ʻOku Tau Lava ʻo Lotu ki he Tamai Hēvaní

Fakaʻaliʻali ʻa e fakatātā 3–60, Ko ha Taʻahine ʻoku Lotu.

Koeʻuhí ko e fuʻu ʻofa lahi ʻa e Tamai Hēvaní ʻiate kitautolú, kuó ne fakahoko ai ke tau lava ʻo talanoa mo ia. Ko hono finangaló ke tau fakamālō ange ʻi he ngaahi tāpuaki ʻoku tau maʻú. ʻOkú ne toe finangalo foki ke tau kole ha tokoni meiate ia ʻi ha faʻahinga taimi pē ʻoku tau fie maʻu aí.

Tala ange ko e taimi ʻoku tau lotu aí, ʻoku totonu ke tau fakamālō ki he Tamai Hēvaní koeʻuhí ko e ngaahi tāpuaki ʻoku tau maʻú.

Ko e taimi ʻoku tau talanoa ai ki he Tamai Hēvaní ʻoku tau fakaʻaongaʻi ʻa e ngaahi lea makehe. Ko e taimi ʻoku tau fakamālō ai kiate iá, ʻoku tau pehē, “ʻOku mau fakafetaʻi ki he ʻAfiona.”

Tuku ke fakahā ʻe he fānaú ki he kalasí ʻa e founga ke nau fakamālō ai ki he Tamai Hēvaní koeʻuhí ko ha tāpuaki makehe kuo nau maʻu. Kole ki he tamasiʻi pe taʻahine taki taha ke ne fakakaukau angé ki ha faʻahinga meʻa ke ne fakamālō ai ki he Tamai Hēvaní ʻo ne ngāueʻaki ʻa e ʻOku ou fakafetaʻi ki he ʻAfioná.

Fekau e fānaú ke nau fanongo ka ke fai ange ʻi hoʻo lea pē ʻaʻau ʻa e talanoa ko ʻeni kau kia Sini pea mo ʻene manatuʻi ke ne fakamālō ki he Tamai Hēvaní.

Ko e lolotonga ʻeni ʻo e taimi taú ʻi ʻIngilani. Naʻe fakapoʻuli pea naʻe fuʻu manavahē ʻaupito ʻa Sini. Naʻe nofo ʻa e kui fefine ʻa Siní ʻi ha kiʻi kolo ofi atu ia ki Lonitoni, pea ko e ʻalu ʻeni ʻa Sini ke ʻaʻahi ki ai. Naʻá ne ʻaka mai ʻi heʻene pasikalá he maile ʻe ua ke aʻu ki he hala lahí. Naʻe lotuʻaki ʻe Sini ʻa hono lotó kotoa ke ʻoua naʻa hoko ha meʻa kiate ia.

ʻI heʻene ʻaka mai ʻene pasikalá mo lotú, naʻe puhiʻi mai ha tuʻoni matangi mālohi mo momoko ʻo mei ʻosi ai pē ʻene manavá ʻaʻana ia. Naʻe toe lotu pē ʻa Sīni ke maluʻi ia pea ke ne lava foki ke ʻilo ʻa hono halá.

Fakafokifā pē kuo ʻasi mai ha maama mei he foʻi haké. Naʻe ʻaka atu ʻa Sini ki he feituʻu naʻe hā mei ai ʻa e māmá. Naʻe ʻi muʻa pē ʻa e māmá ʻia Sini ʻi he toenga ʻo ʻene fonongá.

Naʻe fakamālō lahi ʻa Sini ʻi he meʻá ni. Naʻá ne ʻiloʻi kuo tali ʻe he Tamai Hēvaní ʻa ʻene lotú. Ko e taimi kotoa pē naʻá ne manatuʻi ai ʻa e meʻá ni, naʻá ne toe fakamālō pē ki he Tamai Hēvaní (Vakai, Lucile C. Reading, “The Light,” Children’s Friend, ʻAokosi, 1965, p. 45).

Hanga ʻo fakamamafaʻi ange ʻoku totonu ke tau manatuʻi taki taha ke tau fakamālō ki he Tamai Hēvaní koeʻuhí ko e meʻa kotoa pē kuó ne foaki maʻatautolú pea mo e tokoni ʻoku tau maʻú.

Hivaʻi pe lau fakataha mo e fānaú ʻa e lea ʻo e veesi ʻuluaki ʻo e “Fakafetaʻi ʻe Tamai.”

Kole ki he fānaú ke nau fakahā mai mo ha toe ngaahi tāpuaki kehe kuo nau fakamālō ai ki he Tamai Hēvaní.

Tuhu ki he fakatātā 3–60, Ko ha Taʻahine ʻoku Lotu.

Fai hoʻo fakamoʻoní te tau lava ke kole ha tokoni mei he Tamai Hēvaní ʻi ha faʻahinga taimi pē ʻoku tau fie maʻu aí, ʻo tatau ai pē pe ko e hā ʻa ʻetau palōpalemá.

Tuku ange ke fakamatala ʻa e fānaú ki ha taimi naʻa nau lotua ai ha taha kehe, hangē ko ha taha ʻi honau fāmilí, ngaahi kaungā-meʻá pe kaungāʻapí.

Ko e ngaahi lea makehe ʻeni ʻoku tau fakaʻaongaʻi ʻi he taimi ʻoku tau kole tokoni ai ki he Tamai Hēvaní, ko e ʻOku ou kole ki he ʻafioná. Fekau ke toe leaʻaki ʻe he fānaú ʻa e ngaahi lea ko ʻení.

Hivaʻi pe lau ʻa e lea ʻo e veesi hono ua ʻo e “Fakafetaʻi ʻe Tamai.” Kole ki he fānaú ke nau fakafanongo ange ki he leá pea nau tala atu ʻa e meʻa te nau kole ki he Tamai Hēvaní.

Fakamahino ange naʻe tuʻo lahi ʻa e lotu ʻa Sīsū Kalaisi ki he Tamai Hēvaní ʻi heʻene kei ʻi he māmaní. Hili ʻene toetuʻú, naʻá ne toe lotu foki ki he Tamai Hēvaní. ʻI he ʻaʻahi ʻa Sīsū ki he kakai Nīfaí, naʻá ne akonakiʻi mo tāpuakiʻi kinautolu. Naʻá ne toe lotua foki ʻa e kakaí peá ne akoʻi kinautolu ke nau lotu foki.

Fakaʻaliʻali ʻa e fakatātā 3–61, Ko e Lotu ʻa Sīsū mo e Kakai Nīfaí.

Fakamatalaʻi ange ʻoku tala mai ʻe he Tohi ʻa Molomoná naʻe fekau ʻe Sīsū ʻa e kakaí ke nau haʻohaʻo takai ʻiate ia pea nau tūʻulutui hifo. ʻI heʻenau tūʻulutui hifó, naʻá ne toe tūʻulutui hifo foki mo ia ʻo lotu ki he Tamai Hēvaní. Naʻá ne fai ha lotu fakaʻofoʻofa moʻoni pea naʻe fuʻu fiefia lahi ʻa e kakaí ʻi heʻenau fanongo ki he ngaahi lea ʻo ʻene lotú.

ʻI he ʻosi hono akoʻi kiate kinautolu ʻe Sīsū Kalaisi ha ngaahi meʻa fakaofo lahi, naʻá ne akoʻi kiate kinautolu ʻoku totonu ke nau lotu ʻo hangē ko ʻene lotú.

Lau ʻa e 3 Nīfai 18:16.

Fakamatalaʻi ange naʻe ʻalu ʻa Sīsū Kalaisi mei he kakai Nīfaí, ka naʻá ne toe foki kiate kinautolu, ko hono tuʻo ua. ʻI heʻene foki ko ʻení, naʻá ne toe lotu ki he Tamai Hēvaní ke fakamālō kiate ia koeʻuhí ko ʻene tokoniʻi ʻa ʻene kau akonga Nīfaí. Naʻá ne kole foki ki he Tamai Hēvaní ke ne tāpuakiʻi ʻa e kakaí. Naʻe lotu tuʻo lahi ʻa Sīsū Kalaisi he lolotonga ʻene nofo mo e kakai Nīfaí. ʻOku hiki ʻi he Tohi ʻa Molomoná naʻe fuʻu fakaʻofoʻofa ʻa e ngaahi lotu naʻá ne faí ʻo ʻikai lava ke hiki kinautolu.

Fakamatalaʻi ange ʻoku totonu ke tau taki taha fai ʻa e meʻa naʻe akonakiʻaki ʻe Sīsū Kalaisi ki he kakai Nīfaí pea tau faʻa lotu maʻu pē ki he Tamai Hēvaní.

Fekau ʻa e fānaú ke nau toe leaʻaki ʻa e “ʻOku ou fakafetaʻi ki he ʻafioná,” pea mo e “ʻOku ou kole atu ki he ʻafiona.” Poupouʻi e fānaú ke nau fakaʻaongaʻi mo e ngaahi lea kehe ʻoku totonu ke fakaʻaongaʻi ki he lotú. ʻE lelei ke nau ako hono ngāueʻaki ʻo e “ʻafioná” mo e “hoʻo ʻafió.”

ʻOange ki he fānaú ʻa e ʻū laʻi pepa kuó ke ʻosi teuteú mo ha ʻū peni vahevahe pe kala. Kole ange ke nau taki taha tā ha fakatātā ʻi he ongo tafaʻaki taki taha ʻo fakahaaʻi ai ʻa e meʻa ʻokú ne fakamālō ai pea mo e meʻa ʻokú ne lotu ʻo kolé.

Vahevahe mo e fānaú ʻa hoʻo fakamoʻoni ki he meʻa ko e lotu. Fakamamafaʻi ange ko ha tāpuaki lahi moʻoni ia ke te lava ʻo lotu ki he Tamai Hēvaní ʻo fakamālō pea kole ha tokoni meiate ia. Fakamanatuʻi ange ʻe lava pē ke nau lotu ʻi ha faʻahinga taimi pē pea mo ha feituʻu pē ʻoku nau loto ki aí.

ʻI hoʻomou teuteu ki hoʻomou lotu tukú, fekau e fānaú ke nau fokotuʻu atu ha ngaahi meʻa ʻe lava ke fakamālō ai ʻa e toko taha ʻe lotu tukú ki he Tamai Hēvaní. Fekau foki ke nau toe fokotuʻu mai ʻa e ngaahi meʻa te nau kole ʻi he lotú.

Hanga ʻo fai ʻa e lotu tukú, peá ke manatuʻi ke ke fakaʻaongaʻi ʻa e ngaahi fakakaukau ko ia kuo fokotuʻu atu ʻe he kalasí.