“Sisitā Andrea Muñoz Spannaus,” Liahona, Mē 2023.
Sisitā Andrea Muñoz Spannaus
Tokoni Ua ʻi he Kau Palesitenisī Lahi ʻo e Kau Finemuí
Lolotonga ʻa e kei iiki ʻa ʻEnitulea Velonika Munosa mo hono ngaahi taʻoketé ʻi ʻĀsenitiná, naʻa nau ako ʻi ha ʻapiako Katolika. Naʻe teʻeki pē ke nau ʻilo ki ha toe akonaki fakalotu kehe kae tālunga mo e taʻu hiva ʻa ʻEnituleá. Ko e taimi ia naʻe kamata akoʻi ai ʻe he ongo faifekau ʻo e Siasí ʻa hono fāmilí fekauʻaki mo e ongoongolelei kuo fakafoki maí.
ʻI he hili pē hono fakaʻosi ʻe he ongo faifekaú ʻena lēsoní peá na mavahé, naʻe fakamatalaʻi ange ʻe he faʻē ʻa ʻEnituleá ʻoku ʻikai ke taha pē ʻa e tui fakalotú. Naʻe fehuʻi ange ʻe ʻEnitulea ki heʻene faʻeé pe ko e siasi fē ʻokú ne pehē ʻokú ne fakafofongaʻi lelei taha ʻa e ʻOtuá. Naʻe tali ange ʻe heʻene faʻeé, “ʻOku ou tui ko e siasi ko ʻení”—ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻa ē naʻe toki ako ai kinautolu ʻe he ongo faifekaú.
ʻI he kotoa ʻo e moʻui ʻa ʻEnituleá, kuó ne “fakaʻamu maʻu pē ke ne fakahoko ha ngāue fakahōifua ki he ʻOtuá,” ko ia naʻá ne hohaʻa ai ki hono tali ha tui fakalotu foʻoú. Ka neongo ia, naʻe taimi siʻi pē ʻa ʻene maʻu ʻa e ongo ko iá, pea naʻe fetongi ia ʻaki ha loto-holi ke ʻilo lahi ange ki he Siasí.
Naʻe pehē ʻe Sisitā Sipanasa, naʻe papitaiso ʻa e fāmilí, “pea naʻa mau kamata ha moʻui foʻou. Naʻe fakaʻofoʻofa ʻaupito ʻa e founga ne liliu ai ʻemau moʻui fakafāmilí maʻamautolu kotoá.”
Naʻe fāʻeleʻi ʻa ʻEnitulea Velonika Munosa Sipanasa ʻi he ʻaho 18 ʻo Mē 1968, ʻi Puenosi ʻAealesi, ʻĀsenitina, kia Kālosi ʻAlipate Munosa mo ʻElita Manakusi. Naʻá ne tupu hake ʻi Pika, ʻĀsenitina. Naʻá ne mali mo ʻAlani Sipanasa ʻi he Temipale Puenosi ʻAealesi ʻĀsenitiná ʻi ʻOkatopa 1992. Ko ha ongomātuʻa kinaua ki ha ʻofefine ʻe toko ua.
Naʻe maʻu ʻe Sisitā Sipanasa ha mataʻitohi ʻi he ako tokamuʻá, pea naʻá ne ako ʻa e tā fakatātaá mo e teuteu lotofalé. ʻOkú ne lolotonga ngāue ʻi he fakataha alēlea faifaleʻi ʻa e Fineʻofá. Naʻá ne ngāue kimuʻa ʻi he Kōmiti ki he Konifelenisi Ki Hono Fakamālohia ʻo e Toʻu Tupú ʻi he ʻĒlia ʻAmelika Tonga Sauté, ʻi he Kōmiti Konifelenisi ʻa e KFT ʻi ʻIutā Latinó, pea naʻá ne hoko mo hono husepānití ko ha taki ʻi he Misiona Mekisikou Kuelanavaká.
Naʻá ne hoko foki ko ha palesiteni ʻi he Fineʻofá, Kau Finemuí, mo e Palaimeli ʻi he uōtí, faiako semineli pongipongi, ʻetivaisa ki he taautaha kei talavoú ʻi he uooti lea faka-Sipeiní, pea mo ha faifekau ʻi he Misiona ʻĀsenitina Lesitenisiá.