe pehē ʻe Palesiteni Lāsolo M. Nalesoni ʻi he fakaʻosinga ʻo e Konifelenisi Lahi Fakataʻu Hono 193 ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, “Kuo fafanga fakalaumālie kitautolu ʻi he ongo ʻaho ʻe ua ko ʻení” (vakai, peesi 127). Naʻe kau ʻi he keinanga [fakalaumālie] ko iá ʻa e faleʻi ke faʻifaʻitaki ki he Fakamoʻui ko Sīsū Kalaisí—ʻo fetongi ʻa e fakakikihí ʻaki ʻa e ʻofa faka-Kalaisí, manavaʻofá, mo e melinó (vakai, Palesiteni Nelson, peesi 98; vakai foki, ʻEletā Christofferson mo ʻEletā Soares, peesi 77 mo e 85).
Naʻe pehē ʻe Palesiteni Nalesoni, “ʻOku ou fakaafeʻi kimoutolu ke mou vakavakaiʻi homou tuʻunga fakaākongá ʻo fakatatau mo hoʻomou tōʻonga ki he niʻihi kehé. ʻOku ou tāpuakiʻi kimoutolu ke mou fai ha faʻahinga liliu pē ʻe fiemaʻu koeʻuhí ke fakaʻeiʻeiki, fakaʻapaʻapa, mo fakafofofongaʻi ʻe homou ʻulungāngá ha tokotaha ʻoku muimui moʻoni kia Sīsū Kalaisi” (peesi 98)
Naʻe fakahā ʻe he kau taki kehe ʻo e Siasí, fakataha mo Palesiteni Nalesoni, ko e tali ki heʻetau ngaahi fehuʻí, faingataʻaʻiá, siva e ʻamanakí, mo e molé ʻoku maʻu ia ʻi he sīpinga, ngaahi akonaki, Fakalelei mo e Toetuʻu ʻa e Fakamoʻui ko Sīsū Kalaisí, ʻa ia ʻokú Ne foaki mai kiate kitautolu ʻa e “meʻaʻofa ʻo e melinó” (Palesiteni Eyring, peesi 29; vakai foki, Palesiteni Oaks, peesi 102; Palesiteni Johnson, peesi 81; pea mo ʻEletā Meurs, peesi 39). Naʻe fakalotolahi mai ʻa e kau leá ke tau tokanga taha ki he Fakamoʻuí (vakai, ʻEletā Camargo, peesi 64), moihū kiate Ia (vakai, ʻEletā Stevenson, peesi 6), haʻu kiate Ia (vakai, Palesiteni Cordon, peesi 10), fakamālohia ʻetau fakamoʻoni kiate Iá (vakai, Palesiteni Ballard, peesi 105), ngāue fakaetauhi ʻo hangē ko ʻEne ngāue fakaetauhí (vakai, ʻEletā Gong mo ʻEletā Uceda, peesi 16 mo e 70), pea fakatupulaki ʻetau tuʻunga fakaākongá (vakai, ʻEletā Bednar, Rasband, mo Bragg, peesi 123, 108, mo e 60).
Naʻe toe poupouʻi mai foki ʻe he kau taki ʻo e Siasí ke tau mataʻikoloa ʻaki ʻetau tāpuaki fakapēteliaké. Naʻe faleʻi ʻa kinautolu kuo teʻeki ke maʻu honau tāpuaki fakapēteliaké ke nau lotua ʻa e “taimi totonu” ke maʻu ai honau tāpuakí (vakai, ʻEletā Bennett mo ʻEletā Yamashita, peesi 42 mo e 88).
Naʻe fakamanatu mai ʻe Palesiteni Nalesoni, ʻa ia naʻá ne fanongonongo ʻe langa ha temipale foʻou ʻe 15, “Ko Sīsū Kalaisi ʻa e ʻuhinga ʻoku tau langa ai e ngaahi temipalé” (peesi 127; vakai foki, ʻEletā Renlund, ʻEletā De Hoyos, mo ʻEletā Duncan, peesi 35, 52, mo e 95).
Naʻa tau hikinimaʻi ha Kau Fitungofulu Taki Māʻolunga foʻou ʻe toko nima, ko ha Kau Palesitenisī Lahi foʻou ʻo e Kau Finemuí, mo ha mēmipa foʻou ʻo e Kau Palesitenisī Lahi ʻo e Kau Talavoú, lolotonga iá ʻoku ʻoatu ha fakamālō loto-hounga kiate kinautolu naʻe tukuange pe ʻe tukuange ʻi he ʻaho 1 ʻo ʻAokosi 2023.
ʻI heʻetau toe vakai ki he konifelenisi lahí, ako e ngaahi pōpoakí, pea “fakalaulauloto ki he ngaahi moʻoni naʻe akoʻí” (Palesiteni Nelson, peesi 127), te tau ongoʻi fakataha ai mo kinautolu naʻe leá, ha holi ke talanoa, fiefia, malanga ʻaki, mo fakamoʻoni kia Sīsū Kalaisi—ko e tupuʻanga ʻo hotau fakamoʻuí (vakai, 2 Nīfai 25:26).