Brother Michael T. Nelson

Kia Brother Maikolo T. Nalesoní, ko e taimi naʻá ne hoko ai ko ha palesiteni fakamisioná naʻe fakapapauʻi ai kiate ia ko hono akoʻi ko ia ʻa e ngaahi tefitoʻi moʻoni totonú ki he toʻu tangata kei tupu haké pea falala kiate kinautolú, ʻe tupu ai ʻa e ngaahi ola lelei tahá—ʻo tatau pē ki he ngāue fakafaifekaú pea mo e moʻui ʻa e kau faifekaú fakafoʻituitui.

“Ko e fakakaukau mahuʻinga tahá ko e falalá. Naʻa mau ako ke falala kiate kinautolu,” ko ʻene lea ia fekauʻaki mo e ngāue mo e kau faifekau taimi kakató ʻi he Misiona Kalefōnia Seni Penatinó, ʻa ia naʻe hoko ai ʻa e fāmili Nalesoní ko ha taki fakamisiona mei he 1998 ki he 2001.

ʻOku pehē ʻe Brother Nalesoni kuo hoko ʻa e akó—mo hono ʻoange ki he kakai kei talavoú ʻa e faingamālie ke takí—ko ha konga mahuʻinga ia ʻo ʻene ngāue ʻi he Siasí pea ʻe kei pehē ai pē ʻi hono uiuiʻi foʻou ʻi he Kau Palesitenisī Lahi ʻo e Kau Talavoú. ʻI he taʻu ʻe tolu kuohilí, kuo hoko ai ʻa Brother Nalesoni ko e sekelitali pule ki he Kau Palesitenisī Lahi ʻo e Kau Talavoú. ʻI he taʻu ʻe ua kimuʻá, naʻá ne hoko ko ha mēmipa ʻo e Fakataha Alēlea Faifaleʻi ʻa e Kau Talavoú.

Naʻe fāʻeleʻi ʻa Maikolo Teli Nalesoni ʻi he ʻaho 10 ʻo Sune 1956, ʻi Sōleki Siti, ʻIutā, USA, kia Monitī Kēnoni mo Viola ʻIlisa Nalesoni pea naʻá ne tupu hake ʻi he feituʻu Sōlekí. Hili ʻene ngāue ʻi he Misiona Silei Sanitiakó, naʻá ne ako ki he ngaahi founga fetuʻutaki ʻi loto ʻi ha kautahá ʻi he ʻUnivēsiti Pilikihami ʻIongí pea mo e ʻUnivēsiti ʻo ʻIutaá. ʻI he 1982, naʻá ne mali ai mo Papulā Felekisā ʻi he Temipale Vaitafe Soataní. Naʻe nofo ʻa e fāmili Nalesoní ʻi Senitī, ʻIutā, kimuʻa peá na hiki ki Ualesipoki, ʻIutaá. ʻOku ʻi ai haʻana fānau ʻe toko hiva.

ʻOku hoko ʻa Brother Nalesoni ko e ʻōfisa pule ʻi he meʻa fakapaʻangá ʻi ha kautaha ʻinivesi paʻanga mo fakatau kelekele fakakomēsiale mo e ʻapi nofoʻanga. ʻOku fakalele foki ʻe he fāmili Nalesoní, kau ai mo ha fānau ʻe toko ua ʻoku nofo ʻi honau ʻapí, ha kiʻi faama ʻi honau ʻapí. ʻOku pehē ʻe Brother Nalesoni, ʻoku totonu ke mahuʻinga ki he toʻu tupu ʻo e Siasí ke nau longomoʻui mo fakaʻaongaʻi ha taimi ʻi tuʻa, ʻo hangē ko ia kuo fakahoko ki hono fāmilí.

Kuo hoko ʻa Brother Nalesoni ko ha palesiteni fakasiteiki, tokoni ʻi he kau palesitenisī fakasiteikí, sekelitali pule ʻi he siteikí, pīsope, mo ha palesiteni Talavou ʻi he uōtí mo e siteikí. Naʻá ne tokoni ʻi he kumi paʻanga, lesisita, mo e fokotuʻutuʻu ngāue ʻi he 1997 ki he taʻu 150 ʻo e fononga saliote naʻa nau toe fakafaivaʻi ʻa e fononga ʻa e fuofua kulupu paioniá ki he Teleʻa Sōlekí.