“Elder Alan T. Phillips,” Liahona, Mē 2023.
ʻEletā Alan T. Phillips
Fitungofulu Taki Māʻolunga
Talu mei he kei siʻi ʻa ʻEletā ʻAlani T. Filipé mo ʻene ongoʻi ʻoku moʻoni ʻa e Siasí, ka naʻá ne fakaʻamu ke maʻu ha fakamoʻoni fakafoʻituitui ʻoku lahi angé ki he Fakamoʻuí kimuʻa peá ne ʻalu ʻo ngāue fakafaifekau taimi kakató.
Naʻá ne pehē, “Naʻá ku ʻaukai, lotu, ʻalu ki he vaotaá. Naʻá ku fekumi ki he tali mahuʻingá.”
Ka ‘i ha uike ʻe taha lolotonga ‘a e mavahe hono fāmilí ke fai ha ngāue ne vahe ange, naʻá ne ʻalu toko taha pē ki he houalotu sākalamēnití.
Naʻá ne pehē, “Naʻe ʻikai ke u fekumi. Naʻá ku ʻi ai pē—ʻo teuteu ki he sākalamēnití mo hiva fakataha mo e haʻofangá. Ko e fuofua taimi ia, naʻe ongo mālohi mo fakafokifā ai kiate au ʻa e fakakaukau ʻo [hono] ʻ[tutuki mo e] tafe ʻa e taʻataʻá mei Hono nimá ke totongi ʻa e moʻua ʻo ʻeku hiá’1. Naʻá ku ongoʻi ʻa ʻEne felāveʻi moʻoni kiate aú, ʻo ʻikai ko ha fakakaukau pē, pea ʻikai ke toe fakaʻalongaua. ʻI he foʻi mōmeniti ko iá, naʻá Ne hoko ko hoku Fakamoʻuí.”
Kimui angé, naʻe lotu ʻa ʻEletā Filipe ʻo fakamālō ki he Tamai Hēvaní mo talaange kiate Ia te ne tauhi totonu ʻi he toenga ʻo ʻene moʻuí ki he ʻilo foʻou ko ʻeni kuo foaki ange ʻe he ʻOtuá maʻaná.
Ko e mōmeniti ia naʻe fakapapauʻi ange ai kiate ia ʻa e moʻoni ʻo e Fakamoʻuí. Naʻá ne pehē ko e meʻa kotoa pē ʻi heʻene fakamoʻoní ʻoku tupu ia mei he “makatuʻunga mālohi” ko iá (Hilamani 5:12).
Naʻe fāʻeleʻi ʻa ʻAlani Tōmasi Filipe ʻi Keni, ʻIngilani ʻi Sune 1970 pea naʻá ne tupu hake ʻi Pakingihemisia, ʻIngilani. Naʻá ne mali mo Linisei ʻIoka ʻi Siulai 2005 ʻi he Temipale Mesa ʻAlesoná. ʻOku ʻi ai ʻena fānau ʻe toko fā pea ʻokú na mēmipa ʻi he Siteiki fakahisitōlia ʻa e Siasí ko Haiti Paʻake ʻi Lonitoní.
Naʻe maʻu ʻe ʻEletā Filipe ha mataʻitohi BA mo ha mataʻitohi MA mei he Akoʻanga Fakaʻekonōmika mo e Saienisi Fakapolitikale ʻo Lonitoní. Kuó ne ngāue ki ha ngaahi kautaha kehekehe ʻi he pisinisí, meʻa fakapaʻangá, mo e akó, ʻo kau ai ʻa e taʻu ʻe fā kuohilí kuó ne hoko ko e talēkita fakaʻekatēmika ʻo e Senitā ʻUnivēsiti Pilikihami ʻIongi ʻi Lonitoní.
Naʻe ngāue fakafaifekau taimi kakato ʻa ʻEletā Filipe ʻi he Misiona ʻIngilani Manisesitaá. Kuó ne hoko foki ko ha tokoni ʻi he Kau Palesitenisī Fakaʻēlia ʻo ʻIulope Noaté, Fitungofulu Fakaʻēlia, palesiteni fakasiteiki, tokoni ʻi he kau palesitenisī fakasiteikí, aleaʻanga māʻolunga, mo ha tokoni ʻi he kau pīsopelikí.