ʻEletā J. Kimo Esplin

Hili ha ngaahi māhina siʻi mei he ngāue fakafaifekau ʻa ʻEletā J. Kimo ʻEsipliní, naʻá ne ʻi ha fakatamaki ʻi ha meʻalele ʻo mate ai ʻene tangataʻeikí. Hili pē ha ngaahi māhina siʻi mei ai, naʻe tuiʻi ʻene meʻalelé mei mui lolotonga ia ʻoku heka ʻene faʻeé ʻi he tafaʻakí. Naʻe tāfisi ʻa e kaá, pea naʻe mate ai ʻene faʻeé mo hono ʻilamutú.

Neongo ʻa e ngaahi faingataʻa mo e mamahi kuó ne fouá, ka ʻoku pehē ʻe ʻEletā ʻEsiplini ʻokú ne monūʻia. ʻOkú ne tekaki ʻa e ongo ko iá ki he ʻEikí mo ʻEne leleí mo e ʻaloʻofa ongongofuá.

Naʻá ne pehē, “Kuo fakaʻofoʻofa ʻa e moʻuí.”

Ko e taha ʻo e ngaahi kupuʻi lea ʻokú ne saiʻia taha aí ko e “ʻOku ʻikai fai ia ʻe he ʻEikí kiate koe; ʻokú Ne fai ia maʻau.”

ʻI he hili ʻa e mālōlō ʻo ʻene ongomātuʻá, naʻe tokoni hono ngaahi tuofāfine lalahí ke ʻave ia ʻo fakaakoʻi ʻi muli ʻi he Senitā ʻo e ʻUnivēsiti Pilikihami ʻIongi ʻi Selusalemá. Naʻá ne fetaulaki ai mo Kei Teivisi.

Naʻá na kaungāmeʻa lelei ʻi he nofo kemi ʻena kulupú ʻi he toafa Sainaí, naʻá na ngāue ʻi ha ngoue siaine, mo ako fakataha ʻa e Fuakava Motuʻá mo e Fuakava Foʻoú.

Hili ʻena foki ki Polovo, ʻIutaá, naʻe kamata ke na teiti. Naʻá na mali ʻi he Temipale Sōlekí ʻi Tīsema 1985. ʻOkú na maʻu ha fānau ʻe toko valu.

Naʻe fāʻeleʻi ʻa Sione Losi Kimo ʻEsipilini ʻi he ʻaho 18 ʻo ʻAokosi 1962, ʻi Kahuku, Hauaiʻi, USA. Ko e siʻisiʻi taha ia—mo e tamasiʻi pē ʻe taha—ʻi he fānau ʻe toko valu ʻa Losi S. mo ʻŌlive Ola Muti ʻEsipliní.

Naʻe maʻu ʻe ʻEletā ʻEsipilini ha mataʻitohi ʻi he tauhitohí mei he ʻUnivēsiti Pilikihami ʻIongí ʻi he 1987. Hili ʻene hiki mo hono fāmilí ki Sikākou, ʻIlinoisí, naʻe kamata ʻene ngāue ʻi he ʻinivesi paʻangá pea maʻu hono mataʻitohi M.A. ʻi he fakalele pisinisí.

ʻI he taimi naʻe hoko ai ʻa ʻEletā ʻEsipilini ko e tokoni palesiteni lahi mo e ʻōfisa pule fakapaʻanga ki he kautaha Huntsman Corporation, naʻe hiki taimi nounou ʻa e fāmilí ki Pelisiume kimuʻa pea nau toki hiki ʻo nofo ʻosi ʻi Haiti Kotoniuti, ʻIutaá.

Naʻe hoko ʻa ʻEletā ʻEsipilini ko ha Fitungofulu Fakaʻēlia ʻi he taimi naʻe uiuiʻi ai ia ke hoko ko ha Fitungofulu Taki Māʻolungá, naʻá ne hoko ko ha palesiteni fakamisiona ʻi he ongo Misiona Siapani Tōkiō mo Siapani Tōkiō Sauté. ʻI heʻene hoko ko ha faifekau taimi kakato kei talavoú, naʻá ne ngāue fakafaifekau ʻi he Misiona Siapani Kopeí. Kuó ne hoko foki ko ha palesiteni fakasiteiki, aleaʻanga māʻolunga, mo ha pīsope.