ʻEletā Christophe G. Giraud-Carrier

ʻI he matuʻotuʻa feʻunga ʻa ʻEletā Kulisitofā G. Silaiti-Kaliá, naʻe ʻi ai haʻane ngaahi palani maʻongoʻonga—ke kamata ako mālohi ʻi he ʻunivēsití, toloi e feinga fakaakó ke ngāue fakafaifekau taimi kakato, mali mo hono ʻofaʻanga ne talu ʻena kaumeʻa ʻi he kei taʻu hongofulu tupú, pea kamata leva ʻene faʻu fāmilí ʻaki ʻene ngāue ko ha ʻenisinia ʻi hono fonua tupuʻanga ko Falaniseé.

Neongo naʻe hoko ʻa e ngāue fakafaifekaú mo e malí ʻo fakatatau mo ʻene palaní, ka naʻe ʻikai hoko ʻa e meʻa tatau ki heʻene ngaahi fakatuʻamelie kehé. Naʻe ʻikai hoko ʻa e toloi ʻo ʻene meʻa fakaakó, ka naʻá ne hiki ki he ʻUnivēsiti Pilikihami ʻIongí (BYU), pea hoko atu ai mo ha fakaʻamu ke faiako ʻi he ʻunivēsití. Naʻe tātaaitaha ke maʻu ha ngāue ʻi he ʻunivēsití ʻi Falanisē ki ha taha naʻe ako mavahe mei he fonuá, ko ia naʻe hoko leva ʻa hono tauhi ʻo ha fāmilí, maʻu ha ngāue maʻuʻanga moʻui kehe, pea ngāue ʻi he Siasí ʻi ha ongo fonua kehekehe pea fakatatau mo e taimi-tēpile ʻa e ʻEikí.

Naʻe pehē ʻe ʻEletā Silaiti-Kalia, “Ko e foʻi moʻoni ko ia ʻoku siʻisiʻi ke hoko ha ngaahi meʻa ʻo fakatatau mo e founga ne ma palani ki aí, kuó ne fakaʻatā ke ma fakatou fakatokangaʻi kapau te ma tuku ke fai ʻe he ʻEikí ʻa Hono finangaló ʻo ʻave kimaua ki ha ngaahi feituʻu, pea ko e feituʻu leva ia ʻokú Ne finangalo ke ma ʻi aí pea ko e feituʻu ia te ma lava ʻo ngāue aí. Kuo tokoni ia kiate kimaua ke ma ako ke falala kiate Ia, ke falala te Ne lava ʻo ngaohi ʻema moʻuí ke mahulu ange ʻi he meʻa naʻá ma mei lavá.”

Naʻe fāʻeleʻi ʻa Kulisitofā Kēlati Silaiti-Kalia ʻi he ʻaho 21 ʻo Sānuali 1966, ʻi Laioni, Falanisē, kia Kēlati Silaiti-Kalia mo Ane Silaiti-Kalia. Hili ʻene ngāue fakafaifekau taimi kakato ʻi he Misiona Kānata Monitilioló, naʻá ne mali mo ʻIsapela Sōfia Maʻukelela ʻi Siulai ʻo e 1988 ʻi Sōleti, Falanisē. Naʻá na sila ʻi he hili ha ʻaho ʻe tolu mei ai ʻi he Temipale Peni Suisalaní. Ko ha ongomātuʻa kinaua ki ha fānau ʻe toko valu.

Hili ʻa e maʻu hono mataʻitohi BA, MA, mo e toketā ʻi he saienisi ʻo e komipiutá mei BYU, naʻe ngāue ʻa ʻEletā Silaiti-Kalia ko ha faiako māʻolunga ʻi he ʻUnivēsiti ʻo Pilisitolo ʻi ʻIngilaní pea mo ha pule lahi ʻi he ELCA Informatique ʻo Suisalaní kimuʻa ia peá ne hoko ko ha palōfesa ʻi he saienisi fakakomipiutá ʻi ha taʻu ʻe 19 ʻi BYU.

ʻI he taimi ne uiuiʻi ai ʻa ʻEletā Silaiti-Kalia ke hoko ko ha Fitungofulu Taki Māʻolungá, naʻá ne lolotonga hoko ko e palesiteni ʻo e Siteiki Polovo ʻIutā 16 maʻá e Kau Taautaha Lalahi kei Talavoú. ʻOku kau ʻi hono ngaahi uiuiʻi faka-Siasi kimuʻá ʻa e ngāue ko e palesiteni ʻo e Misiona Falanisē Laioné, aleaʻanga māʻolunga, mo e pīsope.