Ko e ʻAʻahi ʻa Palesiteni Sionisoni mo Palesiteni Kōtoni ki ʻAfiliká

Naʻe ō ʻa e ongo Palesiteni Lahi ʻo e houalotu ʻa e Fineʻofá mo e Kau Finemuí ki he fakahahake mo e lotoloto ʻo ʻAfiliká ʻi Māʻasi ke feʻiloaki mo e Kāingalotu ʻo e Siasí mo ha kau taki fakapuleʻanga pea mo ʻaʻahi ki he ngaahi feituʻu tokoni ʻofa fakaetangatá. Naʻe kamata ʻa e ʻaʻahi ʻaho hiva ʻa e Palesiteni Lahi ʻo e Fineʻofá ko Kamila N. Sionisoni mo e Palesiteni Lahi ʻo e Kau Finemuí ko Poni H. Kōtoní ʻi Nailopi, Keniā.

Naʻe folau ʻa Palesiteni Kōtoni ki Keniā, ʻIukanitā, Lepapulika Fakatemokālati ʻo Kongokoú, pea mo e Lepapulika ʻo Kongokoú. Naʻe pehē ʻe Palesiteni Kōtoni, “Kuó ma talanoa ki he kau taki ʻo e ngaahi puleʻangá ʻa ia ʻoku nau maʻu ha holi ke tokoniʻi ʻa e ngaahi fāmilí, pea kuo fakalotoa fakalaumālie kimaua ʻe he kau taki ʻoku nau fie muimui ʻia Sīsū Kalaisí. ʻI heʻetau hoko ko e kau taki tui fakalotú, ʻoku tau fevahevaheʻaki ha taumuʻa tatau ke tokoni ki hono langa hake ʻo e ngaahi fāmilí, pea naʻe fakaofo ia.”

Naʻe folau ʻa Palesiteni Sionisoni ki he fakatokelau-hahake ʻo ʻIukanitaá mo e UNICEF (ʻa ia naʻe ʻuluaki ui ko e Paʻanga Tokoni Fakatuʻupakē Fakavahaʻapuleʻanga ʻa e Fānaú, ka ʻoku ui he taimí ni ko e Paʻanga ʻa e Ngaahi Puleʻanga Fakatahatahá maʻá e Fānaú) pea fakataha mo e Kāingalotu ʻo e Siasí ʻi Lupumipasí, ko e Lepapulika Fakatemokālati ʻo Kongokoú. “Ko ha ngāue ʻeni ʻoku fiemaʻu ke ope atu ʻi hotau kāingalotú ke tokoniʻi ʻa e ngaahi fiemaʻu—ʻa e ngaahi fiemaʻu tokoni ʻofa fakaetangata—ʻa e longaʻifānau ʻi he funga ʻo e māmaní, pea ne mau ʻilo kinautolu. Naʻe nāunauʻia ia,” ko e lea ia ʻa Palesiteni Sionisoni ʻi heʻene folau mo e UNICEF. “Naʻe ongo fakamāfana mo fakatupu loto-mamahi ʻaupito ia ʻi he taimi tatau pē, ka naʻá ku mavahe mei ai mo ha ongoʻi fakatuʻamelie.”