Palesiteni Emily Belle Freeman

Mahalo kuo ʻosi maheni ha kakai tokolahi mo ʻEmelī Pele Filimana ko ha tokotaha lea, tokotaha faʻu tohi, tokotaha fakamatala ʻi he ʻinitanetí (podcaster), mo ha faiako. Ka ʻoku fakaʻamu ʻa Palesiteni Filimana ki he niʻihi ʻoku ʻikai ke nau ʻiloʻi iá—pea naʻa mo kinautolu ʻoku nau ʻilo iá—ko e ʻuluaki meʻa pē ke nau ʻilo fekauʻaki mo iá ʻokú ne maʻu ha tui lahi mo taʻe-ueʻia kia Sīsū Kalaisi.

Naʻe pehē ʻe Palesiteni Filimana, “ʻOku fakafou ʻi he ngaahi meʻa kuó u aʻusia fakataautaha mo Iá ʻa ʻeku ʻiloʻi ʻa e Tamai Hēvaní pea kuó u aʻusia ai ʻa e fakahaá. Kuo hoko ia ko e meʻa mahuʻinga taha ʻi heʻeku moʻuí—ʻa e takaua mo Ia ʻi he toenga ʻo ʻeku moʻuí.”

ʻI he kamata ʻene ngāue ko ha tokotaha faʻu tohí mo e tokotaha fakamatala ʻi he ʻinitanetí, naʻá ne fehuʻi pē kiate ia pe ko e hā ʻa e meʻa ʻokú ne fakaʻamu ke nofotaha aí. Ko e talí ko e fakamoʻoni kia Sīsū Kalaisi mo ʻEne Fakaleleí.

Naʻe fāʻeleʻi ia ʻi he ʻaho 31 ʻo Tīsema 1969, ʻi Positoni, Masasūseti, USA, lolotonga ʻa e ako ʻa ʻene tangataʻeiki ko Makinilī Makavisi ʻOsiualití ʻi he ʻUnivēsiti Hāvatí. Naʻe pehē ʻe Palesiteni Filimana ko ʻene faʻē ko Lesilī Sēmisi ʻOsiualití ko e taha ia ʻo e kau fafine “ivi lahi mo ʻofa lahi.”

Naʻe tupu hake ʻa Palesiteni Filimana, ko e lahi taha ia ʻi ha fānau ʻe toko ono ʻi Senitī, ʻIutā. Naʻe liliu ʻene moʻuí lolotonga ʻene taʻu fakaʻosi ʻi he ako māʻolungá ʻi he taimi naʻe uiuiʻi ai ʻene ongomātuʻá ke na taki ʻa e Misiona Kalefōnia Venitulá. Naʻá ne kau mo hono ngaahi tokouá mo e tuongaʻané ʻi he konifelenisi fakamisiona, fakasouni, mo e konifelenisi fakasiteiki kotoa pē fakataha mo ʻenau mātuʻá. Hili ʻa e ako māʻolungá, naʻá ne mavahe mei Kalefōnia ke ako ʻi he ʻUnivēsiti Pilikihami ʻIongí.

ʻI he taimi naʻe foki mai ai ʻa Kelekōlio Kaafi Filimana ki ʻapi ki Mahu, ʻIutaá, he naʻá ne ngāue ʻi he Misiona Kalefōnia Venitulá, naʻe kole ange ʻe heʻene ongo taki fakamisioná ke ʻalu ʻo sio ʻi he lea ʻa hona ʻofefiné ʻi ha taha ʻo ʻene ngaahi fatongia lea ʻi ʻIutaá. Naʻe kamata teiti leva ʻa ʻEmelī mo Kelekōlio pea naʻá na mali ʻi Tīsema 1989 ʻi he Temipale Losi ʻEniselisi Kalefōniá. ʻOkú na maʻu ha fānau ʻe toko nima.

Kuo faʻu ʻe Palesiteni Filimana ha ʻū tohi lahi pea kuó ne lea ʻi ha ngaahi konifelenisi, ako fakataukei, mo ha ngaahi fakatahaʻanga kehekehe. Naʻá ne faiako ʻi ha ngaahi taʻu lahi ʻi he Potungāue Ako ʻa e Siasí pea kuó ne hoko ko ha faiako ʻi he Tokāteline ʻo e Ongoongoleleí pea mo ha palesiteni ʻo e Kau Finemui mo e Fineʻofa ʻi he uōtí.