“Brother Bradley R. Wilcox,” Liahona, Mē 2023.
Brother Bradley R. Wilcox
Tokoni ʻUluaki ʻi he Kau Palesitenisī Lahi ʻo e Kau Talavoú
ʻI he ngaahi taʻu lahi kimuʻa pea hoko ʻa Brother Palatilī R.Uilikoki ko ha tokoni ʻi he Kau Palesitenisī Lahi ʻo e Kau Talavoú, naʻá na ʻave mo hono uaifi ko Tepí ʻa hona foha taʻu 14 naʻe fakatoupīkoí ki he Especially for Youth (EFY) ʻi he ʻUnivēsiti Pilikihami ʻIongí.
Naʻá na hohaʻa naʻa ʻoku “ʻikai haʻane meʻi tuʻunga fakalaumālie ʻe taha.” Naʻe foki mai ʻa e talavoú ʻokú ne ʻi ha tuʻunga makehe—ʻokú ne tokanga mo ongoʻingofua lahi ange ʻa e ngaahi meʻa fakalaumālié. Ko e hili ʻeni ha ngaahi taʻu lahi mei ai, ʻokú ne ngāue ʻi he kau pīsopelikí pea ʻokú ne akoʻi ʻa e toʻu tupu ʻi hono uōtí.
Ko e meʻa ia naʻe toutou fakatokangaʻi ʻe Misa Uilikoki ʻi he faʻahitaʻu māfana kuo ʻosí ʻi he kau atu ʻa e toʻu tupu ʻo e Siasí ʻi he funga ʻo e māmaní ki he ngaahi konifelenisi Ki Hono Fakamālohia ʻo e Toʻu Tupú (KFT). Ko e meʻa tatau ai pē, ko kinautolu “naʻe ʻikai ke nau fakapapauʻi pe te nau fie ʻalú” naʻa nau foki ki ʻapi ʻoku nau ʻi ha tuʻunga makehe mo lelei ange.
Naʻe pehē ʻe Brother Uilikoki—ʻa ia kuó ne hoko ko e Tokoni Ua ʻi he Kau Palesitenisī Lahi ʻo e Kau Talavoú talu mei he 2020 pea naʻe hikinimaʻi ko e Tokoni ʻUluaki ʻi he konifelenisi lahi ʻo ʻEpeleli 2023—ko ha taimi fakafiefia ʻeni ke tokoni ai ki he toʻu tupu ʻo e Siasí. ʻOku ngāue fakataha maʻu pē ʻa e Kau Palesitenisī Lahi ʻo e Kau Talavoú mo e Kau Finemuí, pea “ko e ngaahi konifelenisi KFT, tohi fakahinohino KFT, mo e makasini KFT ʻoku tokolahi ange ʻa e toʻu tupu ʻoku aʻutonu ki aí ʻi ha toe taimi kimuʻa.”
Ko Palatilī Lei Uilikokí, taʻu 63, na‘e fanauʻi ia ‘i Polovo, ʻIutā, USA, ʻi he ʻaho 25 ʻo Tīsema 1959 kia Lei T. Uilikoki mo Vala C. Uilikoki. Naʻá ne tupu hake ʻi Polovo ka naʻe ʻi ai ha ngaahi taʻu ʻi heʻene kei siʻí naʻá ne ʻi ʻItiopea ai.
Naʻe mali ʻa Brother Uilikoki mo Tēpola Kaneli ʻi he Temipale Polovo ʻIutaá ‘i ʻOkatopa 1982, hili ia haʻane ngāue fakafaifekau taimi kakato ʻi Vina tela Mā, Silei. ʻOkú na hoko ko ha ongomātuʻa ki ha fānau ʻe toko fā pea ʻokú na nofo ʻi Polovo, ʻIutā.
Naʻe maʻu e BA mo e MA ʻo Brother Uilikokí mei he ʻUnivēsiti Pilikihami ʻIongí (BYU) pea maʻu hono mataʻitohi toketā ʻi he faiakó mei he ʻUnivēsiti ʻo Uaiōmingí. ʻOkú ne hoko ko ha palōfesa ʻi he Vaʻa ʻo e Folofola Fakakuongamuʻá ʻi BYU. Talu mei he 1985, kuó ne līʻoa ha konga lahi ʻo e taimi faʻahitaʻu māfaná ki he polokalama EFY ʻa BYU.
Kuo hoko ʻa Brother Uilikoki ko ha pīsope pea ngāue ʻi he kau palesitenisī fakasiteikí, palesiteni ʻo e Misiona Silei Sanitiako Hahaké, pea ngāue ʻi he poate lahi ʻo e Lautohi Faka-Sāpaté.