Ko e Taʻu ʻoku Tau Haʻisia ai ki heʻetau Ngaahi Angafaí

Puke hake ki ʻolunga ʻa e vala pēpē naʻá ke haʻu mo iá.

Mou talanoa mo e fānaú naʻe ʻi ai e taimi naʻa nau kei iiki ai ʻo lava pē ke hao ʻa e fanga kiʻi vala iiki ko ʻení, ka kuo tupu honau sinó ʻo lalahi ange. Fakamatalaʻi ange ʻoku tatau pē ʻa e tupu ʻo lalahi honau sinó mo ʻenau tupu ʻi he ngaahi founga kehe ʻo hangē ko ʻenau lava ko ia ke fai ʻa e ngaahi meʻa hangē ko ʻenau tui honau valá.

Fakamatalaʻi ange ʻoku fakahā mai ʻe he ngaahi meʻa ko ʻení kuo nau tupu ʻo lalahi ange pea lahi ange mo e ngaahi meʻa kuo nau akó. Meimei ko e toko taha ko ia kuó ne ʻosi ako ke ne lava ʻo fai ʻa e ngaahi meʻa ko ʻení kuo nau ʻosi matuʻotuʻa feʻunga ke ʻiloʻi ʻa e meʻa ʻoku totonú mei he meʻa ʻoku halá.

Fakamanatuʻi ange ki he fānaú ko ha toko taha poto ʻa e Tamai Hēvaní. ʻOkú ne ʻafioʻi kuo pau ke tau ako ʻo ʻiloʻi ʻa e meʻa ʻoku totonú mo ia ʻoku halá. Ko e taimi ko ia kuo tau tupu hake ai ʻo matuʻotuʻa feʻunga pea tau ako ʻo ʻilo feʻunga ki he meʻa totonú mo e halá, ʻoku tau haʻisia leva ki he meʻa ko ia ʻoku tau faí. ʻOku ʻuhinga ʻa e pehē ko ia ʻoku tau haʻisia ki he ngaahi meʻa ʻoku tau faí, kuo pau ke ʻeke kiate kitautolu ʻa e meʻa hala ʻoku tau faí pea ʻoku tāpuekina kitautolu koeʻuhí ko e meʻa totonu ʻoku tau faí.

Fekau e kalasí ke nau lau fakataha ʻa e tefito ʻo e tui hono uá. Kapau ʻoku lava ʻe he fānaú ke lau ʻiate kinautolu pē pea tuku ke nau lau.

Fekau e fānaú ke nau lea fakataha ʻaki ʻa e “Fili ki he totonú.” Fakamatalaʻi ange ki he fānaú ʻe lava ʻe honau mamá ʻo tokoniʻi kinautolu ke nau ʻiloʻi kuo nau tupu matuʻotuʻa feʻunga ke nau fili ki he totonú.

Fakamatalaʻi ange ko e ako ko ia ke fili ki he totonú kae ʻikai ki he halá, ko ha sitepu lahi moʻoni ia ʻi heʻetau tupu haké. ʻE ʻikai ke fakamālohiʻi kitautolu ʻe he Tamai Hēvaní ke tau fai ʻa e meʻa ʻoku totonú. Ka ʻokú ne tuku mai ʻa e tauʻatāina ke tau fili ʻi he vahaʻa ʻo e totonú mo e halá peá ke tau fatongiaʻaki pē ʻa hono tauhi ʻo e ngaahi palōmesi naʻa tau faí. ʻOkú ne ʻafioʻi ko e meʻa pē te tau lava ke tupulaki mo ako aí ko ʻetau maʻu ʻa e tauʻatāina ke filí.

Tohiʻi ʻi he palakipoé ʻa e FKT. Fekau e fānaú ke nau toe tala atu ʻa hono ʻuhinga ʻo e ngaahi mataʻitohi ko ʻení. Fakahā ange ki he fānaú ʻa hoʻo falala te nau lava ʻo ako ke nau ʻiloʻi ʻa e meʻa totonú mei he halá pea ʻoku ʻanautolu pē ke tali ki he ngaahi meʻa ʻoku nau faí.

ʻOange ki ha toko taha pe toko ua ʻo e fānaú ʻa e tohi naʻá ke haʻu mo iá. Fakahā ange ko hona fatongiá ke tokangaʻi ʻa e tohí. Fakamatalaʻi ange ki he kalasí ko e toko ua ko ʻení te na haʻisia ki ha faʻahinga meʻa ʻe hoko ki he tohí he lolotonga ʻa e taimi kalasí. Kapau ʻe mole, mahae, pe maumau ʻa e tohí, kuo pau ke na tali kinaua kiate koe. Te na fai ʻa e tali kiate koe fekauʻaki mo e meʻa ʻe hoko ki he tohí.

ʻOange ki ha tamasiʻi kehe ʻa e foʻi pulú. Fakamatalaʻi ange ʻe fatongiaʻaki ʻe he tamasiʻi ko ʻení hono tokangaʻi ʻo e foʻi pulú, tatau pē mo hono fatongiaʻaki ʻe he ongo tamaiki ko eé ʻa e tohí.

ʻOange ki he fika tolú ha kofu lole pe ha faʻahinga meʻakai. Fakapapauʻi ʻokú ke fili ha taha ʻokú ne lava ke fai lelei ʻení. Tala ange ki he tamasiʻi pe taʻahine ko ʻení ke ne tufa ʻa e lolé pe meʻakaí ki he kotoa ʻo e kalasí ʻi he hili ʻa e lotu tukú. ʻOku fatongiaʻaki ʻe he tamasiʻí pe taʻahiné hono tokangaʻi ʻa e meʻakaí ke malu kae ʻoua kuo taimi ke nau toki vahevahe ia.

Hanga ʻo fakamamafaʻi ange ʻoku tauʻatāina pē ʻa e tamasiʻi pe taʻahine ia ko ʻení ke ne fili ʻa e meʻa ke ne faí, ka ʻe haʻisia ʻa e toko taha ia ko ʻení ki he fili te ne faí.

Fakamatalaʻi ange ʻoku tatau tofu pē ʻeni mo e moʻuí. ʻOku hanga ʻe he palani ʻa e Tamai Hēvaní ʻo tuku mai ha ngaahi fili. Te tau lava pē ke fili ki he totonú pe halá, fakapotopotó pe fakavalevalé, ka ʻoku tau haʻisia ki heʻetau ngaahi filí pea mo e ngaahi nunuʻá.

Fakaʻaliʻali ʻa e Tohi ʻa Molomoná. Tala ange ki he fānaú naʻe ʻi ai ha falukunga kakai ʻi he Tohi ʻa Molomoná ʻa ia naʻe ʻi ai ha fili faingataʻa moʻoni ke nau fai, pea naʻa nau fakapapauʻi pē te nau fili ki he totonú. Fai ʻa e talanoa ko ʻení ʻi hoʻo lea pē ʻaʻau.

Ko ʻĀmoní ko ha taha ngāue fakafaifekau ia naʻá ne fakamatalaʻi ki he tuʻi ʻo e kakai Leimaná ko Lamōnai, ʻa e ngaahi akonaki ʻa Sīsū Kalaisí. Naʻe tui ʻa e Tuʻi ko Lamōnaí ki he ngaahi akonaki ko ʻení, ko ia naʻá ne ului ai ki he ongoongoleleí. Naʻá ne kole ki hono kakaí ke nau fakafanongo kia ʻĀmoni mo hono ngaahi tokouá. Naʻe ʻafioʻi ʻe he Tuʻi ko Lamōnaí ʻoku moʻoni ʻa e meʻa naʻe leaʻaki ʻe he kau tangatá ni.

Naʻe ʻalu ʻa ʻĀmoni mo hono ngaahi tokouá mei he kolo ki he kolo, mei he fale ki he fale ke akoʻi ʻa e kau Leimaná. Naʻe ʻikai ʻilo ʻa e kau Leimaná ki he ongoongoleleí, pea naʻa nau faiangahala. Naʻe toko lahi ʻa e kakai naʻa nau tui ki he ngaahi akonaki ʻa ʻĀmoni mo hono ngaahi tokouá ʻo nau ului. Naʻa nau ʻiloʻi ʻoku moʻoni ʻa e ngaahi folofola ʻa Sīsū Kalaisí, ko ia naʻa nau fakatomala ai mei heʻenau ngaahi angakoví.

Naʻe fakakaukau leva ʻa e kakai ko ʻení ke liliu ʻa honau hingoá mei he kau Leimaná ki he kakai ʻAnitai-Nīfai-Līhai. Naʻa nau fakahoko ʻeni ke fakamavahe kinautolu mei he kau Leimana faikoví ʻa ia naʻe ʻikai ke nau muimui ki he ngaahi akonaki ʻa Sīsū Kalaisí.

Ki muʻa pea toki fakatomala ʻa e kakai ko ʻení, naʻe toko lahi ʻaupito ʻa e kakai ne nau fakapō ʻaki ʻenau ngaahi heletaá. Naʻá nau ongoʻi tautea ʻi he meʻa kuo nau faí ʻo nau fie maʻu ai ke nau fakatomala. Naʻa nau fili leva ke nau palōmesi ki he Tamai Hēvaní he ʻikai ke nau toe hiki hake ʻenau ngaahi heletaá ki ha kakai.

Fakamatalaʻi ange naʻe toe fai foki ʻe he kakai ko ʻení ha fili ʻe taha. Fekau e fānaú ke nau muimui pē ʻi heʻenau ngaahi tohí ka ke lau ange ʻa e ʻAlamā 24:17–18.

Fakaʻaliʻali ʻa e fakatātā 3–54, Ko Hono Tanu ʻe he Kakai ʻAnitai-Nīfai-Līhaí ʻa ʻEnau Heletaá.

Hoko atu ʻa e talanoá

Hili hono tanu ʻe he kakai ʻAnitai-Nīfai-Līhaí ʻenau heletaá, naʻe omi ʻa e kau Leimana faikoví ke tau mo kinautolu. Naʻe fetaulaki ʻa e kakai ʻAnitai-Nīfai-Līhaí mo ha fili faingataʻa moʻoni. ʻE lava pē ke nau maumauʻi ʻenau palōmesi naʻe fai ki he Tamai Hēvaní ʻo fakaʻaongaʻi ʻenau heletaá ke nau tauʻaki, pe ko ʻenau fili ke ʻoua naʻa nau tau pea nau mate ai. Naʻa nau fakapapauʻi te nau tauhi ʻenau palōmesi ko ia ke ʻoua naʻa nau toe ala ki heʻenau heletaá ke fakapoongiʻaki ha niʻihi kehé. Naʻe tāmateʻi honau toko lahi ʻe he kau Leimaná. Pea naʻe ofo ʻa e kau Leimaná ʻi heʻenau vakai atu ki he kakaí ni ʻoku ʻikai ke ʻi ai haʻanau meʻa taú pea ʻikai ke nau fie tau mo kinautolú. Naʻe tuku ki lalo ʻe he toko lahi ia ʻenau heletaá he naʻa nau ʻiloʻi ko e meʻa hala naʻa nau faí, ʻa ʻenau fakapoongi ʻa e kakaí. Naʻe fakatomala ʻa e kau Leimana toko lahi pea nau tafoki ʻo kau mo e kakai ʻAnitai-Nīfai-Līhaí ʻi he moʻui anga-tonú.

Naʻe faitotonu ʻa e kakai ʻAnitai-Nīfai-Līhaí ki heʻenau palōmesí neongo naʻe feinga ha kakai kehe ke tāmateʻi kinautolu.

Fakamanatuʻi ki he fānaú ʻoku ʻuhinga ʻa e haʻisia ki he ngaahi meʻa ʻoku nau faí ki heʻenau tali ki he meʻa ʻoku nau faí.

Tohiʻi ʻi he palakipoé ʻa e ngaahi foʻi lea ko ʻení, haʻisia ki he ngaahi meʻa naʻá te faí, peá ke lea leʻo lahi ʻaki kinautolu. Fekau ʻa e fānaú ke nau lea ʻaki atu ia. Fakamatalaʻi ange ko ʻenau taʻu valu pē, ʻoku lau leva ʻe he Tamai Hēvaní ia kuo nau matuʻotuʻa feʻunga ke nau kamata ke tali ki he ngaahi meʻa ʻoku nau faí.

Hivaʻi pe lau fakataha mo e fānaú ʻa e lea ki he “Dare to Do Right.”

Fakamatalaʻi ange ki he fānaú ko ʻenau taʻu valu pē kuo nau tali ki he ngaahi meʻa ʻoku nau faí, ka ko kinautolu ko ē ʻoku teʻeki ai taʻu valú, ʻe lava ke nau akoako atu ki ai ʻaki haʻanau tokoni ki heʻenau mātuʻá mo tauhi ʻenau palōmesi ki he niʻihi kehé. Fakamatalaʻi ʻa e meʻa ko ʻeni ʻoku hokó (kapau te ke fie maʻu peá ke fekau ha taha ke ne fakatātaaʻi):

ʻAi ke pehē ʻoku puke ʻa hoʻo fineʻeikí pea ʻokú ne kole atu ke ke fakamaau ha konga ʻo homou falé. ʻOkú ke fie ʻalu koe ʻo vaʻinga, ko ia ʻokú ke lele koe ia ki tuʻa ke vaʻinga mo ho ngaahi kaungā-meʻá.

ʻI hoʻo foki mai ki falé naʻe ui atu ʻa e fineʻeikí mei hono mohengá mo ne fehuʻi, “Kuó ke ʻosi fakamaau ʻa e tafaʻaki ʻo e falé ne u kole atu ke ke fakamāú?”

ʻOkú ke ʻio ange mo fakamaau fakavavevave ʻa e fanga kiʻi meʻa ʻi he tafaʻaki ko ia naʻe totonu ke ke fakamāú.

Fakamatalaʻi ange ki he fānaú ko e taimi ko ia ʻoku tala ange ai ʻe heʻenau mātuʻá ha ngāue ke nau faí, ʻoku ʻuhinga ia kuo nau lalahi feʻunga ke fatongiaʻaki hono fai ʻo e ngāue ko iá.

Fakamahino ange ko e taimi ko ia ʻoku lipooti mo fakahā ai ʻe he fānaú ki heʻenau mātuʻá ʻa e meʻa naʻa nau faí, ko ʻenau tali ia ki he meʻa naʻa nau faí. ʻOku ʻofa ʻa e mātuʻá ʻi heʻenau fānaú. Ko hono ʻuhinga ia ʻoku fie maʻu ai ʻe he mātuʻá ke nau ʻilo ʻa e meʻa ʻoku fai ʻe heʻenau fānaú ʻi ʻapí, ʻapiakó pea ʻi he taimi ʻoku nau vaʻinga aí.

ʻOku ʻofa foki mo ʻetau Tamai Hēvaní ʻiate kitautolu, ʻo hangē ko ʻetau mātuʻá, ko hono finangaló ke tau lipooti mo fakamatala kiate ia ʻa e ngaahi meʻa lelei mo e ngaahi meʻa kovi naʻa tau faí. Ko e taimi ko ē ʻoku tau fai ai ʻa e ngaahi meʻa ʻoku koví hangē ko e kaihaʻá, loí, pe fakatupu ha mamahi ʻa ha taha hili hotau taʻu valú, ʻoku ui ʻa e ngaahi meʻá ni ko e faiangahala. Fekau ʻa e kalasí ke nau toe lau fakataha ʻa e tefito ʻo e tui hono uá.

Tuhu ki he ngaahi foʻi lea ko e haʻisia ki he meʻa naʻá te faí pea fekau e fānaú ke nau lau leʻo-lahi ia. Tala ange ʻoku nau teuteu ʻeni ke nau tali ki he Tamai Hēvaní ʻi he ngaahi meʻa ʻoku nau faí, he ko e taimi te nau taʻu valu aí, ʻoku nau matuʻotuʻa feʻunga leva ke nau fakahā ʻoku nau fatongiaʻaki ʻa e meʻa ʻoku nau faí pea nau ʻiloʻi ʻa e meʻa ʻoku tonú mei he halá.

Fai ha ngaahi fehuʻi ke tokoni ki he fānaú ke nau fakapapauʻi ʻa e meʻa ʻoku nau fatongiaʻakí mo tali ki ai pea mo e meʻa kuo pau ke fatongiaʻaki ʻe he niʻihi kehé. Fekau ke nau tali fakataha ʻa e ngaahi fehuʻi ko ʻení:

Fekau ʻa e fānaú ke nau fakahā atu ha niʻihi ʻo e ngaahi founga ʻoku nau fatongiaʻakí pea te nau fatongiaʻaki hono tali ki he ngaahi meʻa ʻoku nau faí. ʻE lava ke kau heni ʻa e failelei ki he ngaahi kaungā-meʻá; lea moʻoní; teuteu leleí; ʻalu ki he ngaahi houalotú; fakamamaʻo mei hono fakaʻaongaʻi ʻo e kava mālohí, faitoʻo kona tapú mo e tapaká; pe ko hono tauhi ʻo e ngaahi palōmesi ʻoku nau faí.

Fekau e fānau naʻe ʻiate kinautolu ʻa e tohí mo e foʻi pulú ke nau fakamatala kiate koe ʻa e meʻa naʻa nau faiʻaki e ongo meʻá ni. Fekau ke nau fakafoki atu ʻa e ongo meʻá ni peá ke fakamālōʻiaʻi kinautolu kapau naʻe lelei ʻa e meʻa naʻa nau faí.

Fakaʻosiʻaki hoʻo fakahā ki he kalasí ko ha taimi mahuʻinga ʻeni ʻi heʻenau moʻuí, ka ʻoku ʻikai ke nau tuʻu toko taha pē. ʻOku ʻi ai ʻenau ngaahi mātuʻa mo e kau taki ke fakahinohino mo tokoniʻi kinautolu. ʻOku ʻi ai foki mo e Tamai Hēvaní pea mo Sīsū Kalaisi ke na ʻofa mo fakahinohinoʻi kinautolu. ʻOku ʻiate kinautolu ʻa e Laumālie Māʻoniʻoní hili honau papitaisó ke ne toutou ueʻi maʻu pē kinautolu. Hanga ʻo fakaʻaiʻai e fānaú ke nau fakahā ke toe lahi ange ʻoku nau ako ke nau fatongiaʻaki mo tali ki he ngaahi meʻa ʻoku nau faí. Tokoni ke mahino kiate kinautolu ʻe ʻi ai pē ʻenau fanga kiʻi fehālaaki. ʻOku fehālaaki ʻa e toko taha kotoa pē. Ka ʻe lava pē ke nau fakatomala pea fai lelei ange ʻi he ʻaho taki taha ʻi hono tokoniʻi kinautolu ʻe he Laumālie Māʻoniʻoní.

Fai hoʻo fakamoʻoní ʻoku ʻofa ʻa e Tamai Hēvaní ʻi hono kotoa ʻo ʻene fānaú. Ko hono ʻuhinga ia kuó ne palani ai ha founga maʻatautolu ke tau tupulaki mo hoko ʻo tatau mo ia. Toe fakahā pē ʻa hoʻo falala ʻe hoko ʻa e kiʻi tamasiʻi mo e taʻahine taki taha ke ne fatongiaʻaki ʻa e ngaahi meʻa ʻokú ne faí.

Fakaafeʻi ha taha ʻo e fānaú ke ne fai ʻa e lotu tukú.

Hili hono fai ʻo e lotu tukú pea fekau ʻa e toko taha naʻe ʻi ai ʻa e kofu lolé ke ne fakamatala atu kiate koe ʻa e meʻa naʻá ne faiʻaki e lolé. ʻOsi ko iá pea fekau ke ne tufa ke taki taha ʻa e kalasí ʻi he foʻi lole.