Fai ki he Niʻihi Kehé ʻa e Meʻa ʻokú ke Loto ke Fai Kiate Koé

Fakamatalaʻi ange ki he fānaú, ko e koloá ko ha meʻa ia ʻoku ʻanautolu, hangē koha tohi, meʻa-vaʻinga, paʻanga pe vala. Ko e koloa mahuʻingá, ko ha meʻa ia ʻokufuʻu saiʻia pe fuʻu mahuʻinga ʻaupito kiate kitautolu. ʻOku ʻikai ke pehē ko ha koloamahuʻinga pē pea lava ke totongiʻaki ha paʻanga lahi. ʻOku siʻisiʻi pē honomahuʻinga fakapaʻangá ka ʻoku fuʻu mahuʻinga makehe ia koeʻuhí ko e feituʻu naʻeʻomi ia mei aí pe ko e toko taha naʻá ne foaki mai iá.

ʻOange ki he tamasiʻi mo e taʻahine taki taha ha konga pate māsima pea koleange ke ne fakafōtunga ʻa e konga paté ki ha taha ʻo ʻene ngaahi koloa ʻokumahuʻinga taha kiate iá. Tuku ange ha miniti siʻi ke faʻu ai ʻe he fānaú ʻenau fangakiʻi fakatātā mei he paté.

Fakaafeʻi e fānaú ke nau fakaʻaliʻali ʻenau ngaahi fakatātā mei he paté pea nau fakamatala ki hono ʻuhinga ʻoku fuʻu mahuʻinga ai kiate kinautolu ʻa e ngaahi koloa ko iá.

Fakaʻaliʻali ʻa ʻenau fanga kiʻi meʻa naʻa nau ngaohí ʻi he funga tēpilé pe ʻi ha toe feituʻu kehe pē ke toki fakaʻaongaʻi ʻamui ʻi he lēsoní.

Tala ange ʻoku tau fie maʻu kotoa pē ke tokangaʻi fakalelei ʻe he niʻihi kehé ʻa ʻetau ngaahi koloa mahuʻingá. ʻOku ʻi ai foki mo e ngaahi koloa ia ʻa e kakai kehé ʻoku mahuʻinga kiate kinautolu, pea ʻoku nau fie maʻu ke tau tokangaʻi lelei mo fakaʻapaʻapa foki ki heʻenau koloa makehe ko iá.

Tala ange ki he fānaú kuo akonekina kitautolu ʻe Sīsū Kalaisi ʻi ha founga ke tau faiki he kakai kehé pea mo ʻenau ngaahi koloá. Fakaʻaliʻali ʻa e fakaʻilonga pe mama FKT pea tala ange ʻoku lava ke tau maʻu ʻa e ngaahi akonaki ʻa Sīsū Kalaisi ki hemeʻa ko ʻení ʻi he folofolá. Fekau ke nau fakafanongo ka ke lau ʻa e 3 Nīfai 14:12ʻo ngata pē ʻi he kiate kinautolú.

Mou aleaʻi mo e fānaú ʻa e veesi ko ʻení. Tokoni ke mahino kiate kinautolu ʻoku totonu ke tau fai ki he kakai kehé ʻa e meʻa ʻoku tau loto ke nau fai mai kiate kitautolú. Tala ange ʻoku faʻa ui ʻeni he taimi ʻe niʻihi ko e Lao Koulá, pea ko hono fakaleá ʻoku pehē mai pē, “Fai ki he niʻihi kehé ʻa ia ʻokú ke loto ke fai mai kiate koé.”

Fekau ʻa e fānaú ke nau toutou lau leʻo-lahi ʻa e Lao Koulá. Fakamatalaʻi ange ʻoku kau ʻi hono fai ki he kakai kehé ʻa e meʻa ʻokú te loto ke fai mai kiate kitá ʻa hono fakaʻapaʻapaʻi ʻenau koloá ʻo hangē pē ko ʻetau fie maʻu ke nau fakaʻapaʻapaʻi ʻetau ngaahi koloá.

Fakamatalaʻi ange kuo fekauʻi kitautolu ʻe he Tamai Hēvaní ke tau fakaʻapaʻapa ki he kakai kehé pea mo ʻenau koloá.

Lau ʻa e ʻEkesōtosi 20:15. Kole ange ki he fānaú ke nau fakamatalaʻi atu ʻa eveesi folofola ko ʻení.

Hanga ʻo fakamamafaʻi heni kuo fekauʻi kitautolu ʻe he Tamai Hēvaní pea mo Sīsū Kalaisi ke ʻoua naʻa tau kaihaʻa. ʻOku toe fakahā mai foki ʻe he ngaahi lao ʻo hotau fonuá ʻoku hala ke tau kaihaʻa mei he kakai kehé. ʻI heʻetau hoko ko e kāingalotu ʻo e Siasi ʻo Sīsū Kalaisí, ʻoku tau tui ʻoku totonu ke tau talangofua ki he ngaahi lao ko ʻení pea pehē foki ki he ngaahi fekau ʻa e Tamai Hēvaní pea mo Sīsū Kalaisí.

Fakamatalaʻi ange ʻoku fakahā mai ʻe he tefito ʻo e tui hono hongofulu mā uá ʻa ʻetau tui fekauʻaki mo e ngaahi laó. Fekau ʻa e fānaú ke nau lau ʻa e fakamatala ko ʻení, “ʻOku mau tui ʻoku totonu … ke talangofua … ki he laó.”

Fai ki he fānaú ʻa e talanoa kau ki ha ongo tamaiki fefine naʻá na fehangahangai mo ha fili faingataʻa:

Naʻe fie maʻu ʻe Seni mo Sūsana ke fakatau haʻana pulu-lole mei he mīsini ʻoku fakatau atu ai ʻa e pulu-lolé. Naʻá na mono ʻa e foʻi sēnití ʻi he loto mīsiní peá na milohi ʻa e kaú kae homo mai ʻa e foʻi pulu-lolé, ka naʻá na ʻohovale he ʻikai ke homo mai pē ha taha kae ngangana hifo ha pulu-lole lahi ia. Pea toe homo mai pē foki ki tuʻa mo ʻena sēnití.

Tala ange ki he fānaú naʻe hoko pē ʻa e meʻa tatau ʻi he ngaahi taʻu kuo hilí kia ʻEletā Sitelini W. Sila ʻa ia naʻá ne hoko ko ha Taki Māʻolunga ʻi he Siasí, pea mahalo ʻe tokoni ʻeni ke nau lava ʻo tali ʻa e fehuʻí. ʻOsi peá ke fai ʻa e talanoa ko ʻení ʻi hoʻo lea pē ʻaʻau:

Naʻe fakaʻuli mai ʻa [ʻEletā Sila] he halá ʻokú ne fieinua, ko ia naʻá ne tuʻu ke fakatau mai haʻane kapa inu. Naʻá ne fakahū ha sēniti ʻe hongofulu ʻi he loto mīsini ʻoku fakatau ai ʻa e ʻū kapa inu ʻi he pausá, pea naʻe homo mai ʻene kapa inú pea toe homo mai pē ʻene sēnití ki tuʻa. Naʻá ne toʻo mai ʻa e sēnití ʻo ne sio hifo ki ai, faʻo ia ki hono kató peá ne foki atu ki heʻene kaá mo ʻene pehē, “Sai pē ia mo e fuʻu mamafa ʻenau kapa inú.” Ka naʻe ʻikai ke aʻu ki he kaá, he naʻe ʻi ai ha kiʻi leʻo siʻisiʻi naʻe kaikaila pē ʻi hono telingá mo fai ange ha foʻi fehuʻi mālie. Ko e fehuʻí naʻe pehē, ‘ʻE sila, meʻa ní te ke hoko ko ha tangata kaihaʻa koeʻuhí pē ko ha kiʻi sēniti pē ʻe hongofulu?’ (Hartman Rector, Jr., “Get Up and Glow,” Brigham Young University Speeches of the Year [Provo, 5 Sānuali 1972], p. 6).

Hili ʻa e tali atu ʻa e fānaú, tala ange naʻá ne toe foki ki he mīsiní ʻo kamata ke fakafoki ʻa e sēnití. Ka kuo toe ʻi ai ʻeni mo e palōpalema ia ʻe taha ʻa Sila.

Fakamahino ki he fānaú ʻe toe lahi ange heni ʻa e palōpalemá ia.

Fakamatalaʻi ange naʻe ʻiloʻi ʻe ʻEletā Sila ʻoku ʻikai ko ha sēniti ʻeni ia ʻaʻana. Kuó ne ʻosi fakafetongiʻaki ʻe ia ʻa e kapa inú. Ko ia naʻá ne kumi leva ʻa e tangata faifakataú ʻo ʻoange ki ai ʻa e sēnití.

Hanga ʻo fakamamafaʻi ange naʻe fili ʻa Seni, Sūsana pea mo ʻEletā Sila ki he totonú. Naʻa nau fili ke nau talangofua ki he fekau ʻa e Tamai Hēvaní pea mo Sīsū Kalaisi pea mo e lao ʻo e fonuá—naʻe ʻikai ke nau kaihaʻa.

Fakamahino ange kuo pau ke ʻoua naʻa tau ʻave ha meʻa ʻoku ʻikai ʻatautolú.

Fai ki he fānaú ʻa e talanoa ko ʻení ʻi hoʻo lea pē ʻaʻau:

Naʻe lue atu ʻa Keiti ki he akó mo ʻene sio atu ki ha meʻa ngingila ʻi he musie ofi pē ki he halá. Naʻá ne punou hifo ʻo ʻiloʻi tā ko ha kahoa koula. Ko ha kahoa fakaʻofoʻofa ʻeni. ʻI heʻene toʻo hake iá, naʻá ne fakakaukau ʻo pehē, “ʻOku tatau tofu pē ʻa e kahoa ko ʻení mo e kahoa naʻe foaki ange moʻo Malia ʻi he hoko hono ʻaho fāʻeleʻí.” Naʻe faʻo ʻe Keiti ʻa e kahoá ʻi hono kató peá ne fakavave atu ki he akó.

Naʻe ʻikai ke ʻi he kalasí ʻa Malia. Naʻá ne toki hū mai ki loki ako kuo fuoloa e kamata ʻa e kalasí ia. Naʻe kula mo fufula hono matá ʻo hā mai naʻá ne tangi.

ʻI he lolotonga ʻo e houa kai hoʻataá, naʻá ne tala ange ai kia Keiti ʻa hono ʻuhinga naʻá ne tōmui ai ki he akó. Naʻe mole hono kahoá, ʻi he feituʻu pē ko ia naʻe maʻu ai ʻe Keití, pea naʻá ne ʻosi kumi ai. Naʻe ʻikai pē ke lea ʻa Keiti ia. Naʻá ne fakakaukau pē ia ʻo pehē, “He ʻikai pē teu tala ange ʻoku ʻiate au ʻa e kahoá. Naʻá ku ʻilo foki ia ʻe au pea ko e meʻa ia ʻaʻaku.”

Naʻe tala ange ʻe he faiakó ki heʻenau kalasí ʻi he hoʻatā ko iá ʻa e meʻa naʻe hoko ki he kahoa ʻo Maliá. Naʻá ne kole ange ke nau tokoni muʻa ʻi hono kumi ʻa e kahoá ʻi he tuku ʻa e akó.

Ko Keiti pē naʻe hū fakamuimui taha ki tuʻa mei he loki akó he hoʻatā ko ʻení. Naʻá ne ongoʻi taʻe fiemālie. Naʻá ne ʻilo ʻa e loto-mamahi ʻa Maliá. Naʻá ne ʻiloʻi ko e kahoa ia ʻo Malia neongo ko ia naʻá ne ʻiló. Naʻá ne fakakaukau atu kapau ko hono kahoa ʻeni, te ne fie maʻu ʻa Malia ke ne fakafoki ange ia. Ko ia naʻá ne lele fakavave atu ʻo kumi ʻa Malia ke fakafoki ʻa e kahoá.

Fakamatalaʻi ange ʻoku totonu ke tau feinga maʻu pē ke fakafoki ha faʻahinga koloa mole pe koloa naʻa tau ʻilo ki he toko taha ʻoku ʻaʻaná. ʻOku totonu ke ʻoua ʻaupito naʻa tau maumauʻi ʻi he ʻiloʻilo pau pe ngāue halaʻaki ʻa e ngaahi koloa ʻa e kakai kehé. Toʻo hake ki ʻolunga ha taha ʻo e fanga kiʻi meʻa naʻe ngaohiʻaki ʻe he fānaú ʻa e paté peá ke fakaʻaliʻali ki he fānaú ʻa e founga ʻo hono pukepuke pe toʻotoʻo fakalelei iá. Paasi takai ʻi he kalasí ke ako ʻa e fānaú ki he ala fakaleleí mo hono tokangaʻi iá.

Fai ʻa e talanoa ko ʻení ʻi hoʻo lea pē ʻaʻau:

Naʻe vaʻinga ʻa Tuloi mo ʻAlani ʻi ha loto-ʻataʻatā naʻe hoko atu pē ki he feleoko ʻo Pení. Naʻe fai e tolotolo maka ʻa Tuloi peá ne poleʻi ʻa ʻAlani ke na feʻauhi tolo pe ko hai ʻe mamaʻo taha ʻene toló. Hili ʻena tolotoló, naʻe tolongi atu ʻe Tuloi ia ha foʻi maka ʻe taha ʻo tau ia ʻi he tafaʻaki feleoko ʻo Pení. Naʻá ne fakamataliliʻi ʻa ʻAlani mo ne pehē ange, “Fai ki he hā he ʻikai ke tau hoʻo toló ʻi he feleokó.” Naʻe toʻo hake ʻe ʻAlani ha foʻi maka ʻo kamata ke ne tolongi.

Fekau e fānaú ke nau fakakaukau angé ki ha fakaʻosi lelei ʻo e talanoá ʻa ia ʻe fakahā mai ai ʻa e meʻa ʻoku totonu ke fai ʻe ʻAlaní. Fekau ha toko ua pe lahi ange ke na tala mai hono fakaʻosi ʻo e talanoá.

Fakamatalaʻi ange naʻe fili ʻa ʻEletā Sila, Keiti mo ʻAlani ki he totonú.

Fekau e fānaú ke nau tuʻu ki ʻolunga ʻo hivaʻi pe lau ʻa e lea ʻo e “Fili e Hala Totonú.”

Kole ki he fānaú ke nau tala atu ha ngaahi founga kehe te nau lava ke fakahā ai ʻa e fakaʻapaʻapa ki he ngaahi koloa ʻa e kakai kehé. Mahalo pē ʻe kau ʻi heʻenau ngaahi fokotuʻú ʻa e ngaahi meʻa ko ʻení:

ʻEke ange ki he fānaú pe ʻoku nau kei manatuʻi ʻa e ngaahi lea ʻi he Lao Koulá. Kapau ʻoku poto ʻa e fānaú ʻi he laukongá peá ke hiki mata lalahi ʻa e ngaahi foʻi leá ʻi he palakipoé pe ko haʻo lea māmālie ʻaki pē ia. ʻOsi pea mou lau fakataha ia. Fakafoki ki he fānaú ʻa e fanga kiʻi meʻa naʻa nau ngaohiʻaki e paté.

Fakamoʻoniʻi ange ki he fānaú ʻoku mahuʻinga ke tau fai ki he kakai kehé ʻa e meʻa ʻoku finangalo mai ʻa Sīsū Kalaisi ke tau faí. ʻE lelei kapau te ke fakamatala ki ha taimi naʻe fai lelei atu ai ha taha kiate koe peá ke fakamatalaʻi ange ki he fānaú ʻa e ongo naʻá ke maʻú. Poupouʻi e fānaú ke nau fai ki honau fāmilí pea mo e ngaahi kaungā-meʻá ʻa e ngaahi meʻa ʻoku nau loto ke fai ange kiate kinautolú.

Fakaafeʻi ha taha ʻo e fānaú ke ne fai ʻa e lotu tukú.