“ʻEletā Robert M. Daines,” Liahona, Mē 2023.
ʻEletā Robert M. Daines
Fitungofulu Taki Māʻolunga
Naʻe ngāue ʻa ʻEletā Lōpeti M. Teinesi ko ha palōfesa lao mo pisinisi ʻi he ʻUnivēsiti Sitenifōtí ʻi hono uiuiʻi ia ke ne hoko ko ha faiako semineli pongipongí.
ʻI he hoko ʻa ʻEletā Teinesi ko ha mēmipa ʻo e Siasí talu ʻene tupú, naʻá ne ʻiloʻilo ki he ongoongoleleí, ka naʻe hanga ʻe he uiuiʻi ko iá ʻo fakaʻaiʻai ia ke ne ako ʻa e folofolá ʻi ha founga naʻe teʻeki ke ne fai kimuʻa. Naʻe pehē ʻe hono uaifi ko Luté, naʻá ne faʻa mohe efiafia ke ʻā hengihengi hake he 4:00 a.m. he naʻá ne fiemaʻu ha houa ʻe tolu ke teuteu ai ʻene lēsoni fakaʻahó ki ha fānau ako ʻe toko 15.
Naʻe pehē [ʻe ʻEletā Teinesi], “ʻOku ʻi ai ha kakai ʻoku nau talēnitiʻia; pea ʻoku ʻi ai ha niʻihi kuo pau ke nau ngāue mālohi. Ko aú, ʻoku ou ʻi he kulupu ʻKuo pau ke u ngāue mālohí’.”
Naʻe pehē ʻe ʻEletā Teinesi naʻá ne ako fakamātoato ʻa e folofolá he ʻaho kotoa pē koeʻuhí he naʻá ne fie ʻilo mo ongoʻi ʻa e ʻofa ʻa e Fakamoʻuí pea tokoniʻi leva ʻene fānau akó ke nau fai ʻa e fehokotaki tatau. Naʻe hoko ʻene aʻusia ʻi he taʻu ʻe hongofulú kuo ʻosí ke liliu lahi ai ʻene tuí mo e fakamoʻoní.
Naʻe pehē ʻe ʻEletā Teinesi ʻi hono hikinimaʻi ia ke hoko ko ha Fitungofulu Taki Māʻolunga ʻi he konifelenisi lahi ʻo ʻEpeleli 2023, “ʻOku ou ongoʻi hangē naʻá ku ului moʻoni peá u ʻiloʻi ʻa Sīsū Kalaisí ʻi heʻeku hoko ko ha faiako semineli ʻi Palo Ato Kalefōniá.”
Naʻe fāʻeleʻi ʻa Lōpeti Mēlili Teinesi ʻi Pulumingitoni, ʻInitiana, USA, ʻi he ʻaho 28 ʻo Siulai 1964, kia Lōpeti Henelī Teinesi III mo Sēneti Lanikeleni Teinesi. Naʻá ne tupu hake ʻi Polovo, ʻIutā, peá ne mali mo Lute ʻAna Kalasia ʻi he Temipale Sōlekí ʻi Tīsema ʻo e 1988. ʻOku ʻi ai ʻena fānau ʻe toko nima.
Naʻe ʻosi ʻa ʻEletā Teinesi mei he ʻŪnivēsiti Pilikihami ʻIongí kimuʻa pea maʻu hono mataʻitohi ʻi he laó ʻi he ʻUnivēsiti ʻIelí (Yale). Naʻá ne ngāue ko ha tokoni fakalao maʻá e kautaha Goldman Sachs [Kolomana Sākisi] peá ne faiako ʻi he ʻUnivēsiti Niu ʻIoké mo e ʻIelí. ʻI he taʻu ʻe uofulu kuohilí, kuo ngāue ʻa ʻEletā Teinesi ko ha tokoni pule mo ha Palōfesa Pritzker ʻi he Laó mo e Pisinisí ʻi he ʻUnivēsiti Sitenifōtí.
Naʻe ngāue fakafaifekau taimi kakato ʻa ʻEletā Teinesi ʻi he Misiona Suisalani Sūlikí. ʻOku kau ʻi hono ngaahi uiuiʻi kehe ʻi he Siasí ʻa ʻene hoko ko ha palesiteni fakasiteiki, aleaʻanga māʻolunga, pīsope, mo ha taki nesilī. Naʻá ne lolotonga hoko ko ha palesiteni fakasiteiki ʻi he taimi naʻe uiuiʻi ai iá.