ʻOku Tau Maʻu ha Ngaahi Tāpuaki Lahi ʻi Heʻetau Hoko ko e Kāingalotu ʻo e Siasi ʻo Sīsū Kalaisí

Tala ange ki he fānaú ʻoku ʻi ai ha ngaahi meʻa ʻoku ʻufiʻufiʻaki ʻa e konga tupenu ʻi he tēpilé. Fakamatalaʻi ange te ke toʻo ʻa e konga tupenú ʻi ha sekoni ʻe hongofulu. ʻE feinga ʻa e fānaú ke nau ʻiloʻi pea manatuʻi ʻa e ngaahi meʻa naʻa nau mamata ki aí ki he lahi taha te nau lavá.

Fekau ʻa e kalasí ke nau haʻu ʻo tuʻu takatakai ʻi he veʻe tēpilé. Toʻo e ʻufiʻufí ʻi ha sekoni pē ʻe hongofulu. ʻOsi ko iá, pea toe ʻufiʻufiʻi. Fekau e fānaú ke nau foki atu ki honau ngaahi tangutuʻangá.

Tala ange leva ki he fānaú ke nau feinga taha taha ke tala atu ʻa e ngaahi meʻa ko ia naʻe ʻi he funga tēpilé. Ko ʻene ʻosi pē ʻenau feingá peá ke toʻo ʻa e konga tupenú ke mou sio pe naʻe fēfē ʻenau ngaahi talí. Fakamatalaʻi ange ʻoku lava ke fakamanatu mai ʻe he ngaahi meʻa taki taha ko ʻení ʻa e ngaahi tāpuaki ʻoku tau maʻu mei he Tamai Hēvaní ʻi he taimi ʻoku papitaiso ai kitautolú.

Fekau ha taha ʻo e fānaú ke ne fakapipiki hake ʻa e “Ko e Ngaahi Tāpuaki ʻo e Papitaisó” ki he palakipoé.

Fakaʻaliʻali ʻa e fakatātā 3–38, Ko e Fai Papitaiso ʻa ʻAlamā ʻi he Vai ʻo Molomoná.

Mou fakamanatu nounou pē ʻa e talanoa kia ʻAlamaá mei he lēsoni 20. Fakamanatuʻi ange ki he fānaú naʻe toitoi ʻa ʻAlamā ʻi he toafá ʻi he hili ʻene hola mei he kau taulaʻeiki ʻa e tuʻi anga-kovi ko Noá. Naʻá ne toitoi pē ʻi he maʻomaʻonganoá pea naʻá ne tohi foki ʻa e ngaahi akonaki ʻa e palōfita ko ʻApinetaí.

Hili ha ngaahi ʻaho mei ai, naʻe ʻalu holo ʻa ʻAlamā ʻi he kakaí ʻo malanga fakafufū kiate kinautolu fekauʻaki mo Sīsū Kalaisi. Naʻe fanongo honau toko lahi kia ʻAlamā pea nau tui kiate ia. Naʻe ʻalu atu ʻa e faʻahinga ko ʻeni naʻe tuí ki he feituʻu naʻe ui ko Molomona. Naʻe ʻi he feituʻu ko ʻení ha vai maʻa pea mo ha ʻuluʻakau ʻa ia naʻe toitoi ai ʻa ʻAlamā ʻi he taimi ʻahó mei he kau tangata ʻa e tuʻí ʻa ē ne nau fekumi kiate iá.

Naʻe toko lahi ʻa e kakai naʻa nau haʻu ke fanongo kia ʻAlamaá. Naʻá ne akonekina kinautolu ʻi he tuí mo e fakatomalá. Naʻá ne papitaiso ʻa kinautolu naʻe loto ke papitaisó, pea naʻa nau kau ki he siasi moʻoni ʻo Sīsū Kalaisí.

Fekau ha taha ke ne fakapipiki hake ʻa e “ʻOku Tau Kau ki he Siasi ʻo Sīsū Kalaisí.”

Fekau ha taha ke ne fakapipiki hake ʻa e “Meʻa-foaki ʻo e Laumālie Māʻoniʻoní” ʻi lalo ʻi he kaati foʻi lea ki muʻá.

Fakamatalaʻi ange ʻoku lava ke tau maʻu ʻa e meʻa-foaki ʻo e Laumālie Māʻoniʻoní ʻi he hilifakinima hili hono papitaiso kitautolú. Ko ha meʻa-foaki fakaʻofoʻofa foki ia mei he Tamai Hēvaní. Kapau te tau fai ʻa ia ʻoku totonú, ʻe ʻiate kitautolu maʻu ai pē ʻa e Laumālie Māʻoniʻoní ʻo ne fakahā mai ʻa e ngaahi meʻa ʻoku totonu ke tau faí.

Hivaʻi pe lau fakataha mo e fānaú ʻa e lea ʻo e “Ko e Laumālie Māʻoniʻoní.”

Mou toe fakamanatu mo e fānaú ʻa e tefito ʻo e tui hono faá. Fakamatalaʻi ange ʻe hoko ʻa e meʻa-foaki ʻo e Laumālie Māʻoniʻoní ko ha tāpuaki ia maʻatautolu ʻi hono kotoa ʻo ʻetau moʻuí ʻo kapau te tau moʻui taau.

Fai ʻi hoʻo lea pē ʻaʻau ʻa e talanoa ko ʻení ʻa ia ko hono tokoniʻi ʻo Timi ʻe he Laumālie Māʻoniʻoní:

Naʻe lava pē ke ʻiloʻi ʻe Timi ʻoku loto-moʻua ʻene fineʻeikí ki ha faʻahinga meʻa. Naʻe mata mamahi mo ongoongosia ʻene tangataʻeikí. Kuo fuofuoloa mai ʻeni mo e ʻikai maʻu mai haʻanau tohi mei hono taʻokete ko Uilí ʻa ia naʻá ne lolotonga ngāue fakafaifekau.

Naʻe tangutu hifo ʻa Timi ʻi he sea ʻi honau loto-falé, ʻo ne lava pē ke ne fanongo atu ki he pōtalanoa ʻene ongo mātuʻá mei honau peitó.

Naʻe pehē ʻe he tangataʻeikí, “Meʻa fakatuʻutāmaki moʻoni ko e mofuiké pea ʻai aí mo ʻene hoko ofi atu ki he feituʻu ʻoku ngāue ai ʻa Uilí. ʻOku ou fakaʻamu ange pē ke vavé ni mai haʻata ʻilo pe ʻokú ne siʻi fēfē.”

Naʻe fakafanongo fakalelei atu pē ʻa Timi. Naʻe tuʻu ʻi he fakakaukau ʻa Timí ʻa e meʻá ni, “Mofuiké … Uili?” Naʻá ne ongoʻi ʻoku mamahi hono fatafatá. Naʻá ne sio loto atu ki ha lavea pe tanumia ʻa hono taʻoketé ʻi ha ngaahi maka mamafá. Naʻá ne hila atu ki he tā ʻo Uili he funga tēpilé pea naʻá ne fakatē loʻimata. Naʻá ne hū fakavave leva ki hono lokí ʻo tāpuniʻi mai ʻa e matapaá. ʻI he pō kotoa ko iá mo e ʻaho hono hokó naʻe ʻikai ke toe ha faʻahinga meʻa he haʻu ki heʻene fakakaukaú pea mo ʻene loto hohaʻá. Ko e taimi kotoa pē naʻe ʻai ke ne talanoa ai ki heʻene ongo mātuʻá, kuo hangē ka mapuní ʻene mānavá pea ʻikai ke toe lava ia ʻo lea.

Naʻe fakaʻau pē ke lahi ange ʻa e manavasiʻi ko ʻeni ʻa Timí. Naʻá ne ongoʻi ke ne ʻalu ʻo talanoa mo ha taha. Naʻá ne ʻiloʻi ʻoku ngāue ʻene tangataʻeikí ʻi he tafaʻaki ki lalo ʻo honau falé, ko ia naʻá ne hifo ki ai.

Naʻe fakaava ʻe Timi hono ngutú ke ne leaʻaki ʻa e meʻa naʻá ne ʻosi palani ke ne leaʻakí. Ka naʻe ʻikai ko ha meʻa faingofua ke ne lea kau kia Uili. Naʻá ne punou pē pea kamata ke fakatē loʻimata.

Naʻe fehuʻi ange ʻe he tangataʻeikí, “Timi, ʻokú ke hohaʻa kia Uili, ʻikai ko ia? Naʻá ma hohaʻa ʻi he taimi naʻá ma fanongo ai ki he mofuiké. Kuó ma ʻosi lotu mo e fineʻeikí ke fakahaofi ʻa Uili. Pea kuo fakafiemālieʻi kimaua ʻe he Laumālie Māʻoniʻoní ʻoku lelei e meʻa hono kotoa pē peá ke ʻoua te ma hohaʻa. ʻE lava pē ke ke maʻu ha fakafiemālie tatau Timi.”

Naʻe fehuʻi ange ʻe Timi, “ʻO maʻu fēfē?”

“Lotu ki he Tamai Hēvaní ʻo fakahā kiate ia ʻa e ngaahi manavasiʻi ʻoku ʻi ho lotó. Kole kiate ia ke ne tokoniʻi koe ke ke ʻiloʻi pe ʻoku hao pē ʻa Uili. ʻOku ou ʻilo fakapapau te ke maʻu ha fakafiemālie.”

Naʻe fai ʻe Timi ʻa e meʻa naʻe tala ange ʻe heʻene tangataʻeikí. Naʻá ne lotu ke fakahaofi muʻa ʻa Uili. Naʻá ne kole ki he Tamai Hēvaní ke tokoniʻi ia ke ne ʻiloʻi ʻoku moʻui lelei pē ʻa Uili. ʻI he ʻosi pē ʻa e lotu ʻa Timí, naʻá ne ongoʻi ʻoku ʻalu hake ʻiate ia ha nonga mo ha fiemālie. Naʻe ʻikai ke ne toe hohaʻa ia kia Uili. Naʻá ne ʻiloʻi ʻoku lelei ʻa e meʻa hono kotoa.

Fāifai, naʻe maʻu mai ha tohi ʻo fakahā ki he fāmilí ʻoku moʻui lelei pē ʻa Uili. Naʻe ʻikai ofo ai ʻa Timi ia. Naʻá ne ʻosi ʻiloʻi ʻoku sai pē ʻa Uili. Naʻe fakafiemālieʻi ʻa Timi ʻe he Laumālie Māʻoniʻoní.

Tala ange ki he fānaú ko ha tāpuaki mahuʻinga moʻoni ia kia Timi mo hono fāmilí ʻa e Laumālie Māʻoniʻoní. ʻE lava pē foki ke hoko ia ko ha tāpuaki mahuʻinga kiate kitautolu.

Fekau ha taha ke ne fakapipiki hake ʻa e kaati foʻi lea ko e “ʻOku Fakamolemoleʻi Kitautolu ʻe he Tamai Hēvaní” ʻi he palakipoé.

Fakamatalaʻi ange ko e tāpuaki mahuʻinga ʻe taha hono papitaiso kitautolú ko e lava ko ia ke fakamolemoleʻi kitautolu ʻi he taimi ʻoku tau fai ai ha ngaahi fehalākí. Naʻe ʻosi ʻafioʻi pē ʻe he Tamai Hēvaní ʻe ʻi ai ʻa e ngaahi fehālaaki ʻa ʻene fānaú. Naʻá ne fekau ke fakatomala ʻa e toko taha kotoa pē mei heʻenau ngaahi fehalākí. Naʻá ne talaʻofa mai kapau te tau fakatomala, te ne fakamolemoleʻi kitautolu peá ne foaki mai mo ha ngaahi tāpuaki kehe. Fakamanatuʻi ange ki he fānaú ko e konga ʻo e fakatomalá ʻa e tui kia Sīsū Kalaisí. Ko e konga ʻe tahá ko e moʻui ʻo hangē ko ia ʻoku finangalo mai ki ai ʻa Sīsuú, ʻa ia ko ʻetau toe talangofua ange ki heʻene ngaahi fekaú. ʻE lava ke tau ako ʻo toe lahi ange ʻo kau kia Sīsū pea mo ʻene ngaahi fekaú ʻi heʻetau lau mo ako ʻa e folofolá.

Fakaʻaliʻali ʻa e fakatātā 3–49, Ko e Lotu ʻa ʻĪnosí.

Fakamatalaʻi ange ko ʻĪnosí ko ha palōfita ia ʻoku lava ke tau lau ki ai ʻi he Tohi ʻa Molomoná. Naʻe kole kiate ia ʻe heʻene tamaí ke ne tokangaʻi ʻa e ngaahi lekooti ʻa ia naʻe ʻi ai ʻa e ngaahi folofolá mo e hisitōlia ʻo hono kakaí. Naʻe hiki ʻa e hisitōlia ko ʻení ʻi he ngaahi peleti koulá. Naʻe akonekina ʻa ʻĪnosi ʻe heʻene tangataʻeikí ki he ongoongoleleí ʻo fakatatau ki he ngaahi lekooti ko ʻení, ko ia naʻe ʻosi ʻiloʻi ʻe ʻĪnosi ia ʻa e founga ke ne moʻuiʻakí. ʻI ha ʻaho ʻe taha, naʻe ʻalu ai ʻa ʻĪnosi ki he vaoʻakaú ʻo lotu. Naʻá ne kole ke fakamolemoleʻi ia ʻi heʻene ngaahi faiangahalá. Pea naʻe ʻi ai ʻa e meʻa fakaofo naʻe hoko.

Fakamatalaʻi ange naʻe fakamolemoleʻi ʻe he Tamai Hēvaní ʻa ʻĪnosi peá ne talaʻofa te ne tāpuakiʻi ia. Naʻe ongo mai ha leʻo kiate ia ʻo pehē, “ʻE ʻĪnosi, kuo fakamolemoleʻi hoʻo ngaahi angahalá, pea te ke monūʻia” (ʻĪnosi 1:5). Naʻe fakamolemoleʻi ʻa ʻĪnosi koeʻuhí ko ʻene tui kia Sīsū Kalaisí ʻa ia naʻá ne lau ʻo kau ki ai ʻi he ngaahi lekōtí. Naʻe fakamolemoleʻi ia koeʻuhí he naʻá ne tui ki he feilaulau fakalelei ʻa Sīsū Kalaisí. Naʻe toe talaʻofa ange foki ʻa e Tamai Hēvaní kia ʻĪnosi ʻe tauhi malu ʻa e ngaahi lekōtí pea ʻe ʻi ai ʻa e ʻaho ʻe lau mei ai ʻa e kau Leimaná. ʻE tokoniʻi kinautolu ʻe he ngaahi lekōtí ke nau ʻiloʻi ʻa Sīsū, tauhi ʻa e ngaahi fekaú, pea mo maʻu ha fakamolemole ʻi he taimi ʻoku nau fai hala aí.

Fakamatalaʻi ange ʻoku tau ʻiloʻi naʻe tauhi ʻe he Tamai Hēvaní ʻa ʻene talaʻofa kia ʻĪnosí koeʻuhí he ʻoku lava ke tau lau ʻi he Tohi ʻa Molomoná ʻo kau ki he ngaahi meʻa naʻe hiki ʻi he ʻū laʻi peletí.

Fakahā ʻa hoʻo fakamālō ʻi hoʻo ʻiloʻi ko ia ʻe fakamolemoleʻi ʻa kinautolu kotoa pē ʻoku fakatomala moʻoní. Fakamamafaʻi ange ko ha tāpuaki lahi ʻaupito ʻa e folofolá ʻi heʻene tokoniʻi kitautolu ke fakatupulaki ʻa ʻetau tui kia Sīsū Kalaisí pea mo ʻetau ako ʻa ʻene ngaahi akonakí.

Tokoni ki he fānaú ke mou hivaʻi pe lau ʻa e lea ʻo e “Tokoni Mai ʻe Tamai.”

Fai hoʻo fakamoʻoní ʻoku tauhi maʻu pē ʻe he Tamai Hēvaní ʻa ʻene ngaahi talaʻofa kiate kitautolú ʻo kapau te tau talangofua kiate ia. ʻE lava pē ke ke fakamatalaʻi ki he fānaú ha meʻa naʻá ke aʻusia ʻo ke ongoʻi ai naʻe tāpuekina koe koeʻuhí pē ko hoʻo kau ki hono siasí.

Fakaafeʻi ha taha ʻo e fānaú ke ne fai ʻa e lotu tukú.