ʻEletā Ahmad S. Corbitt

ʻOku pehē ʻe ʻEletā ʻĀmeti S. Kōpeti naʻe tokoni ʻa e ngāue fakaetauhi ʻi he funga ʻo e māmaní ʻi heʻene hoko ko ha tokoni ʻi he Kau Palesitenisī Lahi ʻo e Kau Talavoú ke ne maʻu ai ʻi heʻene uiuiʻi foʻoú “ha ivi lahi ange ke fakafanongo ki he tataki mo e fakahinohino fakaepalōfitá mo fakaeʻaposetoló ʻi he tokanga mo ha tui ʻoku tupulaki.”

Naʻe uiuiʻi ʻa ʻEletā Kōpeti ke ngāue ʻi he Kau Palesitenisī Lahi ʻo e Kau Talavoú ʻi ʻEpeleli 2020, kuó ne ngāue ʻi he taʻu ʻe tolu kuohilí mo ha kau taki kehe ʻo e toʻu tupú ke fakamālohia ʻa e toʻu tangata kei tupu haké pea fakaafeʻi kinautolu ke nau kau longomoʻui mai ʻi he ngāue ʻo e fakamoʻuí mo e hakeakiʻí.

Naʻá ne pehē, “ʻOku ʻikai ke u tui ʻe teitei hōloa ʻeku ongoʻi ʻa e fuʻu fiemaʻu fakavavevave ke fakamālohia ʻa e toʻu tangata kei tupu haké. Te nau hoko ko ha kau takimuʻa lelei ange ʻi he tuʻunga ʻoku tau ʻi aí koeʻuhí kuo nau tupu hake mo ha ngaahi faingamālie ke fakahoko ai ʻa e ngāue ʻo e fakamoʻuí mo e hakeakiʻí ʻi ha ngaahi founga ʻoku māʻolunga mo māʻoniʻoni angé.”

Naʻe fāʻeleʻi ʻa ʻĀmeti Salimi Kōpeti, taʻu 60, ʻi he ʻaho 16 ʻo ʻAokosi 1962, kia Sēmisi ʻEli Kōpeti mo ʻAmelia Kōpeti, ʻi Filatelafia, Penisilivēnia, USA. ʻI he hoko ʻa e taʻu 18 ʻo ʻĀmetí, naʻá ne kau ai ki he Siasí, ʻo muimui ʻi heʻene faʻeé mo ha niʻihi ʻo hono ngaahi tokouá mo e tuofāfiné ki he vai ʻo e papitaisó. Naʻe papitaiso ʻa e mali ua ʻo ʻene faʻeé ʻi he taʻu hono hokó.

Hili ʻa ʻene ako ʻi he Kolisi Likí (ko e ʻUnivēsiti Pilikihami ʻIongi–ʻAitahō he taimi ní) pea ngāue fakafaifekau ʻi he Misiona Pueto Liko Seni Huaní mei he 1982 ki he 1984, na‘á ne fetaulaki ai mo Sēini Sosilini lolotonga ha ʻaʻahi ʻa e kau taautaha lalahi kei talavoú ki he temipalé. Naʻe mali ʻa e ongomeʻá ni ʻi ʻAokosi 1985 ʻi he Temipale Uāsingatoni D.C. Ko ha ongomātuʻa kinaua ki ha fānau ʻe toko ono.

ʻOku maʻu ʻe ʻEletā Kōpeti ha ngaahi mataʻitohi mei he ʻUnivēsiti Sitokitoni he taimí ni ʻi Niu Sēsií pea mo e Akoʻanga Lao ʻo e ʻUnivēsiti Lutikasí. Kuó ne hoko ko ha palesiteni ʻo e Misiona Lepapulika Tominikeni Sanitō Tomingikou Hahaké, palesiteni fakasiteiki, tokoni ʻi ha kau palesitenisī fakasiteiki ʻe ua, mo ha aleaʻanga māʻolunga.

Kuo ngāue ʻa ʻEletā Kōpeti ko ha loea ʻi he fakamaauʻangá, ʻi he fetuʻutaki mo e kakaí pea mo e puleʻangá, hoko ko ha talēkita ʻo e ʻŌfisi Fetuʻutaki mo e Kakaí mo e Ngaahi Meʻa Fakavahaʻapuleʻanga ʻa e Siasí ʻi Niu ʻIoké, pea mo ha mataotao fakaʻēlia ʻi he misioná.