ʻE Lava ke Fakahaaʻi ʻetau Tuí ʻi Heʻetau Talangofuá

Hivaʻi pe lau ʻa e lea ʻo e foʻi hiva “Ko e Tuí”. ʻE lava pē ke mou fakatātaaʻi mo e fānau ʻoku iiki angé ʻo hangē ko ia ʻoku hā atu ʻi laló.

Ko e taimi ko ia ʻoku kole mai ai ʻa e Tamai Hēvaní pea mo Sīsū ke tau fai ha faʻahinga meʻá, ʻoku ui ia ko e fekau. Pea ko e taimi ʻoku tau talangofua ai ki he ngaahi fekaú, ʻoku tau fakahā ai ki he Tamai Hēvaní pea mo Sīsū ʻa ʻetau falala kiate kinauá. ʻOku tau ʻiloʻi ʻokú na ʻofa ʻiate kitautolu pea he ʻikai ke na teitei kole mai ha faʻahinga meʻa te tau mamahi ai. ʻOku fakahā ʻetau tuí ʻi he taimi ʻoku tau talangofua aí.

Fakamanatuʻi ki he fānaú ʻoku ʻuhinga ʻa e tui ki he Tamai Hēvaní pea mo Sīsuú ke tau tui mo falala kiate kinaua. Neongo kuo teʻeki ai ke tau mamata ʻiate kinaua he lolotonga ʻetau moʻui ʻi he māmaní, ka ʻoku tau tui ki he ngaahi fakamoʻoni ʻa e kakai kuo nau ʻosi mamata ʻiate kinauá. ʻOku tau tui foki ʻoku moʻoni ʻa e Laumālie Māʻoniʻoní pea ʻoku ʻikai ke ne maʻu ha sino ʻo e kakano mo e hui, ka ko ha toko taha ia ko e laumālie ʻi he fōtunga ʻo e tangatá.

Tokoni ki he fānau lalahi angé ke nau ako maʻu loto ʻa e tefito ʻo e tui ʻuluakí.ʻE angimui atu pē ʻa e fānau iiki angé pea mahalo pē naʻa nau lava ke ako maʻu loto hano konga.

Fakamatalaʻi ange ko e fānau kitautolu ʻa e Tamai Hēvaní pea te tau lava ʻo fakahā ʻoku tau tui ki he Tamai Hēvaní pea mo Sīsū Kalaisi. ʻOku hā ʻi he Tohi ʻa Molomoná ha palōfita ko Līhai ʻa ia naʻá ne fakahā ʻene tui ki he Tamai Hēvaní pea mo Sīsuú ʻaki ʻene talangofuá.

Fai ʻa e talanoa ko ʻení ʻi hoʻo lea pē ʻaʻau:

ʻI he ngaahi taʻu lahi kuo hilí, ko e taʻu ia ʻe onongeau ki muʻa pea toki ʻaloʻi mai ʻa Sīsuú, naʻe nofo ai ha palōfita ko Līhai ʻi Selūsalema fakataha mo hano uaifi ko Sēlai. Naʻe toko fā ʻena fānau tangatá, ko Leimana, Lemiuela, Samu mo Nīfai.

Naʻe maʻu koloa ʻaupito ʻa Līhai mo hono fāmilí pea naʻa nau moʻui fiemālie. Naʻe ʻofa ʻa Līhai ʻi he Tamai Hēvaní pea mo Sīsū. Naʻá ne feinga ke akonekina ʻa hono fāmilí ke nau ʻofa ʻiate kinaua pea mo talangofua ki heʻena ngaahi fekaú.

Fakaʻaliʻali ʻa e fakatātā 3–39, Ko e Kikite ʻa Līhai ki he Kakai ʻo Selūsamelá.

Ko e taimi ko iá naʻe fuʻu faiangahala lahi ai ʻa e kakai naʻe nofo ʻi Selūsalemá. Naʻe feinga ʻa Līhai ke akoʻi kinautolu fekauʻaki mo e Tamai Hēvaní mo Sīsū pea mo e ngaahi fekaú, ka naʻe ʻikai ke nau fie fanongo kiate ia.

ʻI ha ʻaho ʻe taha, lolotonga ʻa e lotu ʻa Līhaí, naʻe hoko mai kiate ia ha vīsone pe ko ha meʻa hā mai. Naʻe lahi ʻa e ngaahi meʻa fakaofo naʻá ne mamata aí. Naʻá ne mamata foki ʻe fakaʻauha ʻa Selūsalema ʻo kapau ʻe ʻikai ke fakatomala ʻa e kakaí. Naʻe fakafetaʻi ʻa Līhai ki he Tamai Hēvaní koeʻuhí he naʻá ne ʻiloʻi naʻe fie maʻu ʻe he Tamai Hēvaní ke fakatokanga ki he kakai ʻo Selūsalemá. Naʻe fakahā ange ʻe he Tamai Hēvaní ke ne tala ki he kakaí ʻa e meʻa kuó ne mamata aí. Naʻe fai ʻe Līhai ʻa e fekau ko ʻení ʻo ne fakahā ki he kakaí kapau ʻe ʻikai te nau fakatomala, ʻe fakaʻauha ʻa Selūsalema.

ʻOku fie maʻu ha loto-toʻa lahi ia kae toki lava ha taha ʻo tala ange ki he kakaí ke nau fakatomala mei heʻenau faiangahalá. Ka neongo ia, naʻe tui ʻa Līhai ʻe maluʻi ia ʻe he Tamai Hēvaní, ko ia naʻá ne fai ʻa e meʻa naʻe fekauʻi ia ke ne faí. Naʻe ʻikai ke fie fanongo ʻa e kakaí kiate ia ʻo nau fakakataʻaki ia mo feinga ke fakapoongi ia he naʻe ʻikai ke nau saiʻia ʻi hono fakahā ange ʻoku nau faiangahalá.

Ne ʻosi mei ai ha taimi siʻi pea folofola ʻa e Tamai Hēvaní kia Līhai ke ne fekau e fānaú ke nau fakafanongo ki he meʻa naʻá ne fekau ʻa Līhai ke ne faí. Lau ʻa e 1 Nīfai 2:1–2.

Fakamatalaʻi ange ko e toafá ko ha feituʻu ia ʻoku ʻikai faʻa nofo ai ha taha pea ʻikai ke ʻi ai ha ʻū fale pe ngaahi hala. Naʻe fekau ʻe he Tamai Hēvaní ke tuku ʻe Līhai mo hono fāmilí ʻa e toko taha kotoa pē ʻi Selūsalema ka nau ō ki ha feituʻu ʻo nofo mavahe pē ai.

Kole ki he fānaú ke nau fakafanongo ki he meʻa naʻe fai ʻe Līhaí, ʻosi ko iá peá ke lau ʻa e 1 Nīfai 2:3–4.

Fakaʻaliʻali ʻa e fakatātā 3–40, Ko e Mavahe ʻa e Fāmili ʻo Līhaí mei Selūsalemá.

Neongo naʻe fuoloa ʻa e nofo ʻa Līhai ʻi Selūsalemá, ka naʻá ne vave ke talangofua ki he fekau ke ne ʻalu mei hono ʻapí. Naʻe ʻalu ʻa Līhai mo hono fāmilí kae tuku honau ʻapí, kelekelé, konga lahi ʻo honau valá, koulá mo e silivá pea mo ha ngaahi koloa kehe pē. Ko e meʻa pē naʻa nau ʻavé ko ʻenau meʻakai, vala feʻunga, ngaahi fale fehikitaki (pe ngaahi tēniti) pea mo e ngaahi meʻa ʻaonga ʻe lava ke uta ʻi heʻenau fanga kāmelí pea mo e ʻasí. ʻOsi pē ko iá naʻa nau fononga atu leva ki he toafá.

Fakamahinoʻi ange naʻe ʻikai ko ha meʻa faingofua kia Līhai ke ne ʻalu mei ai, ka naʻá ne loto fiemālie pē ke ne talangofua ki he fekau naʻe fai angé.

Kole ki he fānaú ke nau pehē pē ko ha niʻihi kinautolu ʻo e fāmili ʻo Līhaí.

Fekau ke nau fakakaukau ki he meʻa te nau ʻalu mo iá kapau naʻa nau ʻalu ki he toafá. Tuku ke nau fakahā atu ʻa e meʻa te nau fie ō mo iá pea mo e meʻa te nau tukú. ʻE lava pē ke ke fakaʻaliʻali kiate kinautolu ha ngaahi meʻa kehekehe pe ko ha ngaahi fakatātā pē ʻo ha ngaahi meʻa hangē ko e ngaahi meʻa naʻe fili mei ai ʻa Līhai mo hono fāmilí; hangē ko ʻení, ʻe fakafofongaʻi pē ʻe ha foʻi mama ia ʻa e ngaahi meʻa teuteú, sēniti ʻa e paʻangá, foʻi ʻāpele ʻa e meʻakaí. Tuku ke fili ʻe he fānaú ʻa e ngaahi meʻa naʻe fie maʻu ʻe he fāmili ʻo Līhaí. Fakamanatuʻi ange foki ko e meʻa feʻunga pē te nau ʻavé.

Fekau e fānaú ke nau fili ʻa e meʻa te nau ʻalu mo iá kapau naʻe ʻai ke nau ʻalu mo Līhai ki he toafá. ʻE pehē leva ʻa e tamasiʻi pe taʻahine ʻuluakí, “Kapau te u ʻalu mo Līhai ki he toafá, te u ʻave ha ” (ʻE fakafonu ʻaki leva ʻe he tamasiʻi pe taʻahine ko ʻení ʻa e faʻahinga meʻa kuó ne fili ke ʻalu mo iá.) ʻE leaʻaki ʻe he toko taha hono hokó ʻa e meʻa tatau pē mo e ʻuluakí peá ne toki tānaki atu ʻa e meʻa kuó ne filí. ʻE fai pehē atu pē, ʻo leaʻaki ʻe he kiʻi tamasiʻi pe taʻahine taki taha ʻa e ngaahi meʻa naʻe leaʻaki ʻe kinautolu ʻi muʻá pea toki tānaki atu ki ai ʻene fili ʻaʻaná, ʻo fai pehē ai pē kae ʻoua kuo nau kakato ʻi hono fai ʻo e foʻi ʻekitivitií (kau foki ai mo e faiakó).

Ko e tui lahi ia naʻe fie maʻu kae toki lava ke talangofua ki he Tamai Hēvaní ʻo nau mavahe mei Selūsalema. Naʻe maʻu ʻe Līhai mo hono fāmilí ha ngaahi tāpuaki lahi koeʻuhí pē ko ʻenau talangofuá.

Fakaʻaliʻali ʻa e fakaʻilonga mo e mama FKT.

Tala ange ki he fānaú ʻoku ʻuhinga ʻa e fili ki he totonú ki hono fai ʻo e meʻa ʻoku finangalo ʻa e Tamai Hēvaní pea mo Sīsū Kalaisi ke tau faí.

Fai ʻa e ngaahi talanoa ko ʻení ʻi hoʻo lea pē ʻaʻau, pea fekau ʻa e fānaú ke nau fakatātaaʻi ʻa e ngaahi meʻa ko ia ʻoku hoko ʻi he ngaahi talanoá.