“Sisitā Tamara W. Runia,” Liahona, Mē 2023.
Sisitā Tamara W. Runia
Tokoni ‘Uluaki ‘i he Kau Palesitenisī Lahi ʻo e Kau Finemuí
ʻI he kotoa ʻo e moʻui ʻa Sisitā Tamala (Temi) W. Luniá, kuó ne maʻu ha ngaahi uiuiʻi kehekehe—faiako ʻi he kalasi ako folofola fakasiteikí, tokoni ʻi he kau palesitenisī ʻo e Fineʻofá ʻi he siteikí, taki mo hono husepānití ʻi he Misiona ʻAositelēlia Seneé—ka ko e konga lahi ʻo ʻene ngāué ʻi he Kau Finemuí.
Naʻe pehē ʻe Sisitā Lunia, ʻa ia kuó ne hoko foki ko ha palesiteni ʻo e Kau Finemuí ʻi he siteikí, “Kuó u saiʻia ʻi he uiuiʻi kotoa pē kuó u ngāue ai.” Ka naʻá ne toe pehē, “Ka te u pehē ʻoku ou ongoʻi lata ange ʻi he Kau Finemuí.”
Naʻe pehē ʻe Sisitā Lunia kuo laka hake ʻi he tuʻo 20 ʻa ʻene ʻalu ki he nofo kemi ʻa e Kau Finemuí. ʻI ha taʻu ʻe taha, naʻe kole ange ke ne ʻalu ʻo hoko ko e tokotaha fakakaekae ʻa e kemí.
ʻOkú ne fakaʻamu ke ʻiloʻi ʻe he kau finemui kotoa pē ʻa e lahi ʻo e ʻofa ʻa ʻenau Tamai Hēvaní ʻiate kinautolú. Naʻá ne pehē, “Ko e ʻofa ko iá ʻoku lahi ʻo tatau mo e langí, pea loloto ʻo tatau mo e tahí.” Naʻá ne toe pehē, “ʻoku finangalo ʻa e [Tamai Hēvaní] ke nau foki kotoa ange ki ʻapi.”
Naʻá ne pehē ʻe hoko ʻa hono ongoʻi ʻo e fehokotaki ko iá ke liliu ai e moʻui ʻa e kau finemuí “koeʻuhí he naʻe hoko ia kiate au.”
Naʻe fāʻeleʻi ʻa Sisitā Lunia ʻi he ʻaho 2 ʻo Māʻasi 1961, ʻi Konikooti, Kalefōnia, USA kia Viniseni ʻAlamā Uti mo Keili Hilitoni Uti. Naʻá ne tupu hake ʻi Uolonati Kiliki, Kalefōnia.
Naʻá ne taʻu ʻuluaki ʻi he ʻUnivēsiti Pilikihami ʻIongí ʻo ako ki he faiongoongó ʻi he taimi naʻá ne fetaulaki ai mo R. Sikoti Luniá. Naʻá na mali ʻi Mē 1981 ʻi he Temipale ʻOkalani Kalefōniá. ʻOku ʻi ai ʻena fānau ʻe toko fitu pea ʻoku nau nofo he taimí ni ʻi Polovo, ʻIutā.
Naʻe hikinimaʻi ʻa Sisitā Lunia lolotonga ʻa e konifelenisi lahi ʻo ʻEpelelí ke ne hoko ko e Tokoni ʻUluaki ʻi he Kau Palesitenisī Lahi foʻou ʻo e Kau Finemuí. ʻE kamata ʻene ngāué ʻi he ʻaho 1 ʻo ʻAokosí.
Makehe mei heʻene ngāue ʻi he Siasí, kuó ne ngāue ʻi ha taʻu ʻe 20 ʻi he poate ʻo e Kautaha Tokangaekina ʻo e Meʻatokoní (Food and Care Coalition) ʻi Polovo, ʻa ia ʻoku ʻomi ai ha ngaahi maʻuʻanga tokoni maʻá e kakai tukuhāusiá mo e kakai ʻoku maʻulalo ʻenau paʻanga hū maí.